ഇത് ഞങ്ങളുടെ ഏരിയാ 3 [മനൂസ്] 2957

 

തന്നെ വിറ്റ ക്യാഷ് കെട്ടിയോളുടെ കൈയിൽ ഉണ്ടെന്ന് തിരിച്ചറിഞ്ഞ ജാഷി തന്റെ തുറന്ന വായ അടച്ചുകൊണ്ട്  വണ്ടിയോടിക്കലിൽ ശ്രദ്ധ കേന്ദ്രീകരിച്ചു..

 

“മറ്റൊരുത്തനെ തല്ലാനായാലും ഇവന്മാർ ഒന്നിച്ച് നിന്നല്ലോ..പടച്ചോൻ എന്റെ പ്രാർത്ഥന കേട്ടു..”

 

ഉള്ളിലെ ജാള്യത മറക്കാൻ ജാഷി വിഷയം മാറ്റി..

 

“ആ അത് ശരി… അപ്പോൾ ഇക്കക്ക് അതാണല്ലേ വല്യ കാര്യം..

 

ഇവന്മാർ ഇതൊക്കെ ഒപ്പിച്ചു വച്ചിട്ടും ഗുണദോഷിക്കുന്നതിനു പകരം അവർക്കൊപ്പം കൂടുന്നോ.. ”

 

ദേഷ്യത്തോടെയുള്ള ഫർഹയുടെ മറുപടിയാണ് താൻ വീണ്ടും ആവർത്തിച്ച മണ്ടത്തരത്തിന്റെ വ്യപ്തി ജാഷിക്ക് മനസ്സിലായത്..

 

വിഷയം മാറ്റാനെന്നോണം പെട്ടെന്ന് പറഞ്ഞ വാക്കുകൾ അവനെ തന്നെ തിരിഞ്ഞു കൊത്തി..

 

“അല്ല.. അതല്ലടി…”

 

“ഇക്ക ഒന്നും പറയേണ്ട… നിങ്ങളാണ് ഇവരെ വഷളാക്കുന്നത്…”

 

കാറിനുള്ളിൽ ഉറഞ്ഞു തുള്ളിയ കെട്ടിയോളെ എങ്ങനെ ശാന്തയാക്കണം എന്നറിയാതെ അവൻ കുഴഞ്ഞു..

 

ഒടുവിൽ എല്ലാരേയും ഒന്ന് തണുപ്പിക്കാൻ തന്നെ അവൻ തീരുമാനിച്ചു..

 

ദൃഷ്ടിയിൽപെട്ട ഒരു ഐസ്ക്രീം പാർലറിന് മുന്നിൽ അവൻ വണ്ടി ഒതുക്കി..

 

കോഴിക്കുഞ്ഞുങ്ങളെക്കാൾ തള്ള കോഴിക്കാണ് ഐസ്ക്രീം ഏറെ പ്രിയങ്കരം എന്ന ബോധ്യമാണ് അവനെ അത്തരമൊരു പ്രവർത്തിയിലേക്ക് നയിച്ചത്..

 

തള്ളക്കോഴി വാനിലയും കോഴിക്കുഞ്ഞുങ്ങൾ സ്ട്രാബെറി ഫ്ലേവറും രുചിയോടെ കഴിക്കുന്നത് നോക്കി സൂത്രശാലിയായ ആ കുളക്കോഴി നിർവൃതിയടഞ്ഞു..

 

എല്ലാം ഉണ്ടാക്കി വച്ചിട്ടും ഞാനൊന്നുമറിഞ്ഞില്ലേ എന്റെ രാമനാരായണാ എന്ന ഭാവത്തോടെ ഐസ്ക്രീമിൽ മുങ്ങി തപ്പുന്ന കുട്ടിപ്പട്ടാളത്തിനെ അവൻ നോക്കിയിരുന്നു..

 

ചിറിയിൽ പതിഞ്ഞ ഐസ്ക്രീമിനെ നാക്കുകൊണ്ട് തോണ്ടി അകത്താക്കുന്നതിന് ഇടയിൽ വാപ്പയെ നോക്കി പുഞ്ചിരിക്കാനും അവർ ഇരുവരും മറന്നില്ല..