നിഴലായ് അരികെ 7

Author : ചെമ്പരത്തി

[ Previous Part ]

റൂമിൽ കയറിയ  നന്ദൻ കാണുന്നത്,  ചോരയിൽ കുളിച്ച മുഖവും കയ്യുമായി നിൽക്കുന്ന ആര്യയെ ആണ്…

   ഇടതു കയ്യിൽ നിന്നു ഒഴുകിവീഴുന്ന ചോരത്തുള്ളികൾ തറയിലെ  വെളുത്ത ടൈലിൽ ഒരു ചുവന്ന പൂക്കളം തീർത്തുകൊണ്ടിരുന്നു……..

    റൂമിലെ കണ്ണാടിയും, ഗ്ലാസിൽ തീർത്ത ഫ്ലവർവേസും പൊട്ടിച്ചിതറി തറയിൽ എമ്പാടും കിടന്നിരുന്നു…..

ആര്യയുടെ കാൽച്ചുവട്ടിൽ തളംകെട്ടിനിന്ന ചോരചുവപ്പിന്റെ വലുപ്പം അനുനിമിഷം കൂടിക്കൂടി വന്നു….

കുനിച്ച മുഖത്തു നിന്നും ഒഴുകിയിറങ്ങിയ ചോരത്തുള്ളികൾ താടിത്തുമ്പിലൂടെ നിലത്തേക്ക് വീണു ചിതറി…….

ഒരുനിമിഷം, കണ്ട കാഴ്ചയിൽ സ്തബ്ധനായി നിന്ന നന്ദൻ ബോധം വീണ്ടെടുത്ത്, ചിതറി വീണ ചില്ല് കഷ്ണങ്ങളിൽ ചവിട്ടാതെ  അവൾക്കരികിലേക്കു ഓടിയെത്തി…..

“അമ്മൂ……….എന്താ പറ്റിയെടാ????”   നന്ദന്റെ സ്വരം ഇടറിയിരുന്നു.

ആര്യ  പുറകോട്ട് വേച്ചു പോകാൻ തുടങ്ങുന്നത് കണ്ട നന്ദൻ, അവളുടെ വലതു കയ്യിൽ ചാടിപ്പിടിച്ചു മുന്പോട്ട് വലിച്ചു.

നന്ദന്റെ നെഞ്ചിൽ വന്നിടിച്ച ആര്യ കുഴഞ്ഞു വീഴാൻ പോയതും നന്ദൻ അവളെ തന്റെ കൈകളിൽ കോരിയെടുത്തു…

“നന്ദാ………എനിക്കൊരു… കാര്യം…പറയാൻ…. “

അപ്പോഴേക്കും മറ്റുള്ളവരും റൂമിലേക്കെത്തി.

“സൂക്ഷിച്ചു…………. തറയിൽ മുഴുവൻ കുപ്പിച്ചില്ലാണ്…. “

നന്ദൻ എല്ലാവരോടും ആയി പറഞ്ഞു.

ആര്യയുടെ തളർന്നുള്ള കിടപ്പും, ചോരയിൽ കുതിർന്ന മുഖവും കയ്യും കണ്ടതോടെ മമ്മി തല കറങ്ങി അവിടിരുന്നു… ഫിലിപ് അവരെ താങ്ങി.

“അച്ഛാ…… കുറച്ചു വെള്ളം വേണം……കുടിക്കാൻ…. “നന്ദൻ അച്ഛനോടായി പറഞ്ഞുകൊണ്ട് ആര്യയെ സോഫയിൽ കിടത്തിയ ശേഷം മുഖത്തെ മുറിവ് നോക്കി.. നെറ്റിക്ക് മുകളിൽ, മുടിക്കിടയിൽ ഒത്തിരി വലുതല്ലെങ്കിലും നല്ലപോലെ ചോരയൊഴുകുന്നൊരു മുറിവ്.