താമര മോതിരം – ഭാഗം -16- ഡ്രാഗൺ 388

                               നമഃശിവായ നമഃശിവായ നമഃശിവായ

വൈകുന്നേരം അഞ്ചുമണിയോട് കൂടി ആണ് കണ്ണൻ പിന്നീട് ആ മുറിക്കുള്ളിൽ നിന്ന് പുറത്തേക്കു ഇറങ്ങിയത്,

കുളിച്ചു – വൃത്തിയായി – മുണ്ടും – ഒരു മേൽമുണ്ടും മാത്രം ആയിരുന്നു വേഷം.

പുറത്തേക്കു ഇറങ്ങിയ കണ്ണൻ തൊടിയിലേക്കു ഇറങ്ങി – അവിടെ ഉണ്ടായിരുന്ന ചെടികളിൽ നിന്നും പൂക്കൾ ശേഖരിച്ചു ഒരു പായ് കുട്ടയിലേക്കു ഇട്ടു കൊണ്ടേ ഇരുന്നു .

സഞ്ജു കാണുമ്പോൾ കണ്ണൻ തൊടിയിൽ നിന്നും പൂക്കൾ പറിക്കുകയായിരുന്നു,

ഉച്ചക്ക് അവന്റെ മുറിയിലേക്കു പോയപ്പോൾ അവൻ കിടന്നു ഉറങ്ങുന്നത് കണ്ടു ശല്യപെടുത്തണ്ട എന്ന് കരുതി തിരികെ വന്നതാണ് – ദാ ഇപ്പോൾ തൊടിയിൽ നിന്നും പൂക്കൾ ശേഖരിക്കുന്നു – ചിലപ്പോൾ വൈകുന്നേരത്തേക്കുള്ള പൂജയ്ക്കു ആകും – എന്നാൽ വൈകുനേരത്തേക്കുള്ള പൂജയ്ക്കുള്ള പൂക്കൾ സാധാരണ വാങ്ങുകയാണ് പതിവ്

ഇപ്പോൾ പൂജകൾ നടക്കുന്നത് കാരണം – എല്ലാ ദിവസവും രാവിലെയും വൈകുന്നേരവും താനോ കണ്ണനോ കവലയിൽ നിന്ന് പൂക്കൾ വാങ്ങി വരാറ് ആണ് പതിവ്

വൈകുനേരം പൂജയ്ക്കുള്ള പൂവുകൾ താൻ വാങ്ങി വച്ചിട്ടുണ്ട്.

അതറിയിക്കുവാൻ ആണ് സഞ്ജു കണ്ണന്റെ അടുക്കലേക്കു പോയത്

അടുത്തെത്തിയപ്പോൾ സഞ്ജു വളരെ വ്യക്തമായി കേട്ടു – കണ്ണൻ ആരോടോ സംസാരിക്കുന്നുണ്ട് – താൻ നിൽക്കുന്ന സ്ഥലം ഏതാണെന്നു പോലും അറിയാത്ത വിധത്തിൽ സ്വബോധം ഇല്ലാതെ ആണ് കണ്ണൻ ഓരോ പ്രവർത്തികൾ ചെയ്യുന്നത്.