നിയോഗം 3The Fate Of Angels PartXI(മാലാഖയുടെ കാമുകൻ) 2610

പുല്ലുകൾ വളർന്ന വഴിയിൽ ഇടക്ക് മാത്രം പോകുന്ന വണ്ടികളുടെ പാടുകൾ ഉണ്ടായിരുന്നു.. ആക്റ്റീവ് ആയ റോഡ് ആണെന്ന് അർഥം..

അവൻ കുറച്ചു കൂടെ അകത്തേക്ക് ചെന്ന് വണ്ടി ഒരു കുറ്റിക്കാട്ടിൽ മറവിൽ കയറ്റി ഇട്ടു.. ആരും കാണില്ല എന്ന് ഉറപ്പ് വരുത്തി..

“പോകാം..”

അവർ മെല്ലെ ആ വഴിയേ നടന്നു..

പെട്ടെന്ന് പുറകിൽ വലിയൊരു ഇരമ്പൽ കേട്ടു.. അവർ പതുങ്ങി ഇരുന്നു തല എത്തിച്ചു നോക്കി.. ഒരു വലിയ ലോറി ആയിരുന്നു അത്..

“റോഷൻ..”

അവൾ അത് വിളിച്ച ഉടനെ പാസ് ചെയ്തു പോയ ലോറിയുടെ പുറകിൽ ചാടി കയറി..

റോഷനും പുറകെ ഓടി അതിന്റെ ഒരു കൊളുത്തിൽ പിടിച്ചു ചാടി ഉള്ളിലേക്ക് കയറി.. ശബ്ദം ഇല്ലാതെ..

പടുത കൊണ്ട് പുറകു മറച്ച ആർമി ട്രക്ക് പോലെ ഒരു ലോറി ആയിരുന്നു അത്.. അകത്തേക്ക് കയറിയ ലിസ അമ്പരന്ന് നിന്നത് കണ്ടപ്പോൾ ആണ് റോഷനും തിരിഞ്ഞത്.. അകത്ത് ഒരു ലൈറ്റ് കത്തി കിടക്കുന്നു.

പതിനഞ്ചോളം പെൺകുട്ടികളെ വണ്ടിയുടെ പുറകിൽ കെട്ടിയിട്ടിരിക്കുന്നു.. അവർക്ക് കാവൽ നിന്ന കറുത്ത വേഷധാരി ആയ രണ്ടുപേര്.. അവരുടെ കയ്യിൽ എകെ 47 മെഷീൻ ഗൺ..

ഒരാൾ ഗൺ ലിസക്ക് നേരെ നീട്ടിയതും അവൾ വേഗത്തിൽ ചാടി കറങ്ങി കാലു വീശി അടിച്ചു ഗൺ തെറിപ്പിച്ചു.. അതോടൊപ്പം നിലത്തു നിന്ന അവളുടെ ഇടത്തെ കാൽ നേരെ മുകളിലേക്ക് കയറി അവന്റെ താടിയുടെ എല്ലു തകർത്തു കളഞ്ഞു..

അപ്പോഴേക്കും റോഷന്റെ ശക്തനായ പഞ്ച് മറ്റേയാളുടെ നെഞ്ച് തകർത്തിരുന്നു..

രണ്ടു പേരും അവർ നിലത്തുവീഴാതെ പിടിച്ചു വച്ച് മെല്ലെ കിടത്തി.. ഇതൊക്കെ നിമിഷ നേരംകൊണ്ട് കഴിഞ്ഞു..

ലിസ ഒരു കുട്ടിയുടെ അടുത്തേക്ക് ചെന്നു.. അവൾ ലിസയെ കണ്ടു കരയാൻ തുടങ്ങി..

“ചേച്ചി, പേടിയാകുന്നു.. ഒന്ന് അഴിച്ചു വിട് ചേച്ചി.. അമ്മ എന്നെകാണാതെ വിഷമിക്കും ചേച്ചി….”