?? സ്വയംവരം 01 ?? 2102

പക്ഷെ ആ കണ്ണുകളുടെ അഭൗമ സൗന്ദര്യം ഒന്നുകൂടി കൂടി കരഞ്ഞപ്പോൾ.. അല്ലെങ്കിലും അവളെ കാണാൻ ഏറ്റവും ഭംഗി കരയുമ്പോൾ ആണെന്ന് ആ വിടർന്ന ഉണ്ടകണ്ണുകൾ നോക്കി പലവട്ടം പറഞ്ഞിട്ടുള്ളതാണ് ഞാൻ..

“ന്തിനാടാ ഇവ്ളോട് ഈ ചതി ചെയ്തേ.. ആലോയ്ച്ചു തൊടങ്ങീപ്പോ പറയാര്ന്നില്ലേ.. എന്റെ മോളിന്റെ ജീവിതോം നശിപ്പിച്ചു വന്നു നിക്കണ നിപ്പ് കണ്ടില്ലേ??”

എന്നെ കണ്ടതും നിലത്തു നിന്നെണീറ്റ് എന്റെ നേരെ പായാൻ ആഞ്ഞുകൊണ്ട് അവളുടെ അമ്മ പതം പറഞ്ഞെങ്കിലും അവളുടെ അച്ഛന്റെ ബലമായ പിടുത്തം സ്വതവേ ദുർബ്ബല ആയ അവരെ തടഞ്ഞു നിറുത്തി….

പക്ഷേ എന്റെ ശ്രദ്ധ അപ്പോളും ഇന്ദുവിൽ ആയിരുന്നു…. എന്നെ ഒളികണ്ണാലെ നോക്കുന്ന അവളുടെ മുഖം ചെമന്നു തുടുക്കുന്ന പോലെ…

ഇത് അവരുടെ ഫാമിലി മാറ്റേഴ്സ് എന്ന ഭാവത്തിൽ അകത്തു കയറാതെ ഒഴിഞ്ഞു നിൽക്കുന്നതായി ഭാവിക്കുന്നുണ്ട് ആ വീടിനെ ചുറ്റി നിന്ന വേണ്ടതും വേണ്ടാത്തതുമായ നൂറുകണക്കിന് ബന്ധുജനങ്ങളും നാട്ടുകാരും….

പക്ഷേ ആ ചെവികൾ ഇങ്ങോട്ട് തന്നെ സൂക്ഷ്മതയോടെ കൂർപ്പിച്ചിരിക്കുകയാണെന്ന് അറിയാം….  അന്യന്റെ കുടുംബം നശിക്കുന്നത് കാണാനുള്ള അടങ്ങാത്ത മനുഷ്യന്റെ ത്വര ജനലിലും വാതിലിലും തിക്കു കൂട്ടി.

ലാലേട്ടന്റെ പടം റിലീസിന് രാംദാസിലും രണ്ടാന്തി രാവിലെ ബീവറേജിലും മാത്രേ അത്രയും അച്ചടക്കം കണ്ടിട്ടുള്ളു…. ഉള്ളിൽ നടക്കുന്നത് എന്താന്ന് കാണാൻ ഒരക്ഷരം പോലും വിടാതെ ഒപ്പിയെടുക്കാൻ കാത്തിരിക്കുന്ന നശൂലങ്ങൾ..

ഇന്ന് എന്തായാലും കുമാരേട്ടന്റെ കടയിൽ ചർച്ചാ വിഷയം ഞങ്ങൾ ആവും. നാല് ചായ അയാൾ കൂടുതൽ വിൽക്കും..

അവർക്ക് കണിയായി ഒരുവശത്ത് അവളുടെ വീട്ടുകാരും നാട്ടുകാരും ബന്ധുക്കളും അടക്കം നൂറുകണക്കിന് പേർ…. എതിരെ ഏടത്തിയും ഞാനും നിതയും…. പക്ഷെ അതൊന്നും കോടതിയിൽ ക്രോസ്സ് വിസ്താരം നടത്തി പരിചയമുള്ള എന്റെ വൻമരം എടത്തിയെ കുലുക്കിയില്ല..

അപ്പോളേക്കും ആരോ കൈമാറി കൈമാറി ഒരു കസേര വല്യമ്മാവന്‌ എതിരെ കൊണ്ട് ഇട്ടു..

“നീരജ് ഇരിക്ക്.. ”

ഇന്ദുവിന്റെ അച്ഛൻ അത് പറഞ്ഞപ്പോൾ അത്രയും പേരുടെ മുൻപിൽ ഇരിക്കാൻ ധൈര്യം എനിക്ക് കിട്ടിയില്ല.. പക്ഷെ ഏടത്തി ആ കസേരയിൽ ഇരുന്നു നെഞ്ചും വിരിച്ചു ഉയർന്ന തലയും ആയി… അല്ലേലും ഗർഭിണികൾക്ക് ബസിൽ പോലും സീറ്റ് റിസർവേഷൻ ഉണ്ടല്ലോ..

“മുത്തശ്ശി??”

ആദ്യമായി എന്റെ ശബ്ദം ഉയർന്നത് അത് ചോദിക്കാനാണ്..