രുധിരാഖ്യം -8 [ചെമ്പരത്തി] 364

ഇന്ദുവിനെ അത്ഭുതപ്പെടുത്തികൊണ്ട് വെള്ളം പതിയെ പുകപോലെ ആയി മുകളിലേക്കുയർന്നു അന്തരീക്ഷത്തിൽ മറഞ്ഞു. ഒപ്പം അവന്റെ വിരലിലെ  തിളക്കവും.

വീണ്ടും അധികസമയം അവിടെ പാഴാക്കാതെ ഏഥൻ അവളെയും വിളിച്ചു മുന്നോട്ടേക്ക് നടന്നു. അവൻ ഓരോ അടിയും സൂക്ഷ്മമായി നിരീക്ഷിച്ചു കൊണ്ടാണ് മുൻപോട്ടു നടന്നതെങ്കിൽ ഇന്ദു പക്ഷേ അലസ ഭാവത്തിലായിരുന്നു.

പെട്ടന്ന് എന്തോ കാഴ്ച കണ്ടു ഒന്ന് ഞെട്ടിയ ഏഥൻ ദൂരേക്ക് എന്തോ ഒന്ന് ചൂണ്ടിക്കാട്ടി അവളെ തട്ടിവിളിച്ചു.

“ഇന്ദു………അവിടെ…… നോക്ക്‌… അതാണ് ഔറിയ ചെർവോറ്യം…..”

അങ്ങ് ദൂരെ താഴ്‌വാരത്തിൽ ഒരു സ്വർണ്ണ തിളക്കം കണ്ട ഏഥൻ ആവേശത്തോടെ അവളെ വിളിച്ചു കൊണ്ട് അങ്ങോട്ടേക്ക് കൈചൂണ്ടി.

” അതെന്താ….?? ആ പേര് പറഞ്ഞ സാധനം….??

മുട്ടുമടക്കി ഒരു പാറക്കല്ലിന്റെ പിന്നിൽ നിന്നിരുന്ന അവന്റെ തോളിലേക്ക് താടിത്തുമ്പ് മുട്ടിച്ചു കൊണ്ട് അലസമായി അവൾ അവന്റെ ചെവിയോരം ചോദിച്ചു.

“ഇന്ദു…. ടീ….. അത്…അതാണ് സ്വർണ്ണമാൻ…. രുധിരാഖ്യത്തിന് അടുത്തേക്കുള്ള വഴി കാണിക്കാൻ അതിനു കഴിയും…. അത് പോകുന്ന വഴിയെ നമ്മൾക്കും പോകണം..”



ആവേശം കയറി അല്പം ഉച്ചത്തിൽ ആയിരുന്നു അവന്റെ സംസാരം.

അത്ര നേരം അലസമായി നിന്നിരുന്ന  അവൾ രുധിരാഖ്യം എന്ന് കേട്ടതോടെ ചെവി കൂർപ്പിച്ച് ശ്രദ്ധ അവനിലേക്ക് ഏകീകരിച്ചു.

അടുത്ത നിമിഷം അവൻ ഇന്ദുവിന്റെ കയ്യിൽ തന്റെ കൈ കൈകോർത്തുപിടിച്ച് അവളെയും വലിച്ച്, അല്പം കുനിഞ്ഞ് മുന്നോട്ടേക്ക് പാഞ്ഞു.

അവന്റെ വേഗതയ്ക്ക് ഒപ്പമെത്താൻ അവൾ നന്നേ പാടുപെടുന്നുണ്ടായിരുന്നു.