ഇവാ, An Angelic Beauty Part 2[മാലാഖയുടെ കാമുകൻ] 1723

അന്ന് പതിവ് പോലെ ഒരുമിച്ചു ഭക്ഷണം കഴിക്കുമ്പോൾ ഇരുവരുടെയും കണ്ണിൽ നിന്നും നീർതുള്ളികൾ താഴേക്ക് പതിച്ചു..

സങ്കടത്തിന്റെ ആയിരുന്നില്ല.. സന്തോഷത്തിന്റെ കണ്ണുനീർ.. ഒറ്റക്ക് ആയിപോയെങ്കിലും തളരാതെ നിന്ന് പോരാടിയതിന്റെ സന്തോഷം..

***

പിറ്റേ ദിവസം ഭദ്ര റോക്കിനെയും കൂട്ടി അവരുടെ പഴയ വീട്ടിലേക്ക് പോയി.. ശിവരഞ്ജിനിയെ കാണാൻ.. ഇതുവരെ അവിടേക്ക് പോയിട്ടില്ലായിരുന്നു.. അവിടുത്തെ ഒരു കാര്യവും അറിവും ഇല്ലായിരുന്നു.

ഗേറ്റ് കടന്നതും അവർ മമ്മയുടെയും പപ്പയുടെയും കല്ലറ കണ്ടു.. അത് പൊളിച്ചിട്ടില്ല.. അവർ അതിന് മുൻപിൽ നിന്നു കരഞ്ഞു..

ഒരു അനക്കവും ഇല്ലായിരുന്നു വീട്ടിൽ..

“ആരും ഇല്ലേ ഇവിടെ..?”

അവൾ വിളിച്ചു ചോദിച്ചു.. വൈകുന്നേരം ആയിരുന്നു അത്. കതക് അടഞ്ഞു കിടന്നിരുന്നു.

“ആരാ..?”

പുറകിൽ നിന്നും ചോദ്യം കേട്ട് അവർ തിരിഞ്ഞു നോക്കി. ശിവരഞ്ജിനിയുടെ മകൾ അനന്യ.. അകെ എല്ലും തോലും ആയ ഒരു രൂപം. മുഷിഞ്ഞ വേഷം..

“ഭദ്രചേച്ചി….!”

അവൾ മെല്ലെ പറഞ്ഞു.. ഭദ്രയും റോക്കും അവളെ അതിശയത്തോടെ നോക്കി..

“മാപ്പ് ചേച്ചി.. എല്ലാത്തിനും മാപ്പ്…”

അവൾ ഓടിവന്നു ഭദ്രയുടെ കാലിൽ വീണപ്പോൾ ഭദ്ര ആകുലതയോടെ അവളെ പിടിച്ചു പൊക്കി.

“എന്താ മോളെ.. നീയെന്താ ഇങ്ങനെ..? നിന്റെ അമ്മയെവിടെ..?”

ഭദ്ര ചോദിച്ച ഉടനെ അവൾ പൊട്ടി പൊട്ടി കരഞ്ഞു.. ഭദ്ര അവളെ ദേഹത്തോട് ചേർത്തുനിർത്തി.. അവൾ കുറെ നേരം കരഞ്ഞു…

അവസാനം കരച്ചിൽ അടങ്ങിയപ്പോൾ അവൾ പറഞ്ഞ കാര്യം കേട്ട് ഭദ്രയും റോക്കും ഞെട്ടിപ്പോയി..