നിർഭയം 7

Nirbhayam 7 | Author : AK | Previous Part

 
കണ്ണുകൾ പതിയെ തുറന്നപ്പോൾ നന്ദന് ഒരു മന്ദത തന്നെ ആയിരുന്നു അനുഭവപ്പെട്ടിരുന്നത്… തനിക്കെന്താണ് സംഭവിച്ചതെന്ന് ഒരിക്കൽ കൂടി ഓർത്തെടുക്കാൻ അവൻ ഒരു ശ്രമം നടത്തി നോക്കി.. വിവേകിനെ കണ്ട് മടങ്ങി പോവുമ്പോൾ പോലും എപ്പോഴും അപകടം പ്രതീക്ഷിച്ചു കൊണ്ടിരിക്കുന്ന താൻ എന്തിനു ശബ്ദം കേട്ട ഭാഗത്തു വണ്ടി നിർത്തിയത്… ചിലപ്പോൾ ഒരുപക്ഷെ താൻ കാരണം മറ്റൊരു ജീവൻ നഷ്ടപ്പെടരുത് എന്നു കരുതി എടുത്തു ചാടിയതാണ്… അപ്പോഴായിരുന്നു തലയിൽ എന്തോ വന്നടിച്ചത്… അത്‌ കഷ്ടി മാത്രം ഓർമയുണ്ട്.. അപകടം കൂടെ തന്നെ ഉണ്ടെന്ന് മഞ്ജു മാഡവും ഓർമിപ്പിച്ചതാണ്… അതൊന്നും വീവിയോട് പറയാതിരുന്നത് അവന്റെ എടുത്തുചാട്ടം കൊണ്ടാണ്… എന്തെന്നോ ഏതെന്നോ നോക്കാതെ കേറി പെരുമാറരുതെന്ന് പല തവണ അവനെ വിലക്കാൻ ശ്രമിച്ചിട്ടുണ്ടെങ്കിലും അത്‌ സാധാരണ വെള്ളത്തിൽ വരച്ച വരയാവാറാണ് പതിവ്… വുമൺ ട്രാഫിക്കിങ് കേസിൽ അന്നത്തെ സംഭവത്തിൽ വീവിയുടെ പങ്ക് ആരും അറിയരുതെന്ന് മഞ്ജു മാഡത്തിന് നിർബന്ധമുണ്ടായിരുന്നു.. തന്നെ വിലക്കിയപ്പോൾ പോലും പല കാര്യങ്ങൾക്കായി മഞ്ജു മാഡത്തിനെ ബന്ധപ്പെടേണ്ടതായി വന്നു… അതിൽ ഏറ്റവും പ്രധാനം ഗ്രീഷ്മയുടെ ഫാമിലിയുടെ സുരക്ഷ ഉറപ്പുവരുത്തുന്നതിനു മുന്നിട്ടിറങ്ങിയതായിരുന്നു… അവളുടെ അച്ഛന്റെ കടത്തിന്റെ കള്ളക്കണക്കുകൾ ബോധ്യപ്പെടുത്താനും അവൾ സുരക്ഷിതയാണെന്ന് ഓര്മപ്പെടുത്താനും ഇറങ്ങിയ തന്നെ തേടി ഇതിനോടകം തന്നെ എതിരാളികൾ കരുക്കൾ നീക്കികാണുമെന്ന് മാഡം സൂചിപ്പിച്ചിരുന്നു…

തലക്ക് വല്ലാത്ത ഒരു വേദനപോലെ… താനിപ്പോൾ എവിടെയാണെന്ന് പോലും മനസ്സിലാവുന്നില്ല… കുറച്ചു അകലെയായി രണ്ടുപേര് നിൽക്കുന്നുണ്ട്… അപ്പോൾ മരിച്ചിട്ടില്ല… അവരുടെ സംസാരത്തിലേക്ക് മെല്ലെ കാത്തുകൂർപ്പിച്ചു കൊണ്ട് കണ്ണുകളടച്ചു കൊണ്ട് തന്നെ അവൻ കിടന്നു…