💕ചെമ്പനീർപ്പൂവ് 6 [കുട്ടപ്പൻ]💕 1716

മനോഹരമായി പുഞ്ചിരിച്ചുകൊണ്ട് അവൾ എന്നോട് ചോദിച്ചു. 

ആ ചെമ്പനീർപ്പൂവ് സ്വീകരിക്കാതെ തന്നെ ഞാൻ അവളെ എന്നോട് ചേർത്ത് നിർത്തി.

 

“ചിന്നൂ… ലോകത്ത് മറ്റാർക്കും കിട്ടാത്ത ചെമ്പനീർപ്പൂവ് ഇന്ന് എന്നോടൊപ്പം ഉണ്ട്…..അത് എന്റേയീ ചിന്നൂസാണ്”

 

ചിന്നുവിനെ ഒന്നുകൂടെ എന്നോട് ചേർത്ത് നിർത്തി അവളുടെ നെറ്റിയിൽ എന്റെ ആദ്യ സ്നേഹ ചുംബനം കൊടുത്തു. അവൾ നാണിച്ചു മിഴികൾ അടച്ച് എന്നോട് കൂടുതൽ ചേർന്ന് നിന്നുകൊണ്ട് അത് സ്വീകരിച്ചു.

 

താഴേക്ക് ഇറങ്ങിച്ചെന്ന ഞങ്ങളെ കാത്ത് മറ്റൊരു സന്തോഷവാർത്ത കൂടി ഉണ്ടായിരുന്നു. മൂന്നാഴ്ചയ്ക്കകം ഞങ്ങളുടെ വിവാഹം..

 

ചിന്നു വഴി രാഗേന്ദുവും ഞാൻ വഴി അഭിയും ജീവനും ഒക്കെ കാര്യങ്ങൾ അറിഞ്ഞു. എല്ലാവർക്കും സന്തോഷം മാത്രം.

 

*********************************

 

പിന്നീടങ്ങോട്ട് സന്തോഷത്തിന്റെ ദിവസങ്ങളായിരുന്നു.

 

ആ മൂന്നാഴച്ചക്കാലം ഫോൺ വിളിയും മെസേജും ഔട്ടിങ്ങും ഒക്കെയായി ഞാനും ചിന്നുവും പ്രേമിച്ച് നടന്നു. അഭിയും ജീവനും എന്റെ വീട്ടുകാരും ഒക്കെ ഒരുക്കങ്ങൾ നടത്തി ഓടി നടന്നപ്പോഴും ഞങ്ങൾ ഇണക്കുരുവികളെപ്പോലെ പറന്നുനടന്നു. ആകെ ഡ്രസ്സ്‌ എടുക്കാൻ ആണ് ഞാൻ കൂടെ പോയത്. ആഭരണം എടുക്കാനും ഡ്രെസ്സിനും ആയി ചിന്നുവും.

രാവിലെ മുതൽ സന്ധ്യവരെ അവൾ എന്നോടൊന്നിച്ചായിരുന്നു ആ മൂന്നാഴ്ചയും.

ശിവേട്ടന്റെ ഒരു ടീം നിശ്ചിത അകലത്തിൽ ഞങ്ങളെയും ചുറ്റുപാടും വീക്ഷിച്ചു കൂടെ ഉണ്ടെങ്കിലും അതൊന്നും എന്നെ ബാധിച്ചില്ല.