?ബാല്യകാലസഖി 2? [കുട്ടപ്പൻ] 1186

മാഷമ്മാരൊക്കെ വന്നുതുടങ്ങുന്നേയുള്ളൂ.

വരുന്നവരെ ഒക്കെ പരിചയപ്പെടുന്ന തിരക്കിലായിരുന്നു ബാലകൃഷ്ണൻ.

അപ്പു സ്കൂളൊക്കെ ഒന്ന് ചുറ്റി നടന്ന് കാണാൻ തീരുമാനിച്ചു.

 

അച്ഛനോട് പറഞ്ഞ് അവൻ സ്റ്റാഫ്‌ റൂമിൽ നിന്ന് പുറത്തേക്കിറങ്ങി.

 

അത്യാവശ്യം വലിയ ഒരു ഗവണ്മെന്റ് സ്കൂൾ ആണ് ആലത്തൂരിലെത്. അവിടെ പത്താം ക്ലാസ്സ്‌ വരെ ഒരു ബ്ലോക്കും +1,+2 റോഡിന് അപ്പുറത്തായി മറ്റൊരു ബ്ലോക്കും ആയിട്ടാണ്.

 

+2 ബ്ലോക്കിൽ കുറച്ച് വിദ്യാർഥികൾ ഉണ്ട്. അവർക്ക് ഒൻപതരക്ക് ആണ് ക്ലാസ്സ്‌. +1 അഡ്മിഷൻ സമയം ആകാത്തത് കൊണ്ട് കുട്ടികൾ കുറവാണ്.

അവൻ കാഴ്ചകൾ കണ്ട് നടന്നു.

 

ഹൈസ്കൂൾ ബ്ലോക്കിന് നടുവിലായി വലിയൊരു മാവ് ഉണ്ട്. അതിന് ഒരു തറ കെട്ടി സംസാക്ഷിച്ചിട്ടുണ്ട്.

 

അതിന് കുറച്ച് മാറിയാണ് സ്റ്റേജ്. സ്റ്റേജിന്റെ മുൻവശം ഷീറ്റ് കൊണ്ട് ഒരു മേൽക്കൂര നിർമിച്ചിട്ടുണ്ട്. അതിന്വേണ്ടി മാവിന്റെ കുറച്ച് കൊമ്പ് വെട്ടിയിട്ടുണ്ട്.

 

ആ മാവിന് ചുറ്റും ആയിട്ടാണ് സ്കൂൾ കെട്ടിടം. കിഴക്ക് വശത്ത് ഗേറ്റ്. അതിന് ഇരുവശത്തായി ഓഫീസ് കെട്ടിടവും വലിയൊരു ഹാളും.

 

പടിഞ്ഞാറു ഭാഗത്ത്‌ നീളത്തിൽ സ്റ്റാഫ്‌ റൂം അടങ്ങുന്ന കെട്ടിടം. ക്ലാസ്സ്‌ മുറികൾ ഒക്കെ നീളത്തിൽ ഉള്ള കെട്ടിടങ്ങളിലാണ് പ്രവർത്തിക്കുന്നത്.

 

ഓഫീസ് കെട്ടിടം കോൺക്രീറ്റ് ആണ്. ഹാൾ ഷീറ്റും. ബാക്കി കെട്ടിടം ഒക്കെ ഓടുമേഞ്ഞതാണ്.

 

അപ്പു കാഴ്ചയൊക്കെ കണ്ട് നടക്കുമ്പോൾ ആണ് ശ്രീനിവാസന്റെ കയ്യും പിടിച്ച് ദേവു അങ്ങോട്ടേക്ക് വരുന്നത്.

 

അവൻ അവരെ കണ്ട് പുഞ്ചിരിച്ചു.

 

ശ്രീനിവാസൻ നേരെ അവന്റെ അടുത്തേക്ക് വന്നു.

 

” എന്തിനാ അഖിലേ ഇത്ര നേരത്തേ വന്നേ.?”

അയാൾ പുഞ്ചിരിച്ചു കൊണ്ട് അവനോട് ചോദിച്ചു.

 

” അച്ഛന്റെ കൂടെ വന്നതാ അങ്കിൾ. ആദ്യദിവസം തന്നെ വൈകണ്ടല്ലോ ”

അവനും പുഞ്ചിരിയോടെ മറുപടി പറഞ്ഞു.

 

” നാളെ മുതൽ ദേവൂട്ടിടെ കൂടെ വന്നോട്ടോ. മിണ്ടീം പറഞ്ഞും നടക്കാൻ ഒരാളാവുല്ലോ.  ഞാൻ ഇന്ന് കുറച്ച് വൈകിപ്പോയി. അതാ ഇവളെന്റെ ഒന്നിച്ചിങ്ങു പോന്നത്. ”