പ്രാണേശ്വരി 14

Praneswari part 14 | Author:Professor bro | previous part

സുഹൃത്തുക്കളെ പ്രാണേശ്വരി അസാനത്തിലേക്ക് അടുക്കുകയാണ് ഇത് വരെ എഴുതി പരിചയം ഇല്ലാത്ത എന്റെ ആദ്യ കഥക്ക് ഇത്രയും പ്രോത്സാഹനം തന്ന എല്ലാവർക്കും ഹൃദയത്തിന്റെ ഭാഷയിൽ നന്ദി പറയുന്നു…

തുടരുന്നു….

അന്ന് രാത്രി ഞാൻ അവളെ വിളിക്കുകയോ അവൾ എന്നെ വിളിക്കുകയോ ചെയ്തില്ല. പിറ്റേന്ന് കോളേജിൽ വച്ചു കണ്ടപ്പോഴും അത് തന്നെയായിരുന്നു അവസ്ഥ.

രാത്രി ഒരു പത്തു മണി ആയപ്പോൾ എന്റെ ഫോണിലേക്കൊരു കാൾ വന്നു ലച്ചു ആണെന്ന് കരുതിയാണ് ഞാൻ ഫോൺ എടുത്തത് ഡിസ്‌പ്ലേയിൽ എഴുതി വന്ന പേര് കണ്ടതും എനിക്ക് വീണ്ടും സങ്കടവും ദേഷ്യവും എല്ലാം വന്നു

ഇന്ദു… അവൾ വല്ലപ്പോഴും വിളിക്കാറുണ്ടെങ്കിലും ഇപ്പോൾ ഈ സമയത്ത് ഞാൻ ലച്ചുവിന്റെ അല്ലാതെ വേറെ ആരുടേയും കാൾ താല്പര്യപ്പെടുന്നില്ല എന്നുള്ളതാണ് സത്യം. എന്നാലും ഫോൺ എടുക്കാതെ ഇരിക്കുന്നത് മര്യാദകേടാണല്ലോ എന്നോർത്ത് മാത്രം ആ കാൾ അറ്റൻഡ് ചെയ്തു.

“ആ… പറ ഇന്ദു… ”

“എടാ… നിങ്ങൾ തമ്മിൽ എന്താ പ്രശ്നം ”

അവൾ മുഖവുര ഒന്നും കൂടാതെ നേരെ കാര്യത്തിലേക്ക് കടന്നു. അപ്പോഴാണ് ഇന്ദു വിളിച്ചതിന്റെ കാര്യം എനിക്ക് മനസ്സിലായത്

“ഏയ്യ്… ഒന്നൂല്ല… ”

“ഒന്നൂല്ലാതെ ആണോ ഒരാൾ ഇവിടെ കിടന്നു മോങ്ങുന്നത്… ”

ലച്ചു കരയുകയാണെന്നറിഞ്ഞതും അത്രയും നേരം അവളോട് തോന്നിയ ദേഷ്യം എവിടെയോ പോയ്‌ പോയി…

“അവൾ കരയുകയാണോ… ”

“കഴിഞ്ഞ ദിവസം മുതൽ ആൾ അധികം സംസാരം ഒന്നും ഉണ്ടായിരുന്നില്ല… ഇന്ന് കോളേജിൽ നിന്നും വന്നത് മുതൽ തുടങ്ങിയ കരച്ചിലാണ് ഇത് വരെ നിർത്തിയിട്ടില്ല… കാര്യം ചോദിച്ചിട്ട് പറയുന്നുമില്ല ”

കുറച്ചു സമയം എനിക്ക് ഒന്നും സംസാരിക്കാൻ സാധിച്ചില്ല…

“ഇന്ദു… ഞാൻ പിന്നെ വിളിക്കാം… ”

ഇന്ദു മറുപടി പറയുന്നതിന് മുൻപ് തന്നെ ഞാൻ കാൾ കട്ടാക്കിയിരുന്നു.