ശ്രീ നാഗരുദ്ര ? ???? നാലാം ഭാഗം – [Santhosh Nair] 1100

അടുത്തു നിന്നും വീണ്ടും രുദ്രയുടെ ശബ്ദം ഉയർന്നു – “ഏട്ടാ, വണ്ടിയെടുത്തോളൂ, ഇനി ഞാൻ പറയുന്നവരെ വണ്ടി നിർത്തേണ്ട, അടുത്തൊരു അമ്പലമുണ്ട്, അവിടെയെത്തിയ ശേഷം കുളിച്ചു വസ്ത്രം മാറി ചില കാര്യങ്ങൾ ചെയ്യാനുണ്ട്, അതുവരെ സംസാരിയ്‌ക്കേണ്ട – വിഷ്ണു സഹസ്രനാമം ചൊല്ലിക്കൊണ്ടേയിരിയ്ക്കുക.”

അവൻ ഡോർ തുറന്നു ആ പെട്ടി ഭദ്രമായി പിൻസീറ്റിൽ വെച്ചു വന്ദിച്ച ശേഷം അവൻ മുൻപിലത്തെ ഡോർ തുറന്നു അകത്തു കയറി, വണ്ടി സ്റ്റാർട്ട് ചെയ്തു. വണ്ടി വീണ്ടും മുന്പോട്ടുരുണ്ടു.

ഏകദേശം ഒരു കിലോമീറ്റർ ഓടിയ ശേഷം അവൾ വണ്ടി നിർത്താനാവശ്യപ്പെട്ടു, വണ്ടി നിർത്തിയയുടൻ തന്നെ പച്ചക്കളർ പുതപ്പു പുതച്ച ഒരു അവധൂതൻ കാറിനരികിൽ വന്നു.

പ്രാകൃത വേഷം, ചുക്കിച്ചുളിഞ്ഞ ശരീരം, നന്നേ പ്രായമുണ്ടാവും, കയ്യിലെന്തോ ഒരു ദണ്ഡുപോലെയുണ്ട് – പഴയ വസ്തു.  ഒരു മുസ്ലിം അവധൂതനാണെന്നു മനസ്സിലായി.
അദ്ദേഹം ജനലിൽ തട്ടി.

“ഏട്ടാ കതകു തുറക്കൂ, അദ്ദേഹം ഒരു മുസ്ലിം അവധൂതൻ ആണ്. ഒരു അഞ്ഞൂറു രൂപ കൊടുത്തേക്കൂ, നീല മേഘ ശ്യാമളനായ നാരായണനെ മനസ്സിൽ വിചാരിച്ചുകൊണ്ടു തന്നെ കൊടുക്കുക. അദ്ദേഹം എന്തെങ്കിലും പറഞ്ഞാൽ തലകുലുക്കി കേൾക്കുക, അദ്ദേഹം എന്തെങ്കിലും ചെയ്താലും എതിര് പറയേണ്ടാ.”