? ഋതുഭേദങ്ങൾ ?️ 04 [ഖല്‍ബിന്‍റെ പോരാളി ?] 719

എന്നാല്‍ മനുവിനും ഭദ്രമ്മയ്ക്കും മുന്നിലും പ്രശ്നങ്ങള്‍ പുറത്ത് കാണിക്കാതെ ഇരുവരും നടന്നു.
അനുവിന്‍റെ കുടുംബം ദേവുമായി ഈ സമയത്തിനുള്ളില്‍ അടുത്തിരുന്നു. അവര്‍ ദേവിനെ ആഴ്ചയിലൊരിക്കലെങ്കിലും വിളിച്ച് സംസാരിച്ചിരുന്നു. കുടുതല്‍ ദേവുമായി അടുത്തത് അതിഥിയായിരുന്നു. അവള്‍ പലപ്പോഴും എട്ത്തിയെ വിളിക്കുന്നതിന് പകരം ദേവിനെയാണ് വിളിക്കുന്നത്.

പിന്നെ തന്‍റെ സംസാരശേഷം ദേവ് അനഘയ്ക്ക് ഫോണ്‍ നല്‍കുകയായിരുന്നു പതിവ്. ദേവിനെ വിളിക്കാതെ തന്‍റെ നമ്പറിലേക്ക് വിളിക്കാന്‍ അനു പലവട്ടം അത്തുവിനോട് പറഞ്ഞെങ്കിലും ഓരോ പ്രവിശ്യവും അവളതിന് എതിര്‍ത്തു പ്രവര്‍ത്തിക്കും. അനുവിന്‍റെ അച്ഛനും അമ്മയ്ക്കും ദേവും അനുവും രണ്ടു ദിവസം അവിടെ ചെന്ന് നില്‍ക്കാത്തതിന്‍റെ പരാതിയായിരുന്നു സ്ഥിരം പറയാനുണ്ടായിരുന്നത്. പിന്നെ വരാമെന്ന് പറഞ്ഞ് ഒഴിയുകയാണ് ദേവ് സ്ഥിരം ചെയ്തിരുന്നത്.

അനു നെന്മണിക്കരയുടെ അന്തരീക്ഷവുമായി ഇഴകി ചേര്‍ന്ന് തുടങ്ങി. വൈദരത്തെ ഒരംഗത്തെ പോലെ അവള്‍ മാറി കഴിഞ്ഞിരുന്നു. എന്നാലും ദേവുമായി ഇപ്പോഴും ഒരടുപ്പവുമില്ല. അതിപ്പോ അങ്ങോട്ടായാലും ഇങ്ങോട്ടായാലും…  എന്നാല്‍ അന്നത്തെ രാത്രിയിലെ സംഭവത്തിന് ശേഷം എന്തോ ഒരു പറഞ്ഞറിയിക്കാന്‍ പറ്റാത്ത അടുപ്പം അവനോട് അവള്‍ക്ക് തോന്നുന്നുണ്ട്…. അന്ന് അവന്‍ വന്നില്ല എങ്കില്‍ എന്താവും എന്ന് ആലോചിക്കാന്‍ പോലും അവള്‍ക്ക് പേടിയായിരുന്നു.

കൃത്യസമയത്ത് അങ്ങേര് വന്നത് കൊണ്ട് രക്ഷപ്പെട്ടു. എന്നാലും അവരെയൊക്കെ അങ്ങേര് അടിച്ചൊടിച്ചു എന്ന് പറഞ്ഞത് തീരെ വിശ്വാസം വരുന്നില്ല…. അവളുടെ ചിന്തകള്‍ കാടുകയറി കൊണ്ടിരുന്നു.

കോളേജിലെ ഗെറ്റ്ടുഗതറിന്‍റെ കാര്യം ഭദ്രമ്മയോടും മായേട്ത്തിയോടും പറഞ്ഞെങ്കിലും ദേവുമായി സംസാരിച്ചില്ല. അതിനുള്ള സമയം കിട്ടിയില്ല എന്ന് വേണം പറയാന്‍. ആകെ രാത്രിയാണ് അങ്ങേരെ ഒന്ന് അടുത്തു കിട്ടുക. അത് തന്നെ അങ്ങേരുടെ പാതിര ഫോണ്‍കോളും കഴിഞ്ഞു അല്‍പനേരം. ആ സമയത്ത് ഇതിന്‍റെ കാര്യം ഓര്‍മ്മയുണ്ടാകില്ല. അങ്ങിനെ ഗേറ്റ് ടുഗതറിനുള്ള ദിവസങ്ങള്‍ അടുത്തു വന്നുകൊണ്ടിരുന്നു.

ഗെറ്റ് ടുഗതറിന് രണ്ടു ദിവസം മുമ്പുള്ള ഒരു രാത്രി.

അന്നത്തെ ഫോണിലെ സൊള്ളലുകള്‍ കഴിഞ്ഞ് റൂമിലേക്ക് കയറി വരുന്നത് നോക്കിയിരിക്കുകയായിരുന്നു അനു.  ബാല്‍ക്കണിയുടെ വാതില്‍ തുറന്ന് അകത്ത് കയറി ദേവ് കാണുന്നത് തന്നെ നോക്കിയിരിക്കുന്ന അനുവിനെയാണ്. ആദ്യം ഇതെന്തുപറ്റിയെന്നറിയാതെ ദേവ് ഒന്നു പകച്ച് അവളെ നോക്കിയെങ്കിലും പിന്നെ മുഖം തിരിച്ച് തന്‍റെ കിടക്കുന്നതിന് മുമ്പുള്ള ജോലികള്‍ തുടര്‍ന്നു. എന്നാല്‍ അനു ഇപ്പോഴും അവനെ നോക്കി നില്‍ക്കുകയായിരുന്നു.

കിടക്കാനായി തിരിഞ്ഞപ്പോഴാണ് അനു ഇപ്പോഴും തന്നെ നോക്കി നില്‍ക്കുന്ന കാര്യം ദേവ് അറിയുന്നത്. അവള്‍ക്ക് എന്തോ പറയാനുണ്ടെന്ന് മനസിലാക്കിയ ദേവ് അനുവിനടുത്തേക്ക് നടന്നു.