രാജവ്യൂഹം 3 [നന്ദൻ] 981

“” ഏട്ടന് അറിയാമോ ആ കമ്പനി?? “”

 

“””അറിയില്ലാരുന്നു പക്ഷെ ഇപ്പോൾ അറിയാം.. അതു  DN exporters എന്നൊരു കമ്പനി ആണ് “”

 

“”അവരുടെ ആരെങ്കിലും നമ്മുടെ കമ്പനിയിൽ ഉണ്ടാവും അരവിന്ദേട്ടാ..””

 

“”ആരെങ്കിലും അല്ല അമ്മു.. ആ കമ്പനിയുടെ ഒരു ഡയറക്ടർ ധ്യാൻ ആണ് ശിവരാമേട്ടന്റെ മകൻ.. “”

 

അമൃത ഞെട്ടലോടെ ആണ് അരവിന്ദൻ പറയുന്നത് കേട്ടത്‌.. 

 

“”ധ്യാനോ… അതിനു അവൻ.. “”

അമൃതയുടെ നെറ്റിയിൽ ചുളിവുകൾ വീണു. 

 

‘”ഡോക്യൂമെന്റസ് അവൻറെ പേരിൽ ഉണ്ടെന്നേ ഉള്ളു അമ്മു എല്ലാം നടത്തിയത് ശിവരാമേട്ടൻ ആണ്.. “

 

“”എന്നാലും ഏട്ടൻ.. പാല് കൊടുത്ത കൈക്കു തന്നെ.. “” അമൃതയുടെ മുഖം സങ്കടവും ദേഷ്യവും കൊണ്ടു ചുവന്നു. 

 

“”ഞാൻ അച്ഛനെ വിളിച്ചു പറയട്ടെ.. ആ ഫോൺ ഇങ്ങു താ ഏട്ടാ.. “”

 

“” വേണ്ട അമ്മു നമ്മളായിട്ട് കൊണ്ടു വന്നതല്ലേ.. അന്നേ അച്ഛൻ പറഞ്ഞതല്ലേ വേണ്ടാന്ന്.  വെറുതെ വിളിച്ചു പറഞ്ഞു ആ അച്ഛന് വിഷമം ഉണ്ടാക്കേണ്ട.. “”

 

“” ശങ്കരേട്ടൻ എന്താ പറഞ്ഞത്… “” അമൃത വീണ്ടും ആകാംഷയോടെ ചോദിച്ചു. 

 

“” കേസ് കൊടുക്കാം എന്നാ ശങ്കരേട്ടൻ പറയുന്നത്.. ഞാൻ പറഞ്ഞു വേണ്ടാന്ന്.. ശങ്കരേട്ടന് ഉണ്ടായ നഷ്ടം എന്റെ ഷെയറിൽ നിന്നു കൊടുക്കാം.. കേസ് കൊടുത്തിട്ടു എന്ത് കാര്യം ഒരിക്കലും തീർപ്പാവില്ല പിന്നെ നമ്മുടെ മക്കൾ അതിനു പുറകെ പോകേണ്ടി വരും “”

 

അമൃതയുടെ മുഖം തെളിഞ്ഞില്ല അവൾ വിഷമത്തോടെ ബെഡിൽ പുറകിലേക്ക് നീങ്ങി ഇരുന്നു മുട്ടുകൾ മടക്കി വെച്ചു അതിലേക്ക്  മുഖം പൂഴ്ത്തി.. ഓരോന്ന് ആലോചിച്ചു അവളുടെ കണ്ണുകൾ നിറഞ്ഞോഴോകി..

 

“” എന്നെ ആശ്വസിപ്പിക്കാൻ വന്ന ആള് ഇരുന്നു കരയുകയാണോ…”” അരവിന്ദൻ അമൃതയുടെ അടുത്തേക് ചേർന്നിരുന്നു.. 

 

“”പോട്ടെടോ ഒരു കയറ്റത്തിന് ഒരു ഇറക്കം ഉണ്ടാവണം എന്നത് പ്രകൃതി നിയമം ആണ് ഇപ്പൊ അറിഞ്ഞല്ലോ എന്തായാലും നമ്മൾ വിഷമിച്ചിരുന്നു മക്കളെ കൂടെ വിഷമിപ്പിക്കേണ്ട.. അല്ല അവരവിടെ??  “”

 

കുനിഞ്ഞിരിക്കുകയായിരുന്ന അമൃതയുടെ മുഖം പിടിച്ചു മുകളിലേക്കു ഉയർത്തിയ  അരവിന്ദൻ അവളുടെ കവിളിൽ കണ്ണുനീരൊഴുകിയ പാട് കണ്ടു. 

അരവിന്ദൻ തന്നെ അമൃതയുടെ സാരിയുടെ മുന്താണി എടുത്തു അവളുടെ കവിളിലെ കണ്ണീർ പാടുകൾ തുടച്ചു കൊടുത്തു അവളെ പിടിച്ചെഴുന്നേല്പിച്ചു. 

 

“എവിടെ പോയി രണ്ടാളും ”  അരവിന്ദൻ പിന്നെയും ചോദ്യം ആവർത്തിച്ചു. 

 

“”അവര് പിള്ളേർ എല്ലാം കൂടെ പുറത്തു പോയി.. അച്ഛൻ ഇന്നും പറ്റിച്ചു എന്നു പറഞ്ഞാണ് മോളു പോയേക്കുന്നതു “”

അമൃത മറുപടി പറഞ്ഞു. 

 

“”സാരമില്ല ഞങ്ങൾ നാളെ ഓഫീസിൽ പോകുന്നില്ല.. കൈമളെട്ടൻ ഹാൻഡിൽ ചെയ്തോളാം എന്നു പറഞ്ഞിട്ടുണ്ട്.. നമുക്ക് എന്തായാലും പുറത്തു പോകാം… കല്ലുവിന്റെ പരാതി തീർക്കാം “”