🔱കരിനാഗം 4🔱

Author : ചാണക്യൻ

[ Previous Part ]

 

കഴിഞ്ഞ പാർട്ടിന് സപ്പോർട്ട് തന്ന എല്ലാവർക്കും നന്ദി…………… തുടർന്നും പ്രതീക്ഷിക്കുന്നു……….

ഈ പാർട്ട്‌ എന്റെയും സഖാവിന്റെയും ചങ്കായ ചാരൂന് സ്നേഹപൂർവ്വം സമർപ്പിക്കുന്നു…. 🤗❤️😍

(കഥ ഇതുവരെ)

“ദാദ ഞാൻ ഇവളെ റയിൽവേയിൽ കൊണ്ടാക്കിയിട്ട് തിരികെ വരാം……….എന്നിട്ട് എല്ലാം വിശദമായി പറയാം”

“ശരി മഹി ആരായിത്?”

“എന്റെ സുഹൃത്ത് ആണ് ”

മഹിയുടെ മറുപടി കേട്ടതും നിറ പുഞ്ചിരിയോടെ ചന്ദ്രശേഖർ തലയാട്ടി.

മഹി കണ്ണുകൾ കൊണ്ട് ആംഗ്യം കാണിച്ചതും സിന്ധൂരി കാറിലേക്ക് കയറി.

അവളെയും കൊണ്ട് അവൻ അംബാസ്സിഡർ റെയിൽവേ സ്റ്റേഷനിലേക്ക് തിരിച്ചു.

(തുടരുന്നു)

സിന്ധൂരി ഒന്നും മിണ്ടാതെ അവന്റെ മുഖത്തേക്ക് ഉറ്റു നോക്കി.

ഗൗരവം ആയിരുന്നു സ്ഥായി ഭാവം.

പക്ഷെ എന്തൊക്കെയോ അവൻ മനസിൽ കണ്ടു വച്ചിട്ടുണ്ടെന്ന് അവൾക്ക് തോന്നി.

മഹിയുടെ ഗൗരവത്തിൽ നിന്നും ഒരംശം പേറിക്കൊണ്ട് അവളും മുഖം വീർപ്പിച്ചു പുറം കാഴ്ച്ചകളിൽ കണ്ണു നട്ടു.

വിന്ഡോയിലൂടെ മുഖത്തടിക്കുന്ന കാറ്റിനു പോലും ഒരു കെട്ട മണമാണെന്ന് അവൾക്ക് തോന്നി.

മുഖത്തേക്ക് ഉതിരുന്ന മുടിയിഴകൾ യാന്ത്രികമായി അവൾ കോതി വച്ചു കൊണ്ടിരുന്നു.

ഏറെ നേരത്തെ യാത്രക്ക് ശേഷം അവർ മുക്തപൂർ റെയിൽവേ സ്റ്റേഷനിൽ എത്തി ചേർന്നു.

പാർക്കിങ്ങിൽ കാർ കൊണ്ടു വച്ചു അവർ സ്റ്റേഷന്റെ ഉള്ളിലേക്ക് നടന്നു.

പൗരാണികമായ ആ സ്റ്റേഷനിലെ ഒന്നാം പ്ലാറ്റ് ഫോമിന്റെ മധ്യത്തിലെ സിമെന്റ് ബെഞ്ചിൽ അവർ ഇരുന്നു.

തിളയ്ക്കുന്ന ഉച്ച വെയിൽ അവർ ഇരുവരെയും ഒരുപോലെ തളർത്തി.

മഹി ആ ഉഷ്ണത്തിൽ ആകപ്പാടെ വിയർത്തു കുളിച്ചു.

സിന്ധൂരിയ്ക്കും മറിച്ചായിരുന്നില്ല അവസ്ഥ.