💖 മിന്നുകെട്ട് 1 💖 [The_Wolverine] 1578

“എന്ത് ഉറക്കമാടോ ഇത്… തന്റെ സാധങ്ങൾ വല്ലതും ആരെങ്കിലും എടുത്തോണ്ട് പോയിരുന്നെങ്കിൽ പോലും താൻ അത് അറിയില്ലായിരുന്നല്ലോ…”

…പുള്ളി ഒരു ചിരിയോടെ അതും പറഞ്ഞ് ബസ്സിന് വെളിയിലേക്ക് ഇറങ്ങിയപ്പോൾ ഞാനും ഒരു പുഞ്ചിരിയോടെ തന്നെ പുള്ളിക്ക് പുറകെ പുറത്തേക്ക് ഇറങ്ങി…

…പുറത്ത് ഇറങ്ങിയപ്പോഴേക്കും അന്തരീക്ഷം ഒക്കെ ഏകദേശം ഇരുട്ടിയിട്ടുണ്ടായിരുന്നു… ചെറുതായിട്ട് മഴയും പെയ്യുന്നുണ്ട്… ബസ്സിൽ ഇരുന്ന് ഉറങ്ങിപ്പോയതോണ്ട് സമയം പോയതൊന്നും അറിഞ്ഞില്ല… വാച്ചിൽ സമയം നോക്കിയപ്പോഴാണ് 08:00 മണി ആയത് കണ്ടത്… എന്തായാലും ഇന്ന് ഇനി ഇവിടെ തങ്ങാതെ വേറെ ഒരു നിവൃത്തിയും ഇല്ലെന്ന് എനിക്ക് മനസ്സിലായി… പോക്കറ്റിൽ നിന്ന് പേഴ്‌സ് എടുത്ത് നോക്കിയപ്പോൾ അതിൽ ആകെ ഇനി 1000 രൂപ മാത്രമേ ഉള്ളൂ… പേഴ്സും പോക്കറ്റിൽ വെച്ച് ബാഗും തൂക്കി മഴ നനയാതെ ബസ്റ്റാന്റിന്റെ ഓരം ചേർന്ന് മുമ്പോട്ട് നടക്കുമ്പോൾ എനിക്ക് ഒരൊറ്റ ലക്ഷ്യം മാത്രമേ ഉണ്ടായിരുന്നുള്ളൂ ഇന്നത്തെ രാത്രി തങ്ങാൻ ഒരു വാസസ്ഥലം…

…ഏകദേശം ഒരു കിലോമീറ്റർ നടന്നപ്പോഴേക്കും ഞാൻ ഒരു ലോഡ്ജിന്റെ മുമ്പിൽ എത്തിയിരുന്നു… യാത്രാക്ഷീണമോ അതോ വിശപ്പിന്റെ വിളികൊണ്ടോയെന്തോ ഞാൻ ശെരിക്കും തളർന്നിരുന്നു… ഇനി ഒരടി പോലും മുമ്പോട്ട് നടക്കാൻ പറ്റില്ലെന്ന് മനസ്സിലായതുകൊണ്ട് ഞാൻ നേരേ നടന്ന് ആ ലോഡ്ജിനകത്തേക്ക് കേറി…