ഇത് ഞങ്ങളുടെ ഏരിയാ 3 [മനൂസ്] 2957

കൈയ്യു പോലും കഴുകാതെ ഇരുവരും അതിന്മേൽ കുതിമറിഞ്ഞു.. നിമിഷ നേരം കൊണ്ട് പലഹാരങ്ങൾ നിറഞ്ഞ പ്ളേറ്റ് വിവസ്ത്രയായി..

 

“ഇത് എന്തിനാണെന്ന് അറിയുമോ ഇക്കാക്കമാർക്ക്…”

 

കഴിച്ച് തീർന്നതും അവിടേക്ക് കുഞ്ഞോളുമായി വന്ന ഉമ്മുമ്മ ചോദിക്കുമ്പോഴാണ് ഇരുവരും അതിനെ കുറിച്ച് ചിന്തിക്കുന്നത്..

 

“രണ്ട് പേർക്കും കൂടി ഒരു കുഞ്ഞാവ വരാൻ പോകുവാ..”

 

അവര് ചിരിയോടെ അത് പറഞ്ഞതും ഫർഹ ലജ്ജിച്ചു..ഇതു കേട്ടതും ഉമ്മുമ്മയുടെ കൈയിലിരുന്നു ലഡ്ഡുവിന്റെ ഒരു ചെറിയ കഷ്ണം നുണയുന്ന കുഞ്ഞോളെ ഇരുവരും നോക്കി..

 

“കുഞ്ഞോളല്ല… പുതിയൊരു കുഞ്ഞാവയാ..”

 

അത് കേട്ടതും ഇരുവരും ഗ്രഹണി പിടിച്ച പിള്ളേര് ചക്ക കൂട്ടാൻ കണ്ടത് പോലെ ഫർഹയെ വളഞ്ഞു…

 

“അയ്യാ.. എന്താ മക്കളുടെ ഒരു സ്നേഹം.. ഈ വീട് കുട്ടിച്ചോറ് ആക്കാനുള്ള ഒരു വകുപ്പ് കൂടിയായി അവന്മാർക്ക്..”

 

പുറത്തു നിന്നും വീടിന് അകത്തേക്ക് വന്ന ജാഷി കപട ദേഷ്യത്തോടെ പറഞ്ഞു..

 

വാപ്പയുടെ ആ വർത്താനം പുള്ളകൾക്ക് അത്ര പിടിച്ചില്ലെങ്കിലും ഓര് അത് കാര്യമാക്കിയില്ല..

 

ദിവസങ്ങൾ അങ്ങനെ കടന്നു പോയി.. ഫർഹയെ കൂടുതൽ പണികൾ ചെയ്യാൻ അനുവദിക്കാതെ ഉമ്മ അടുക്കള ജോലികൾ ഏറ്റെടുത്തു.. പുള്ളകളുടെ കാര്യവും അവർ ചെയ്ത് പോന്നു..

 

തുണി അലക്കിന്റെ കൊണ്ട്രാക്ട് ജാഷി ഏറ്റെടുത്തു.. അതുകൊണ്ടെന്താ നാല് മാസമായിട്ട് നന്നാക്കാൻ പറഞ്ഞിട്ട് നന്നാക്കാൻ ശ്രമിക്കാതെ വച്ചിരുന്ന വാഷിങ് മെഷീന് പകരം പുതിയത് ഒരാഴ്ചയ്ക്കുള്ളിൽ വാങ്ങി..

 

കല്ലിൽ അടിച്ചു കഴുകിയാലെ തുണി വൃത്തിയാകൂ എന്ന അവന്റെ സ്വന്തം സിദ്ധാന്ധം അവൻ തന്നെ നാലായിട്ട് മടക്കി പോക്കറ്റിൽ ഇട്ടു..

 

അന്നൊരു ഞായറാഴ്ച ആയിരുന്നു..എല്ലാവരും വീട്ടിലുള്ള ദിവസം.. നിയമസഭയിൽ സമ്മേളനം നടക്കുമ്പോഴുള്ളൊരു പ്രതീതിയാണ് ആന്ന് വീട്ടിൽ..

 

ചില നേരത്തു കൂട്ടയടി, ചില നേരത്തു കെട്ടിപ്പിടുത്തം,ചില നേരത്തോ പാര പണിയും കാലുവാരലും ..അങ്ങനെ ഇഷാനും റൈഹാനും പൊടി പൊടിക്കുന്ന ദിവസം..