“ഇനി ആരുടേയും ജീവൻ എടുക്കാൻ ഞാൻ നിന്നെ അനുവദിക്കില്ല…നിനക്കുള്ള ശിക്ഷ ഞാൻ വിധിക്കുന്നു മാർട്ടിൻ…”

അജോയ് അത് പറഞ്ഞതും മാർട്ടിൻ ഭയന്നു വിറച്ചു..

“നിനക്ക് ഓർമയുണ്ടോ മാർട്ടിൻ നമ്മൾ തമ്മിലുള്ള ആദ്യ കൂടിക്കാഴ്ച..”

അജോയ് ചോദിച്ചു..

“ഞങ്ങളുടെ വീട്ട് പടിക്കൽ നീയും നിന്റെ അമ്മയും വന്ന് കോശി നിന്റെ സ്വന്തം തന്ത ആണെന്ന് പറഞ്ഞ ദിവസം നീ ഓർക്കുന്നുണ്ടോ…

അത് കേട്ട് ആദ്യം ഞങ്ങൾ ഒന്ന് പതറിയെങ്കിലും… ഞങ്ങളുടെ അപ്പച്ചനും ഒരു ജീവിതം ഉണ്ടാകുമല്ലോ ,,ഒരു കൂടപ്പിറപ്പ് കൂടി ഞങ്ങളുടെ കൂട്ടത്തിലേക്ക് വരുന്നു എന്ന സന്തോഷമായിരുന്നു പിന്നീട്..

പക്ഷെ അത് എന്റേയും അഞ്ജലിയുടെയും ജീവിതങ്ങൾ തകർക്കാൻ ആണെന്ന് ഞാൻ അറിഞ്ഞിരുന്നില്ല..

വിവാഹം കഴിച്ച് നിന്നേയും ഭാര്യയെയും രഹസ്യമായി സംരക്ഷിച്ച അയാൾ വളരെ വിദഗ്ദ്ധമായി നിങ്ങളെ ഞങ്ങളുടെ തറവാട്ടിൽ കൊണ്ട് വന്നു അല്ലെ..

പിന്നീട് നിന്റെ ഭരണമായിരുന്നു വീട്ടിൽ.. പൊതുവെ അന്തർമുഖനായ ഞാൻ ഒന്നിലും ഇടപെട്ടിരുന്നില്ല..

ഞങ്ങൾ അനുഭവിക്കേണ്ട സ്വത്തുക്കളാണ് നീയും ആയാളും ചേർന്ന് അനുഭവിക്കുന്നത് എന്ന് അറിഞ്ഞിട്ടും ഞാൻ കണ്ണടച്ചു… കാരണം ഞാൻ നിങ്ങളിൽ അത്രയേറെ വിശ്വാസം വച്ചു..

ഒരു അനാഥനെ സ്നേഹിച്ചതിന്റെ പേരിൽ നിങ്ങൾ എന്റെ പെങ്ങളെ എന്നിൽ നിന്നും ബുദ്ധിപൂർവം അകറ്റി..

എരിതീയിൽ എണ്ണ പകർന്ന പോലെ നിങ്ങൾ എന്നിലെ അവളോടുള്ള വിദ്വേഷത്തെ ആളികത്തിച്ചു…

അവൾ അവനോടൊപ്പം പോയപ്പോളും നിങ്ങൾക്ക് ആയിരുന്നു ലാഭം… അവളുടെ സ്വത്തുക്കൾ കൂടി നിങ്ങളിലേക്ക് എത്തിച്ചേർന്നു…