മാന്ത്രികലോകം 13 [Cyril] 2157

പെട്ടന്ന് ഞങ്ങൾക്ക് ചുറ്റും അന്തരീക്ഷം ക്ഷോഭിച്ചത് പോലെ ഞങ്ങൾ എല്ലാവർക്കും അനുഭവപ്പെട്ടു… ഏതോ ഒരു വന്‍ ശക്തി ഞങ്ങൾ എല്ലാവരുടെയും ഊര്‍ജ്ജത്തെ ഹൃദയത്തിൽ നിന്നും ചോര്‍ത്തുന്നത് പോലെ അനുഭവപ്പെട്ടു…

“അൽദീയ…!” ഷൈദ്രസ്തൈന്യ പതിഞ്ഞ ശബ്ദത്തില്‍ പറഞ്ഞു.

ഞങ്ങൾ എല്ലാവരും ചുറ്റിലും നോക്കി.

ഷൈദ്രസ്തൈന്യ യുടെ നോട്ടം പതിഞ്ഞിരുന്ന ആ കേന്ദ്രബിന്ദുവിൽ ഞങ്ങളുടെ മിഴിയും നീണ്ടു ചെന്നതും, അൽദീയ അവിടെ പ്രത്യക്ഷപ്പെട്ടു.

“പ്രതിമ……….. അൽദീയ…..!!” ഞാൻ ഉറക്കെ പറഞ്ഞു.

“ദനീർ…”

അൽദീയ ഒരു നേര്‍ത്ത പുഞ്ചിരിയോടെ പറഞ്ഞ ശേഷം ഷൈദ്രസ്തൈന്യയെ നോക്കി…

“അൽദീയ…!!” ഷൈദ്രസ്തൈന്യ ചെറിയ ആശ്വാസത്തോടെ പറഞ്ഞു.

“ഫ്രെന്നിനോട് നി ചോദിച്ചത് പ്രസക്തിയറ്റ ചോദ്യമായിരുന്നു, ഷൈദ്രസ്തൈന്യ…”

അത്രയും പറഞ്ഞിട്ട് അൽദീയ നടന്ന് ഷൈദ്രസ്തൈന്യയുടെ മുന്നില്‍ പോയി നിന്നു. എന്നിട്ട് അവരെ ആലിംഗനം ചെയ്തു.

കുറച്ച് കഴിഞ്ഞ് അവർ അകന്നു മാറിയതും ഷൈദ്രസ്തൈന്യ ചോദ്യ ഭാവത്തില്‍ അൽദീയയെ നോക്കി.

“ഇവിടെ എന്താണ് സംഭവിച്ചത്..? ഫ്രെന്നിന്റെ ഇത്തരത്തിലുള്ള പെരുമാറ്റത്തിന്‍റെ കാരണം എന്താണ്…? പെട്ടന്നു ഒരു കാരണവും ഇല്ലാതെ അവർ എല്ലാവരെയും വെറുപ്പോടെ നോക്കി.. എന്തൊക്കെയോ പറഞ്ഞു… അപ്രത്യക്ഷനായി. ഇതിനെല്ലാം എന്താണ് അര്‍ത്ഥം…?” ഷൈദ്രസ്തൈന്യ ചിന്താകുഴപ്പത്തോടെ ചോദിച്ചു.

ഒരു നിമിഷം അൽദീയയുടെ മുഖത്ത് നിസ്സഹായത മിന്നിമറഞ്ഞു…. എന്നിട്ട് സങ്കടവും വേദനയും ഒരുപോലെ അവരുടെ മുഖത്ത് നിറഞ്ഞു.

“ഫ്രെൻ എങ്ങോട്ടാണ് പോയത്, അൽദീയ..? ഒഷേദ്രസിന്റെ പിടിയിലാണോ ഫ്രെൻ…?” ഷൈദ്രസ്തൈന്യ ദേഷ്യത്തില്‍ ചോദിച്ചു. “അവനില്‍ എന്തൊക്കെയോ മാറ്റങ്ങൾ സംഭവിച്ചിരിക്കുന്നു എന്നുമാത്രം അറിയാം… പക്ഷേ ഇങ്ങനെ പെട്ടന്നുള്ള അവന്റെ മാറ്റത്തിന്‌ എന്താണ് കാരണം…?”

“നീ പറഞ്ഞത് ശെരിയാണ്. അവനില്‍ മാറ്റങ്ങൾ സംഭവിച്ചിരിക്കുന്നു…” അൽദീയ പറഞ്ഞു.

“ഫ്രെന്നിനെ വിശ്വസിക്കരുതെന്നു ഞങ്ങളോട് പറയാനുള്ള കാരണം എന്താണ്…?” സാഷ ദേഷ്യത്തില്‍ ചോദിച്ചു.

“അതിന് തക്കതായ കാരണങ്ങള്‍ ഉണ്ട്, സാഷ. എല്ലാം ഞാൻ വെളിപ്പെടുത്താം…” അൽദീയ അലിവോടെ പറഞ്ഞു.

“ഫ്രെന്നോടുള്ള എന്റെ ചോദ്യത്തിന് പ്രസക്തിയില്ലെന്ന് പറഞ്ഞു… എന്താണ് കാരണം…?” ഷൈദ്രസ്തൈന്യ മുഖം ചുളിച്ചു കൊണ്ട് ചോദിച്ചു.

പെട്ടന്നു അൽദീയയുടെ കണ്ണുകളില്‍ ഗൗരവം നിറഞ്ഞു.