ഇവാ, An Angelic Beauty Part 2[മാലാഖയുടെ കാമുകൻ] 1717

ഒരു എസിപി വന്നു ഓപ്പൺ ചെയ്ത “ചേച്ചിയും അനിയനും തട്ടുകട” ആളുകൾക്കിടയിൽ സംസാരവിഷയം ആയി..

കൂടാതെ ഭദ്രയുടെ കൈപ്പുണ്യം അപാരമായിരുന്നു.. റോക്കും അത്യാവശ്യം പാചകം പഠിച്ചിരുന്നു.

സുന്ദരിയായ ഒരു പെൺകുട്ടിയും അവളുടെ അനിയനും നടത്തുന്ന കട ആയതുകൊണ്ടും ഓട്ടോക്കാർ മുതൽ രാത്രി പോകുന്നവർ ഒക്കെ അവിടേക്ക് വരാൻ തുടങ്ങി..

ആദ്യമൊക്കെ ലാഭം കുറവ് ആയിരുന്നു.. പണിയെടുത്തു ഭദ്രയുടെയും റോക്കിന്റെയും അവസ്ഥ വളരെ മോശമായി. പകൽ ക്ലാസ്സിന് പോകും.. എന്നാലും നന്നായി ഉറങ്ങാൻ പോലും കഴിയുന്നില്ലായിരുന്നു..

വീട്ടിൽ പോയി വേഷം മാറി ഉടനെ കടയിലേക്ക്.. പിന്നെ പാചകം വിളമ്പൽ ക്യാഷ് വാങ്ങൽ എല്ലാം കൊണ്ടും രാത്രി 12 ആകുന്നത് അറിയുക കൂടെ ഇല്ല.. പാർസൽ കൂടെ കൊടുക്കുന്നുണ്ടായിരുന്നു..

“നിന്റെ പേരെന്താ മോളെ..”

ഒരു ദിവസം രാത്രി വന്ന ചില ആണുങ്ങൾ ഭദ്രയുടെ അടുത്ത് നിന്നും മാറാതെ അവളെ ശല്യം ചെയ്തു. കുക്കിംഗ് എല്ലാം വരുന്നവർക്ക് കാണുന്ന രീതിയിൽ ആയിരുന്നു.

“ഭദ്ര..”

അവൾ മറുപടി കൊടുത്തു.. അവന്മാർ അവളെ അടിമുടി നോക്കി.

“ഞങ്ങളുടെ ഒപ്പം പോരുന്നോ? ഇതിലും ഇരട്ടി കൂലി തരാം…”

അത് പറഞ്ഞതും പടക്കം പൊട്ടുമ്പോൾ ഉണ്ടാകുന്ന ശബ്ദം അവിടെ മുഴങ്ങി.. ആളുകൾ ഞെട്ടി നോക്കി.. കരണം പൊത്തി പിടിച്ചു നിൽക്കുന്നവൻ. ഭദ്രയുടെ കൈ അവന്റെ മുഖം പൊള്ളിച്ചിരുന്നു..

“നിന്റെ വീട്ടിലെ സ്വഭാവംകൊണ്ടു ഇവിടേക്ക് വരരുത്. കേട്ടോടാ..?”

ഭദ്ര അവനെ നോക്കി അടുക്കളയിലെ അരിയുന്ന കത്തി എടുത്തു നീട്ടി..

“നിന്റെ കടയും ബിസിനസ്സും തീർക്കുമെടീ ഞാൻ…”

അവൻ അവിടെ കിടന്ന് അലറിയപ്പോൾ ഒരു കൈ അവന്റെ തോളിൽ പതിച്ചു..