😈 Guardian Ghost 😈 P-5 ༆ കർണൻ(rahul)༆ 421

കണ്ണുകൾ നിറയുന്നത് ആരും കാണാതിരിക്കാൻ തല താഴ്ത്തി തന്നെ നടന്നു. ആ നടത്തം ചെന്ന് അവസാനിച്ചത് എന്റെ പെണ്ണിന്റെ മുന്നിൽ ആണ്. എന്റെ നനു – നാൻസി മേരി കടുവാകാട്ടിൽ. കടുവാകാട്ടിൽ സ്റ്റീഫന്റെയും മേരിയുടെയും രണ്ടാമത്തെ സന്താനം. പറഞ്ഞു വരുമ്പോൾ നമ്മുടെ സജിയുടെ സ്വന്തം പെങ്ങളായിട്ട് വരും.

അവൾ കാര്യങ്ങൾ ഒക്കെ അറിഞ്ഞിരുന്നു. അത് അവളുടെ മുഖത്ത് നിന്ന് തന്നെ വായിച്ചെടുക്കാവുന്നതേ ഉള്ളു. അല്ലേലും സ്വന്തം കാമുകൻ വേറൊരുത്തിയെ പിഴപ്പിച്ചേച്ച് വരുവാണെന്ന് അറിഞ്ഞാൽ ആനയും അംബാരിയും വച്ചൊന്നും സ്വീകരിക്കില്ലെന്ന് അറിയാമെങ്കിലും.

എന്നെ സ്നേഹിക്കുന്നതായി ഈ മണ്ണിൽ ഇപ്പോ അവശേഷിക്കുന്നത് എന്റെ കുഞ്ഞിയും നനുവും മാത്രമാണ്.

അപ്പോൾ പോകുമ്പോ രണ്ടുപേരോടും യാത്ര പറയണമല്ലോ. അങ്ങനെ ഒരു യാത്ര പറച്ചിൽ തന്നെയായിരുന്നു എന്റെ ഉദ്ദേശം.

നനു….. ഡി…. ഞാനൊന്നും…….

വേണ്ട ഒന്നും പറയണ്ട. എനിക്കൊന്നും കേൾക്കുകയും വേണ്ട. ഞാൻ എന്റെ ഭാഗം പറയാൻ തുടങ്ങിയപ്പോൾ തന്നെ ഇടയ്ക്ക് കയറി എന്നെ തടഞ്ഞുകൊണ്ട് അവൾ പറഞ്ഞു.

ഇപ്പോ എന്താ മോന്റെ ഉദ്ദേശം? യാത്ര പറച്ചിൽ ആണോ? അവൾ അറുത്ത് മുറിച്ച് ചോദിച്ചു.

ദേഷ്യം വന്നാൽ അവൾ അല്ലേലും ഇങ്ങനാ.

ഞാൻ ഇനി ഇവിടെ എന്തിനാ? വീട്ടുകാർക്ക് വേണ്ട നാട്ടുകാരുടെ മുന്നിൽ പെണ്ണ് പിടിയൻ. ഇപ്പോ നീയും….

ഞാനും…? ഞാൻ പകുതിക്ക് പറഞ്ഞു നിർത്തിയപ്പോ അവൾ ചോദ്യ ഭാവേന എന്നെ നോക്കി.

എന്നെ വിശ്വസിക്കാൻ ഒന്ന് കേൾക്കാൻ ആരുമില്ലാതിടത്ത് ഞാൻ എന്തിനാ? ഈ മണ്ണിൽ ആണ് ഞാൻ സ്നേഹിച്ചവർ ഒക്കെ ഉള്ളത്. എന്നെ ഏറ്റവും കൂടുതൽ മനസ്സിലാക്കിയിട്ടുള്ളവർ എന്ന് ഞാൻ കരുതിയിരുന്നവർ ഒക്കെ എന്നെ തള്ളിപറഞ്ഞു. ഇനി ഞാൻ ഇവിടെ എന്തിനാ? നിന്നോട് കൂടെ പറഞ്ഞിട്ട് പോകാം എന്ന് കരുതി. നനു ഞാൻ പോകുവാ നിനക്ക് നല്ലൊരു ലൈഫ് കിട്ടും. ഞാൻ അവളെ നോക്കി തോറ്റവന്റെ പുഞ്ചിരി നൽകി.

അവളുടെ മുഖം കോപത്താൽ വലിഞ്ഞു മുറുകി. കരണം തീർത്ത് ഒരു അടിയായിരുന്നു അവളുടെ മറുപടി.

ഇതെന്തിനാണെന്ന് മനസ്സിലായോടാ? അവൾ ദേഷ്യത്തിൽ ചോദിച്ചു.

ഒരുത്തിയെ പിഴപ്പിച്ചിട്ട് നിന്നെ സ്നേഹിച്ച് വഞ്ചിച്ചതിനല്ലേ? ഞാൻ പുഞ്ചിരിയോടെ തന്നെ ചോദിച്ചു.

അവളുടെ മുഖം വീണ്ടും കോപത്താൽ ജ്വലിച്ചു. വീണ്ടും പൊട്ടി ഒന്നൂടെ എന്റെ കരണത്ത്. ആ അടിയുടെ ചൂട് മാറും മുൻപ് തന്നെ എന്റെ കോളറിനു പിടിച്ചു അടുപ്പിച്ച് അവൾ എന്റെ അധരങ്ങൾ സ്വന്തമാക്കി. കണ്ണുനീരിന്റെ ഉപ്പ് രുചി അറിഞ്ഞൊരു ചുംബനം.

അത് കഴിഞ്ഞപ്പോൾ അവൾ ഏങ്ങി കരയുകയായിരുന്നു.

എന്നെ…. എന്നെ അത്രേ മനസ്സിലാക്കിയിട്ടുള്ളോ മിഖാ? അവൾ നിറകണ്ണുകളോടെ ചോദിച്ചു. അവളുടെ ചോദ്യത്തിന് എന്റെ പക്കൽ മറുപടി ഉണ്ടായിരുന്നില്ല അപരാധം ചെയ്തവനെപ്പോലെ എന്റെ തല താണുപോയി.

അവൾ എന്റെ രണ്ടു കവിളിനും കൈവച്ച് എന്റെ കണ്ണുകളിലേക്ക് നോക്കി.

നിന്നെ എനിക്കറിയാം മിഖാ. എന്റെ ചെക്കനെ ഞാൻ മനസ്സിലാക്കാതെ വേറെ ആരു മനസ്സിലാക്കാനാ? അപ്പൻ നമ്മുടെ കല്യാണം നടക്കില്ലെന്ന പറയുന്നെ. പക്ഷെ നിന്റെ നനുവിന്റെ കഴുത്തിൽ ഈ ജന്മത്ത് ഒരു മിന്ന് വീഴുന്നുണ്ടെങ്കിൽ അത് എന്റെ മിഖ കെട്ടുന്നതാകും. ഇനി എനിക്ക് ഒന്നും നോക്കാനില്ല. ഇപ്പോഴെങ്കിൽ ഇപ്പോ നീ ഈ മണ്ണിനോട് വിട പറയുന്നെങ്കിൽ ഈ വലതു കയ്യിൽ എന്റെ ഇടതു കൈ കാണും. അവൾ എന്റെ കണ്ണിൽ നോക്കി അത്രയും പറഞ്ഞു.