ഒരു ksrtc യാത്രയിൽ ❣️[Rabi] 157

ഒരിളം കറുപ്പും ചുവപ്പും കൂടിയുള്ള നിറമില്ലേ.. ആ നിറം..

ചുണ്ടുകൾ പുറത്തേക്ക് കുറച്ചു തള്ളിയിട്ടാണ്..

ചെറിയ മൂക്ക്..

അതിന്റെ തുമ്പു ചുവന്നിട്ടുണ്ടല്ലോ..

കരിമഷിപ്പീലികളുള്ള കണ്ണുകൾ..

ആ പീലികൾ നനഞ്ഞതിനാലാണോ ഒട്ടിയിരിക്കുന്നത്..

അവളുടെ കണ്ണുകളിൽ കണ്ണുനീർ കെട്ടിനിൽപ്പുണ്ട്..

ആ കൃഷ്ണമണിക്കെന്തൊരു കറുപ്പാണ്..!!

ഏറ്റവും ഭംഗിയവളുടെ കണ്ണുകൾക്ക് തന്നെ..

അവൾ കരയുകയാണോ..

ഞാൻ ഇടം കണ്ണിട്ടു നോക്കുന്നതിൽ നിന്നും അതിരുകടന്ന് ചെറുതായി തല ചെരിച്ചു.

അവൾ പെട്ടെന്ന് എന്നെ നോക്കി. ഞാൻ വേറെന്തോ നോക്കിയതുപോലെ തല പതിയെ കറക്കി പൂർവ്വ സ്ഥിതിയിലാക്കി .

അവളുടെ മൂക്കിന് താഴെ ഒരു ചെറിയ കാക്കപ്പുള്ളിയുണ്ട്‌..

എന്തു ഭംഗി..!!

സുബോധവും പരിസരവും മാഞ്ഞു ഞാനൊരു മായാലോകത്തെത്തി.

അവൾ കൈപ്പത്തിയുടെ മറുവശം കൊണ്ട് കവിൾ തുടച്ചു. അവളുടെ കണ്ണുകളിൽ കെട്ടിനിന്ന കണ്ണുനീർ കവിളിലേക്കൊഴുകിയതാണ്..

അവളെന്തിനാണ് കരഞ്ഞത്..

പെട്ടെന്നവൾ നിവർന്നിരുന്നു. മുഖത്തു ഭാവമാറ്റം.. ഗൗരവം..

ധൈര്യത്തോടെയുള്ള മുഖഭാവം..

കണ്ണിൽ തീക്ഷ്‌ണതയേറുന്നു..

കുറച്ചുദൂരം പിന്നിട്ടിട്ടും മഴക്കു ശമനമില്ല . വൈപ്പറടിച്ചുകൊണ്ടിരിക്കുന്നു..