❤️ദേവൻ ❤️part 16 [Ijasahammed] 222

എങ്ങോട്ടെന്ന് ചോദിച്ചില്ല … അറിയണമെന്ന് തോന്നിയില്ല….

വേഗം മാറ്റിയിറങ്ങി കൊണ്ട് ഇറങ്ങുമ്പോൾ മനസ്സിൽ സന്തോഷംവീണ്ടും വിരിയുന്നത് ഞാനറിഞ്ഞു….

പ്രതീക്ഷകൾക്ക് വിപരീതമായിട്ടേ ഇത് വരെ എല്ലാം സംഭവിച്ചിട്ടുള്ളൂ… അതുകൊണ്ട് കൂടുതലൊന്നും ചിന്തിച്ചു കൂട്ടാതെ എങ്ങോട്ടെന്ന് അറിയാതെ ഞാൻ ദേവേട്ടന് പിന്നിലായി ഇരുന്നു..

കാറ്റ് രണ്ടുപേരുടെ ശരീരത്തിലും തഴുകിയിറങ്ങി….
കണ്ണാടിയിലേക്കായി നീളുന്ന ആ നോട്ടം കണ്ടിട്ടും ഞാൻ കാണാതെയിരുന്നു…

“നെന്റെ മൂക്കുത്തി എന്ത്യേ…?? ”

ആ ചോദ്യം കേട്ടപ്പോ എന്തുകൊണ്ടോ ഉള്ളിലൊരു സങ്കടം അലതല്ലി…

“ഇന്നലെ മുതൽ ചോദിക്കണം കരുതീതാർന്നു.. പിന്നെ മറന്നു…

എവെടേന്നു നിന്നോടാണ്… ”

പിന്നിലേക്ക് വേഗത്തിൽ കടന്നു പൊയ്ക്കൊണ്ടിരുന്ന കാറ്റിൽ അലിയാതിരിക്കാൻ ശബ്ദം അല്പം ഉയർത്തി ചോദിച്ചു…

“ഒന്നൂല്ലാ…. ഇന്നലെ ഊരിവച്ചു… ”

താഴേക്ക് നോക്കി കൊണ്ട് ഒരു ഭാവഭേദവുമില്ലാതെ ഞാൻ പറഞ്ഞു നിർത്തി…

വീണ്ടും പരന്ന നിശബ്ദതക്കൊടുവിൽ ദേവേട്ടൻ തലചെരിച്ചുകൊണ്ട് മുഖത്തേക്ക് നോക്കി പതിയെ ചോദിച്ചു…

“അതാ ചോദിച്ചേ എന്തേന്ന്….? ”

ആ ചോദ്യം അത്രമേൽ ശാന്തമായിരുന്നു….

പതിയെ ഒരു കൈ കൊണ്ട് മടിയിൽ വച്ചിരുന്ന എന്റെ ഇടതു കൈ വലിച്ചുഏട്ടനിലേക്ക് അടുപ്പിച്ചു അരയിലൂടെ
ചുറ്റിച്ചു നിർത്തി..

അൽപനേരത്തിനു ശേഷം മറുപടിയൊന്നും എന്നിൽനിന്ന് ഉണരാഞ്ഞത് കാരണമാവാം ഒരു അസ്ത്രം കണക്കെ നെഞ്ചിലേക്ക് തറഞ്ഞു നിക്കാൻ പാകത്തിന് ആ വാക്കുകളെ ദേവേട്ടൻ സ്വതന്ത്രമാക്കിയത്..

“മടുത്തു തൊടങ്ങിയോ പെണ്ണെ ന്നേ…? ”

ഒന്നും മിണ്ടിയില്ല…

ഇടത്തെ കൈ അരയിലൂടെ അപ്പോഴും ഏട്ടൻ ചേർത്ത് പിടിച്ചിരുന്നു…

“വേണ്ടീർന്നിലാ തോന്നണ് ണ്ടോ നെനക്ക്…? ”
ഈ ജീവിതം മടുത്തൂന്നു തോന്നണ അന്ന് പടിയിറങ്ങാ…