ഇത് ഞങ്ങളുടെ ഏരിയാ 3 [മനൂസ്] 2957

 

ഊർജം കിട്ടിയതും തിണ്ണയിൽ തനിക്ക് അരികിലിരിക്കുന്ന കെട്ടിയോളെ അവൻ തനിക്ക് അടുത്തേക്ക് ചേർത്തു..

 

“ദേ ഇക്കാ.. ഇന്നലെ പറഞ്ഞത് ഓർമ്മയില്ലേ..”

 

നാണത്തോടെ അവൾ മൊഴിഞ്ഞു..

 

“ഓഹ് ഒരു മുത്തം തരാൻ പാടില്ലെന്നൊന്നും അന്റെ വല്യുപ്പാപ്പ പറഞ്ഞില്ലല്ലോ..”

 

കണ്ണിറുക്കി അത് പറഞ്ഞു ജാഷി ഫർഹയുടെ മുഖം തന്റെ മുഖത്തേക്ക് അടുപ്പിച്ചു..അവന്റെ ചുണ്ടിന്റെ തൊട്ടടുത്തു എത്തിയപ്പോഴേക്കും അവൾ കണ്ണുകൾ മുറുകെയടച്ചു..

 

ഇരുവരുടെ ശ്വാസഗതി ഒന്നായി..

 

“ഉമ്മാ… എന്റെ ഷർട്ട് എവിടെ..”

 

പൊടുന്നനെ മുറിയിൽ നിന്നും വിളി ഉയർന്നു..

 

ഇരുവരും ഞെട്ടിപ്പിടഞ്ഞു മാറി.. മുട്ടായിക്ക് വേണ്ടി കൊതിയോടെ നിൽക്കുന്ന കുട്ടിയുടെ നിഷ്കളങ്കതയോടെ ജാഷി അവളെ നോക്കി.. പക്ഷെ ഫർഹ അവനെയും തള്ളിമാറ്റി അങ്ങോട്ടേക്ക് പോയി..

 

പൊടുന്നനെ ഉമ്മയുടെ മുറിയിലെ ഫോണിൽ നിന്നും ആ പാട്ട് അവന്റെ കാതുകളിലേക്ക് ഒഴുകിയെത്തി..

 

നഷ്ട സ്വർഗ്ഗങ്ങളെ നിങ്ങളെനിക്കൊരു ദുഃഖാസിംഹാസനം നൽകൂ..

 

ആരോ തനിക്ക്‌വേണ്ടി എഴുതിയ വരികൾ പോലെ ജാഷിക്ക് തോന്നി.. അതും ആസ്വദിച്ചവൻ ആ പടികളിൽ ഇരുന്നു..

 

ചെക്കപ്പ് എല്ലാം കഴിഞ്ഞ് അവർ ഉച്ചയോടെ വീട്ടിൽ എത്തി.. അപ്പോഴേക്കും ഉമ്മ അവർക്കുള്ള ഭക്ഷണം തയ്യാറാക്കിയിരുന്നു..

 

വീട് ഒരു സന്തോഷത്തെ വരവേൽക്കാൻ തയ്യാറി കഴിഞ്ഞിരുന്നു.. കുട്ടിപ്പട്ടാളത്തിന് മാത്രമേ ഇനി സംഗതി മനസ്സിലാവാനുണ്ടായിരുന്നുള്ളൂ..

 

വൈകുന്നേരം സ്‌കൂൾ കഴിഞ്ഞു പുള്ളകൾ എത്തിയപ്പോൾ പതിവിനു വിപരീതമായി വിവിധ മധുരപലഹാരങ്ങളുടെ പ്ളേറ്റുകൾ അവർക്ക് മുന്നിൽ ഫർഹ നിരത്തി..