ചിങ്കാരി 2 [Shana] 272

” ചുമ്മാ ഇങ്ങോട്ടേക്കിറങ്ങിയതാ അതുലേട്ടനെ കാണാൻ ” , അവൾ അവൻ്റെ കയ്യിൽ തൂങ്ങിക്കൊണ്ടു പറഞ്ഞു

അവൾടെ നിൽപ്പുകണ്ട അവർക്ക് ചൊറിഞ്ഞു കയറി

” ഓ ഇറങ്ങിയല്ലോ രംഭ , ആണുങ്ങളെ വശീകരിക്കാനായിട്ട് ”

” അമ്മായി അങ്ങനെ പറയരുത് ഞാൻ ആണുങ്ങളെ നോക്കിയില്ല അതുലേട്ടനെ മാത്രമല്ലേ നോക്കിയത് ”

” പിന്നെ നിൻ്റെ ആ പൂതി മാറ്റിവെച്ചേക്ക് എൻ്റെ മോൻ്റെ മേലുള്ള കണ്ണ് ഞാൻ കുത്തിപ്പൊട്ടിക്കും നോക്കിക്കോ , നിന്നെപ്പോലുള്ള ഇരണം കെട്ടതിനെയൊന്നും ഞാനീ വീടിൻ്റെ പടി ചവിട്ടിക്കില്ല ”

” അമ്മായി അങ്ങനെ പറയല്ലേ എനിക്ക് സങ്കടാവുന്നു , അച്ചു ഇപ്പോൾ കരയും എന്ന മട്ടിൽ പറഞ്ഞു. അവൾ പറഞ്ഞതു കേട്ട് അമ്മായിയുടെ മുഖം ദേഷ്യം കൊണ്ട് ചുവന്നു.

അമ്മായിയെ ഒളികണ്ണിട്ടു നോക്കികൊണ്ട് അച്ചു മൂക്ക് പിഴിഞ്ഞ് അതുലിൻ്റെ മുണ്ടിൽ തൂത്തു. അതുൽ അവളുടെ പ്രവർത്തിയിൽ ഞെട്ടി. അവൾ അതു കാര്യമാക്കാതെ പറഞ്ഞു തുടങ്ങി. ”അമ്മായി ഇനി എന്തു പറഞ്ഞാലും ഞാൻ അതുലേട്ടനയേ കെട്ടു ,എനിക്കത്രക്കിഷ്ടമാണ് ഏട്ടനെ. അതുലേട്ടനെ എനിക്ക് തരുമോ അമ്മായീ ”

അവളു പറഞ്ഞതു കേട്ട് അജിയും അതുലും ഞെട്ടി അവളുടെ മുഖത്തേക്ക് വിശ്വാസം വരാതെ നോക്കി.

അപ്പോഴേയ്ക്കും അമ്മായി ദേഷ്യം കൊണ്ട് വിറഞ്ഞു കേറി നിൽക്കുകയായിരുന്നു

” എടി എടി ഒരുമ്പെട്ടവളെ.. നിൻ്റെ വിളച്ചിലൊക്കെ നിൻ്റെ കയ്യിൽ തന്നെ വെച്ചാൽ മതി. എൻ്റെ മോൻ്റെ നേർക്കു ഇറക്കണ്ട, അവളു നിന്ന് ശൃംഗരിക്കുന്നത് കണ്ടില്ലേ.. കുലം മുടിക്കാൻ ഉണ്ടായവൾ. അതും പറഞ്ഞു അമ്മായി അതുലിനെ നോക്കി. ടാ നിന്നോട് പ്രത്യേകം പറയണോ കേറിപ്പോടാ അകത്ത് ” അമ്മായി അലറുകയായിരുന്നു.

” ഈ അമ്മക്കെന്താണ് അവൾ തമാശ പറഞ്ഞതായിരിക്കും.” അതുൽ അച്ചുവിനെ ന്യായീകരിക്കാൻ ശ്രമിച്ചു.

ടാ നീ എൻ്റെ അച്ഛനാകാൻ ശ്രമിക്കണ്ട. ഞാൻ പറയുന്നതു കേട്ടാൽ മതി. കേറിപ്പോടാ അകത്തോട്ട്. അമ്മായി അതുലിനെ പിടിച്ചു വലിച്ചുകൊണ്ട് പറഞ്ഞു. അതുൽ ദേഷ്യത്തോടെ അമ്മയെയും അച്ചുവിനെയും നോക്കീട്ട് അകത്തേയ്ക്ക് കയറി.

” അതുലേട്ടാ പോകല്ലേ , അമ്മായി അങ്ങനൊക്കെ പറയും അതു കാര്യമാക്കണ്ട , നാളെ എൻ്റെ അമ്മയാകണ്ട ആളല്ലേ ,എനിക്കു കുഴപ്പമില്ല ”

“ആരാടി നിൻ്റെ അമ്മ , ദേ പെണ്ണേ പറഞ്ഞേക്കാം. ഇവനെ കയ്യും കണ്ണും കാട്ടി വശത്താക്കിയ പോലെ എൻ്റെ മോൻ്റെ നേരേ വന്നാലുണ്ടല്ലോ , ഈ വിലാസിനിയുടെ നാറിയ മുഖം നീ കാണേണ്ടി വരും ” അത്രയും പറഞ്ഞ് വാതിൽ വലിച്ചടച്ച് അവർ അകത്തേക്ക് പോയി

“ഇപ്പൊ തന്നെ ഇവരെ സഹിക്കാൻ വയ്യ അപ്പൊ ഇനി ഇതിലും നാറിയ മുഖമോ ദൈവമേ ….എങ്ങനെ മാമനും അതുലേട്ടനും സഹിക്കുന്നോ ആവോ , അവൾ മുകളിലേയ്ക്ക് നോക്കി സ്വയം പറഞ്ഞു.

ടാ പൊട്ടാ നീ എന്താകുന്തം വിഴുങ്ങിയതു പോലെ നിൽക്കുന്നത്. വാടാ നമുക്ക് പോകാം ” അച്ചു അജിയുടെ തോളിൽ അടിച്ചു കൊണ്ട് പറഞ്ഞിട്ട് പുറത്തേയ്ക്ക് നടന്നു. അജിയുടെ അനക്കമൊന്നും കേൾക്കാതെ വന്നതോടെ തിരിഞ്ഞു നോക്കിയ അച്ചു കാണുന്നത് ബോധം പോയ പോലെ മിഴുങ്ങന നിൽക്കുന്ന അജിയെ ആണ്. അവൾ അവൻ്റെ മുതുകു നോക്കി ഒരടികൂടി വെച്ചു കൊടുത്തു

“അയ്യോ അമ്മേ ” വേദന കാരണം അവൻ നിന്നു തുള്ളി