ഒരു ksrtc യാത്രയിൽ ❣️[Rabi] 157

ഞാനൊരു സ്റ്റെപ്പിറങ്ങി കതകുതുറന്നുകൊടുത്തു. അവർ കിതച്ചുകൊണ്ട് കുട്ടിയെയും പിടിച്ചു സ്റ്റെപ്പു കയറി.

ഒരു തെറി പ്രതീക്ഷിച്ചുവെങ്കിലും അവരെന്നെയൊന്നു തുറിച്ചുനോക്കുക പോലും ചെയ്തില്ല!.

ആ രണ്ടു മധ്യവയസ്‌കർ സീറ്റിന്റെ ഇടത്തേയറ്റത്തേക്ക് ആ സ്‌ത്രീക്ക് വിൻഡോ സീറ്റിൽ ഇരിക്കാനെന്നോണം ഒതുങ്ങിക്കൊടുത്തു.

സാരിയായിരുന്നു അവരുടെ വേഷം..

സാരിത്തുമ്പിൽ നിന്നും വെള്ളമിറ്റു വീഴുന്നുണ്ടായിരുന്നു..

കണ്ടാൽ ഒരു 36 വയസുതോന്നും..

തോളിൽ കിടത്തിയിരുന്ന കുഞ്ഞിനെ ഒരു മഞ്ഞ ടർക്കികൊണ്ട് പുതപ്പിച്ചിരുന്നു..

അതെടുത്തുതന്നെ ആ കുഞ്ഞിന്റെ ശിരസു തുവർത്തുകയായിരുന്നു അവർ..

അതൊരു പെൺകുഞ്ഞായിരുന്നു..

തലയുറച്ചിട്ടുണ്ട്..

മൂന്നു മാസത്തിൽ കൂടുതൽ പ്രായം കാണും..

പിന്നെയാ പെൺകുട്ടി.. ഒരൊറ്റയുടുപ്പായിരുന്നു ഇട്ടിരുന്നത്. കുഞ്ഞാവയുടെ തല തുവർത്തിയതിനു ശേഷം അവരാ പെൺകുട്ടിയുടെയും തുവർത്തിയവളെ മടിയിലിരുത്തി..

ഹാ .. എന്റെ സീറ്റുപോയി..

രാത്രി വൈകിയാണ്‌ വീടെത്തുന്നത്‌ തന്നെ.. പിന്നെ തുണി കഴുകലും മറ്റും കഴിഞ്ഞ് ഉറക്കം കണക്കാണ്..

ഈ ബസ്സിലിരുന്നാണ്‌ ഒന്നാസ്വധിച്ചുറങ്ങാറ്..

ഇപ്പോൾ അതും പോയിക്കിട്ടി ..

മുന്നോട്ടു സീറ്റുണ്ടോയെന്നറിയാൻ നടന്നപ്പോൾ ..

സ്ത്രീകളുടെ സീറ്റിൽ ഒരാൾ സ്ഥലം ഒഴിവുകണ്ടു. ഒരു ചെറുപ്പക്കാരിയാണിരിക്കുന്നത്. വേറെ വഴിയില്ലാത്തതിനാൽ അവിടെയിരിക്കാമെന്ന് കരുതി അവളുടെ മുഖത്തേക്കു നോക്കിയപ്പോൾ., അവൾ മുഖം തിരിച്ചു. ഞാനവിടെ തന്നെയിരുന്നു.