?കരിനാഗം 4? [ചാണക്യൻ] 225

“മഹി അമിത്തിനെ വീട്ടിലേക്ക് കൊണ്ടു പോ”

“ശരി ദാദ ”

ചന്ദ്രശേഖറുടെ ആജ്ഞ ശിരസ്സാൽ വഹിച്ച് മഹാദേവ് അമിത്തിനെയും കൂട്ടി ജീപ്പിൽ കയറി രംഗസ്ഥലിലേക്ക് തിരിച്ചു പോയി.

അവർ പോകുന്നത് നോക്കികൊണ്ട് ആ കെട്ടിടത്തിന്റെ മുറ്റത്ത് അദ്ദേഹം നിന്നു.

ആ സമയം മുന്നാ ഭയ്യാ അങ്ങോട്ടേക്ക് കടന്നു വന്നു.

“അങ്ങുന്നേ എന്താണ് അവരെ ചെയ്യണ്ടേ?”

അദ്ദേഹം കൈകൾ കെട്ടി വച്ചു വിനയകുനിതനായി നിന്നു.

“കൊന്നു കളഞ്ഞേക്ക് രണ്ടിനെയും ”

ഒട്ടും അമാന്തിക്കാതെയുള്ള ചന്ദ്രശേഖറിന്റെ മറുപടി വന്നു.

അതു കേട്ട് യാതൊരു ഭാവ വ്യത്യാസങ്ങളുമില്ലാതെ മുന്നാ ഉള്ളിലേക്ക് പോയി.

പൊടുന്നനെ ആ കെട്ടിടത്തിന്റെ വാതി കൊട്ടിയടക്കപ്പെട്ടു.

അപ്പോഴേക്കും തന്റെ കാറും കൊണ്ട് ചന്ദ്രശേഖരും ഗ്രാമത്തിലേക്ക് തിരിച്ചിരുന്നു.

രംഗസ്ഥലിന്റെ അതിർത്തിയിലേക്ക് കയറി വരുമ്പോഴാണ് ഒരു പാലത്തിന്റെ മുകളിൽ മകന്റെ ജീപ്പ് കിടക്കുന്നത് ചന്ദ്രശേഖർ ശ്രദ്ധിച്ചത്.

കാർ പതിയെ ഒതുക്കി വച്ചു അയാൾ അതിൽ നിന്നുമിറങ്ങി ജീപ്പിന് സമീപം നടന്നു.

അവിടെ ബോണറ്റിന്റെ മുകളിൽ ഇരുന്ന് സിഗരറ്റ് വലിക്കുകയായിരുന്നു അമിത്.

മഹാദേവ് പാലത്തിന്റെ കൈ വരിയിൽ ഇരുന്ന് താഴേക്ക് കാലുകളിട്ട് രസിക്കുന്നു.

ഈ കാഴ്ച്ച കണ്ടു കൊണ്ടാണ് അദ്ദേഹം വരുന്നത്.

അച്ഛനെ കണ്ടതും കയ്യിലുള്ള പാതി തീർന്ന സിഗരറ്റ് അവൻ നിലത്തു പരന്നു കിടക്കുന്ന മണലിലേക്ക് വലിച്ചെറിഞ്ഞു.

മണൽ പരപ്പിലേക്ക് മൂക്കും കുത്തി വീണ ആ സിഗരറ്റ് കുറ്റിയുടെ തീ മണൽ തരികൾക്കിടയിൽ പിടഞ്ഞു ശ്വാസം മുട്ടി ചത്തു.

“മക്കള് രണ്ടു പേരും കൂടിയെന്താ?”

അല്പം ഗൗരവത്തോടെ അദ്ദേഹത്തിൽ നിന്നും വാക്കുകൾ ഉതിർന്നു.