ഇത് ഞങ്ങളുടെ ഏരിയാ 3 [മനൂസ്] 2957

രാത്രി അത്താഴത്തിന് മേശക്ക് ചുറ്റും ചപ്പാത്തിയും മുട്ടക്കറിയും തട്ടുമ്പോഴാണ് ജാഷിയുടെ ഈ കുൽസിത പ്രവർത്തി ഫർഹ കണ്ടത്..

 

“അല്ലടി… ഇത്രയും നാളും ഇവന്മാർ തമ്മിൽ അടി കൂടുന്നതിന് അല്ലെ നമ്മൾക്ക് പരാതി..ഇപ്പൊ ഇവന്മാർ ഒരുമിച്ച് മറ്റുള്ളവരെ തല്ലാൻ തുടങ്ങിയില്ലേ..

 

ഒരു വാപ്പക്ക് ഇതിൽപ്പരം സന്തോഷം വേറെ എന്താണ് വേണ്ടത്..

 

ഇനി ഇവന്മാർ ഇടിക്കുന്നവന്മാരുടെ തന്തമാർ അത് തിരിച്ചു എനിക്കിട്ട് തരുമല്ലോ എന്നോർത്തപ്പോൾ ഒരു കുളിര്.. അതോർത്ത് സന്തോഷിച്ചതാ..”

 

ചാപ്പത്തിയെ കോഴിയെ കൊല്ലും പോലെ പിടലിക്ക് ചുരുട്ടി ചാറിൽ മുക്കി വായിലേക്ക് വയ്ക്കുന്ന  പുത്രന്മാരെ നോക്കി അവൻ പറഞ്ഞു..

 

അത് കേട്ടതും ഫർഹയും ചിരിച്ചു പോയി..

 

“ആ എനിക്ക് ഇടി കിട്ടുമെന്ന് ഓർത്തപ്പോൾ നിനക്ക് ചിരി വന്നില്ലേ… ആ ഇതേപോലെ എനിക്കും അതോർത്തപ്പോൾ ചിരി വന്നു…”

 

“ഒന്ന് പോ ഇക്കാ..വേണ്ടത്തത് പറയാതെ ഇരുന്ന് കഴിക്കാൻ നോക്ക്..”

 

ചിരിച്ചത് അബദ്ധമായി എന്ന് തോന്നിയപ്പോൾ കെട്ടിയോൾ സ്നേഹം പ്രകടിപ്പിച്ചു..

 

“ഇനിയാ മുകളിൽ കിടന്നുറങ്ങുന്ന കുരിപ്പ് വലുതാകുമ്പോ ഈ വാപ്പക്ക് എന്തൊക്കെ സമ്മാനങ്ങൾ ആണോ കരുതിയിരിക്കുന്നത്..

 

“ആ മൂന്നും കൂടി എന്നെ ഒരു പരുവം ആക്കും..

 

ഒരു പോളിസി കൂടി എടുക്കേണ്ടി വരും..”

 

ഒരു നെടുവീർപ്പോടെ അവൻ പറഞ്ഞു നിർത്തി..

 

“അതേ… മൂന്ന് അല്ല ചിലപ്പോ നാല് ആകാൻ സാധ്യത ഉണ്ട്..”

 

ചെറു നാണത്തോടെ ഫർഹ അവന്റെ കാതോരം മൊഴിഞ്ഞു…

 

ഒരു ഉൽക്ക തലയിൽ വന്ന് വീണത് പോലെ അവന് തോന്നി…

 

“സത്യം…”

 

വിശ്വാസം വരാത്തപോലെ അവൻ കെട്ടിയോളെ നോക്കി…