∆ ആഴങ്ങളിൽ ∆ 2 [രക്ഷാധികാരി ബൈജു] 129

“വാ മോനെ ഇറങ്ങു വീടെത്തി…” എന്ന ബ്രോക്കറുടെ വിളികേട്ട് ഞാൻ തെല്ല് പരിഭ്രമത്തോടെ വണ്ടിയിൽ നിന്നുമിറങ്ങി. ഇറങ്ങിയപാടെ വീടൊന്നു നോക്കി. പഴേ ഒരു തറവാടിൻ്റെ പകിട്ട് തോന്നിക്കുന്ന ഓടുമേഞ്ഞൊരു വീട്. വീടിൻ്റെ തൊട്ടരികിലായ് ഒരു മാവ് തളിർത്ത ഇലകളോടെ വെയിലിൽ തിളങ്ങി ഇങ്ങനെ നിൽക്കുന്നു.ആ കാഴ്ച്ച ഉള്ളിൽ അൽപ്പം ഉന്മേഷം നൽകിയെന്നെനിക്കു തോന്നി. മാവും അതിൻ്റെ ഭംഗിയും നോക്കി നിന്ന എന്നെ അഭിയുടെ സ്വകാര്യം പറച്ചിലാണുണർത്തിയത്.

” ഡാ അതെ നമ്മളിവിടെ മാവ് വാങ്ങാൻ വന്നതല്ല. നോക്കി അതിൻ്റെ അളവെടുക്കാൻ..”

“അതെന്താടാവ്വേ എനിക്ക് മാവിനെ ഒന്നു നോക്കിക്കൂടെ…..”

” അല്ല എന്താ രണ്ടാളുമൊരു രഹസ്യം പറച്ചിൽ…” അപരിചിതമായ ആ ശബ്ദം കേട്ട്  ഞങ്ങൾ രണ്ടാളും അങ്ങോട്ട് നോക്കി

അൻപത് വയസ്സിനു മുകളിൽ പ്രായം തോന്നിക്കുന്ന ആഢ്യത്തമുള്ള ഒരാൾ ഞങ്ങളെ നോക്കി നിൽക്കുന്നു.

“ഇതാണ് കേട്ടോ പെണ്ണിൻ്റെ അച്ഛൻ വേണുഏട്ടൻ…” പിന്നിൽ നിന്ന സുഭാഷ് പറഞ്ഞു. ഇത് കേട്ടപാടെ അഭി..

“ആ ആണോ…ഹലോ അച്ഛാ. ഞാൻ അഭി ഹരിയുടെ കൂട്ടുകാരനാണ്. ഇതാണ് നമ്മുടെ ആൾ.” അവനെന്നെ ചൂണ്ടി കാട്ടിയത് പറഞ്ഞപ്പോൾ അദ്ദേഹത്തെ ഞാനൊന്നു വിഷ് ചെയ്തു.

“ആ പരിചയപ്പെടലൊക്കെ ഇനി ഉള്ളിലിരുന്നാകാം. എല്ലാവരും അകത്തേക്ക് വാ…വരൂ കേട്ടോ.” ഇത്രയും പറഞ്ഞു അദ്ദേഹം ഞങ്ങളെ ഉള്ളിലേക്ക് ക്ഷണിച്ചു.

ഉള്ളിലെ പരിഭ്രമം പുറത്തു കാട്ടാതെ ഞാനും എൻ്റെയൊപ്പം ഒരു പരിഭ്രമവുമില്ലാതെ അഭിയും പിന്നാലെ ബ്രോക്കർ സുഭാഷും വീട്ടിലേക്ക് കയറി. നേരെ ലിവിംഗ് ഹാളിലേക്ക്

കയറിയെ ഞങ്ങളെ ഹാളിൻ്റെ കോണുകളിലും മറ്റുമായി നിന്ന കുറച്ചു പേർ നോക്കുന്നുണ്ട് . എൻ്റെ നടത്തം കണ്ടിട്ടുമറ്റോ ആണോന്നറിയില്ല അതിലെ രണ്ടു പ്രായമായ ചേച്ചിമാർ അടക്കം പറയുന്നതു ഞാൻ ശ്രദ്ധിച്ചു. ഹാളിലെത്തി അവിടെ നിരന്ന ഒഴിഞ്ഞ കസേരയിൽ ഞങ്ങളെ ഇരുത്തിയ ശേഷം അച്ഛൻ മറുവശത്തായി ഇരുന്നു. അദ്ദേഹത്തോടൊപ്പം അദ്ദേഹത്തിലും പ്രായമുള്ള ഒരാൾ കൂടി ഉണ്ടായിരുന്നു. അങ്ങനെ ആദ്യ കടമ്പയിലേക്ക് കടന്നു പരിചയപ്പെടൽ. ഞങ്ങടെ ഒപ്പം അധികമാരും ഇല്ലാഞ്ഞതിനാലും അഭികാര്യങ്ങൾ വ്യക്തമായി അവതരിപ്പിച്ചതിനാലും ഞങ്ങളുടെ ഭാഗം വേഗം കഴിഞ്ഞു. പിന്നെ കുട്ടിയുടെ അച്ഛൻ ഓരോരുത്തരെയായി പരിചയപ്പെടുത്തി. അതിൽനിന്നും പെൺകുട്ടിയുടെ മൂത്ത അമ്മാവനാണ് അച്ഛനൊപ്പം ഇരിക്കുന്നതെന്നും അടക്കം പറഞ്ഞ ചേച്ചിമാർ അമ്മായിമാരണെന്നുമെനിക്കു മനസ്സിലായി. അങ്ങനെ ആ ഭാഗം കഴിഞ്ഞയുടൻ പെൺക്കുട്ടിയുടെ അച്ഛൻ

” എന്നാ നമുക്കു കുട്ടിയെ വിളിക്കാമെല്ലെ…”