?? സ്വയംവരം 01 ?? 2104

ദേഷ്യം ഇല്ലെന്ന് അവൾ പറഞ്ഞെങ്കിലും ഇത് വരെ ഏട്ടാ എന്നു മാത്രം ആരവിനെ വിളിച്ച അവൾ പേര് വിളിച്ചും നീ എന്ന് അഭിസംബോധന ചെയ്തും സംസാരിച്ചപ്പോൾ അവളുടെ ഉള്ളിൽ അവനോട് എത്രത്തോളം ദേഷ്യം ഉണ്ടെന്ന് എനിക്ക് മാത്രമെങ്കിലും തോന്നി..”എനിക്ക് തന്നെ കാണണം ഇന്ദു.. ഒന്ന് നമ്മൾ സംസാരിച്ചാൽ…”

അവനു അത് പൂർത്തിയാക്കാൻ അവസരം നൽകിയില്ല ഇന്ദു….

“ക്ക് കാണണ്ട.. യാള് ഇട്ട മോതിരം തുളസി ചെടീമ്മേ ണ്ട്.. പ്പഴാച്ചാ വന്ന് ട്ത്തോ.. ഞാൻ ഇട്ടത് ന്നേലും ഗുരുവായൂര്മ്പലത്തില് പോവ്മ്പോ നേർച്ച ഇട്ടോ.. ഗുരുവായൂരു കൃഷ്ണന്റെ വിരലിലാ ട്ടേന്നു കര്തി ആശ്വസിച്ചോളാം ഞാൻ.. ”

ബാക്കി കേൾക്കാതെ ഫോൺ കട്ട്‌ ചെയ്തു സ്തംഭിച്ചു നിന്ന എന്റെ കയ്യിൽ വച്ച് തന്നു എന്റെ കണ്ണിലേക്കു ഒന്നു നോക്കി അവൾ തല ഉയർത്തി തന്നെ തിരിഞ്ഞു നടന്നു….

“ന്ത്‌ കാണാനാ നിക്കണേ.. പൊക്കൂടെ ല്ലാർക്കും…”

ഞാനടക്കം ഉള്ള ആബാലവൃന്ദ ജനത്തെ കേൾപ്പിക്കാൻ മാത്രം ഉറക്കെ പുലമ്പി അവൾ അമ്മയുടെ തോളിൽ വീണ്ടും ചാരി ഇരുന്നു…

പക്ഷേ ആ കണ്ണുകൾ ഇടക്കിടെ എന്റെ നേരെ വരുന്നുണ്ട്… ഞാൻ ആണേൽ എങ്ങനെയെങ്കിലും ഇവിടെ നിന്നൊന്ന് രക്ഷപെട്ടാൽ മതി എന്നൊരു ഭാവത്തിലാണ്….

“എന്തായാലും ഇത്രായില്യേ…. ഇനീപ്പോ ഞാനൊരു കാര്യഞ്ചോയ്ച്ച…”

ഏടത്തി പറയുന്നത് കേട്ട് എന്നെ നോക്കിയ ഇന്ദുവിന്റെ മുഖത്ത് ഒരു കുഞ്ഞു പുഞ്ചിരി മിന്നി മാഞ്ഞു…. അതു കണ്ടു എന്റെ മനം കുളിർത്തു…. പക്ഷേ പെട്ടന്ന് തന്നെ അവൾ ഇരുകയ്യും നെറ്റിയിൽ ബലമായി പിടിച്ചു അമ്മയോട് ചേർന്നു…

അടുത്ത നിമിഷം ഇന്ദു അമ്മയിൽ നിന്നും എണീറ്റ് മുറിയിലേക്ക് ഓടി….

അതേസമയം നിത്തു അത് എതിർത്തു കൊണ്ടാവണം എന്തോ ഏട്ടത്തിയുടെ ചെവിയിൽ എന്തോ പറഞ്ഞു… അല്ലേലും കട്ട കമ്പനി ആയിട്ട് കൂടി ഇവളെന്തിനാ എന്നേം ഇന്ദുവിനേം അകറ്റുന്നെ??? എന്തായാലും അവളെ മാറ്റി ഏട്ടത്തി പറഞ്ഞു….

“ഇന്ദൂനെ ല്ലാർക്കും അറിയാം അവ്ടെ.. സ്വന്തം വീട്ട്ലെ കുട്ടി പോല്യാ കണ്ടേക്കണേ ത് വരെ. അട്ക്കളേ വരെ നേരിട്ട് കേറി കയ്യി കിട്ടീത് വാരി തിന്നാൻ മാത്രം ബന്ധണ്ട് ഇവ്ള്ക്ക് അവ്ടെ.. അതോണ്ട് പറയാ.. ആർക്കും എതിര്പ്പില്ല്യാച്ച ന്റെ അനിയൻ കെട്ടും ഇന്ദൂനെ.. മുഹൂർത്തം തെറ്റിയാലും ഇന്ന് തന്നെ… അമ്മാവൻ പറഞ്ഞ പോലെ”

ആരും ഒന്നും മിണ്ടിയില്ലെങ്കിലും മിക്കവരുടെയും മുഖം തെളിഞ്ഞു.. ഉടക്ക് വരുമെന്ന് പ്രതീക്ഷിച്ച വല്യമ്മാവൻ പോലും ആളുടെ പേര് എടുത്തു പറഞ്ഞതിന്റെ ഗമയിൽ മൗനാനുവാദം നൽകി ഞെളിഞ്ഞ് ഇരുന്നു.