❤️ദേവൻ ❤️part 16 [Ijasahammed] 222

കട്ടിലിൽ കിടന്ന് എന്നെ കമിഴ്ന്നുകിടന്നു നോക്കുന്ന ദേവട്ടനെ ആ നീളൻ കണ്ണാടിയിലൂടെ ഞാൻ കണ്ടു…

രണ്ട് കണ്ണിലും കണ്മഷി വലിച്ചെഴുതി തിരിഞ്ഞു നോക്കാൻ തലതിരിച്ചപ്പോഴേക്കും ചാടിഎഴുന്നേറ്റുകൊണ്ട് വാതിൽക്കലേക്ക് നടന്നിരുന്നു…

ചായക്ക്‌ പകരം രാവിലെതന്നെ സിഗരറ്റിന്റെ പുകശ്വസിച്ചുകൊണ്ട് ഉമ്മറത്തിരിക്കുന്ന ദേവേട്ടനടുത്തായി ചൂടുള്ള ചായഗ്ലാസ്‌ വെച്ചുകൊണ്ട് ഞാൻ തിരിഞ്ഞു നടന്നു…

ദേവേട്ടന്റെ ഓരോ ശീലങ്ങളും അറിഞ്ഞുതുടങ്ങുന്നു…
പണ്ടേ മുതൽക്കുള്ള പലശീലങ്ങളും മാറി പുതുപുതിയ ശീലങ്ങളെ ജീവിതത്തിലേക്ക് കയറ്റിനിർത്തിയിരിക്കുന്നു…

ഒരു ദീർഘനിശ്വാസത്തോടെ അടുക്കളയിലേക്ക് നടന്നു…

പ്രാതലിന് മേശമേൽ ചില്ലു പാത്രത്തിൽ അടുക്കിവച്ച ദോശ പാത്രത്തിലേക്ക് ഇട്ടുകൊണ്ട് അടുത്തിരിക്കാതെ ഉമ്മറത്തേക്കായി നടന്ന ദേവേട്ടനെ ഞാൻ നോക്കി യാതൊരുവിധ അസ്വസ്ഥതകളും മനസ്സിൽ തോന്നിയില്ല….

അടുത്തിരിക്കാഞ്ഞതിൽ മനസ്സ് നൊന്തില്ല…

നേരം ഇത്രയായിട്ട് ഒരു വാക്ക് എന്നോടായി മിണ്ടാഞ്ഞതിലും നൊമ്പരം തോന്നിയില്ല…

അത്ഭുതം തോന്നി…

ഇന്നലെ വരെയുള്ള ദേവേട്ടന്റെ ഓരോ പെരുമാറ്റത്തിലും ഒരു ചില്ലുപാത്രം കണക്കെ പൊട്ടിചിതറാൻ വെമ്പി നിൽക്കുന്ന മനസ്സിന് പോലും ശീലമായികഴിഞ്ഞിരിക്കുന്നു…

ഈ അകൽച്ച, അടുത്തിരുന്നിട്ടും ഒരുപാട് അകലങ്ങളിലാണെന്ന് എന്നെ വീണ്ടും വീണ്ടും ഓർമിപ്പിക്കുന്ന ഈ പ്രവർത്തികൾ ശീലമായി കഴിഞ്ഞിരിക്കുന്നു…

ഒരു ദീർഘനിശ്വാസം മാത്രമേ ഉള്ളിലവശേഷിക്കുന്നുള്ളൂ….

ദിവസങ്ങൾ കഴിയുംതോറും ഞാൻ അറിഞ്ഞു, കൂടെയുണ്ടായിട്ടും അത്രമേൽ അനുഭവിക്കുന്ന ഒറ്റപ്പെടലിന്റെ വേദന….

തനിച്ചാക്കി എങ്ങോട്ടെന്ന് പോലും പറയാതെയുള്ള ഇറങ്ങിപോക്ക്…

തിരിച്ചു വരുവോളം ഉണ്ടാകുന്ന
ഉള്ളിലെ ആളുന്ന തീ കെടുത്തികൊണ്ടുള്ള കടന്ന് വരവ്..

എല്ലാം ശീലമായി കൊണ്ടിരുന്നു….