ചിങ്കാരി 2 [Shana] 272

ചായ പെട്ടന്ന് കുടിച്ചിട്ട് അമ്മയോട് അതുലേട്ടൻ്റെ വീട്ടിൽ പോയിട്ടു വരാമെന്ന് വിളിച്ചു പറഞ്ഞ് മറുപടിക്ക് കാക്കാതെ ടോമിയേയും കൂട്ടി അവർ പെട്ടന്ന് നടന്നു, ഇല്ലങ്കിൽ ഒരുപാടു ചോദ്യങ്ങൾക്ക് ഉത്തരം നൽകേണ്ടി വരുമെന്നറിയാം .

” അമ്മായി പണിയിലായ കൊണ്ട് രക്ഷപെട്ടു ”

“അതെ , പിന്നെ ആ ഇരട്ട പരട്ടകൾ വന്നിട്ടില്ല ഏറ്റവും വലിയ പാര അവരാണ് , ചിലപ്പോൾ തോന്നും എൻ്റെ ചേച്ചിമാർ തന്നെയാണോന്ന് ”

” ഇടക്കിടക്ക് നീ പാര പണിയുന്ന കൊണ്ടല്ലേ , വാ പെട്ടന്ന് നടക്ക് സന്ധ്യക്കു മുന്നേ പോയി വരാം ”

വഴിയിലുള്ള കല്ലുകളൊക്കെ തട്ടിയെറിഞ്ഞ് അവർ ചെറിയ കാടുപോലുള്ള സ്ഥലത്തെത്തി ,
പിന്നെ മഞ്ഞണാത്തിയുടെ കാ പറിച്ചെറിഞ്ഞും മാവിൽ തൂങ്ങി ആടിയും കശുമാങ്ങ കടിച്ചു തിന്നും അവർ കുറേ സമയം അവിടെ ചിലവഴിച്ചു പോരുന്നതിനു മുന്നേ മുള്ളുകളുള്ള ചുടലച്ചെടിയിൽ നിന്ന് കുറേ ചുടലപ്പഴം പറിച്ച് പൊതിഞ്ഞെടുത്തു .

“ടി മതി പോകാം സന്ധ്യ ആകാനായി , ആ അതുലേട്ടൻ്റെ വീട്ടിലും തല കാണിച്ചിട്ടു വേണം പോകാൻ , അങ്ങോട്ടേക്കെന്നും പറഞ്ഞ് ഇറങ്ങിയതല്ലേ ”

”ഓ ഇനി ആ പൂതന തള്ളേട മുഖം കൂടി കാണണമല്ലോ ഈശ്വരാ ”

” നീ ഒന്നും മിണ്ടണ്ട ,അവരെന്തേലും പറഞ്ഞിട്ട് തനിയെ നിർത്തിക്കോളും ”

” പിന്നേ എന്നെ ചൊറിയാൻ വന്നാൽ ഞാൻ മാന്തും ”

“ടീ നിന്നോട് ഒരു കാര്യം ചോദിക്കട്ടെ , നിനക്ക് ഈ കാട്ടിലുള്ളതല്ലാതെ ബേക്കറി സാധനങ്ങളോട് ഇഷ്ടമില്ലേ , സാധാരണ ഇപ്പൊ ഞാനടക്കം എല്ലാർക്കും അതിനോടാണ് താൽപര്യം പക്ഷേ നീ മാത്രം എന്തെ ഇങ്ങനെ ”

“അല്ലേലും നമ്മൾ റയർ അല്ലേ മകനേ , നിനക്കറിയോ ഇതൊക്കെ പ്രകൃതിയുടെ രുചികളാണ് കാലം കഴിയുന്തോറും നഷ്ടമാകും , നിനക്കോർമ്മയുണ്ടോ പണ്ട് നമ്മൾ ഈന്തപ്പഴം കഴിച്ചിട്ട് കളയുന്ന കുരുക്കൾ മുറ്റത്ത് മുളച്ചു വരുമ്പോൾ അത് പൊളിച്ച് അതിനുള്ളിലെ ചോറ് തിന്നുന്നത് ഇച്ചിരിയേ ഉള്ളൂ എങ്കിലും എന്തു ടേസ്റ്റാണ് , അതുപോലെ കശുവണ്ടി മുളച്ച് വരുമ്പോൾ അതിൻ്റെ പരിപ്പ് പച്ചക്കളറിൽ രണ്ടു സൈഡിലും വിരിഞ്ഞു നിൽക്കുന്നത് പറിച്ചുതിന്നാൻ എന്തോരം തല്ലു കൂടിയിട്ടുണ്ട് , പിന്നെ തല്ലിത്തേങ്ങ പുളിങ്കുരു ചുട്ടത് ഇതൊക്കെ എന്തു ടേസ്റ്റിലാ കഴിച്ചിരുന്നത് , അമ്പഴങ്ങാ മരത്തിൽ കേറി അമ്പഴം പറിച്ചു എന്തോരം കഴിച്ചിട്ടുണ്ട് പോരാത്തത് ഉപ്പിലിട്ടും അച്ചാറിട്ടും കഴിച്ചു കൂട്ടിയിട്ടുണ്ട് , ആഞ്ഞിലിച്ചുവട്ടിൽ ആഞ്ഞിലിക്കുരു പിറക്കിക്കൂട്ടി ചിരട്ട കത്തിച്ച് അതിൽ ചുട്ടെടുത്ത് കഴിച്ചത് , എന്തോരം മധുര മുള്ള ഓർമകളാണല്ലേ …ഇന്നിപ്പോൾ ആർക്കും ഇതൊന്നും വേണ്ട പക്ഷേ എനിക്കിതൊക്കെ മറക്കാനാവാത്ത ഇഷ്ടങ്ങളാണ്..

“നീ ഇതൊക്കെ ഇപ്പോഴും ഓർക്കുന്നുണ്ടോ ”

” പിന്നെ മറക്കാനായിട്ട് നീയല്ല ഞാൻ ”

സംസാരിച്ചു കൊണ്ടവർ അതുലിൻ്റെ വീടിനു മുന്നിലെത്തി , അതുൽ പുറത്ത് ബൈക്കിൽ എന്തോ പണിയുവായിരുന്നു അതുലിൻ്റെ അമ്മ എന്തോ പറഞ്ഞ് അവിടെ ഇരിപ്പുണ്ട്

” ടാ ആ തള്ള വാതുക്കൽ തന്നെ ഇരിപ്പുണ്ട് ഞാനെ അവർക്കൊരു പണി കൊടുക്കട്ടെ ”

“നീ നന്നാവൂല മകളേ ”

“ഹായ് അതുലേട്ട ” അവൾ ഓടിച്ചെന്ന് അതുലിൻ്റെ മേത്തടിച്ചു

അവളെ കണ്ടപ്പോൾ തന്നെ അതിൻ്റെ അമ്മയുടെ മുഖമിരുണ്ടു

” ആഹാ ജമ്പനും തുമ്പനും എവിടെ പോയിട്ടു വരുവാ ” അതുൽ അവരെ കളിയാക്കി ചോദിച്ചു