രാജവ്യൂഹം 3 [നന്ദൻ] 981

“”അയ്യോ ഇതെന്താ കോടതിയോ.. അമ്മേ ആര്യന്റെ ഫോട്ടോ നോക്കി കല്ലു ചിരിച്ചതിനു നിധിൻ കളിയാക്കി അതിനു അവൾ ദേഷ്യം വന്നു നിങ്ങളുടെ കുരങ്ങൻ ചേട്ടൻ എന്നു പറഞ്ഞു…അതാണ് പ്രശ്നം.. “” കിഷോർ താഴേക്കു ഇറങ്ങി വന്നു പറഞ്ഞു 

 

കല്ലു കുനിഞ്ഞു നിന്നു മെല്ലെ ഏറുകണ്ണിട്ടു ഗംഗയുടെ മുഖത്തേക്ക് പാളി  നോക്കി.. 

 

“”ആന്റിയമ്മേ ഞാൻ അതു വെറുതെ പറഞ്ഞതാ ആ ചേട്ടൻ എന്റെ ആന്റിയമ്മേ പോലെ സുന്ദരി  അല്ലേ .. “” ഗംഗയുടെ താടിക്കു പിടിച്ചു കൊഞ്ചുന്ന പോലെ കല്യാണി പറഞ്ഞതും എല്ലാവരും ചിരിച്ചു. 

 

“”പൊടി എന്റെ ചേട്ടൻ പെണ്ണൊന്നുമല്ല.. “” നിധിൻ വീണ്ടും കല്യാണിയെ പ്രകോപിപ്പിക്കാൻ പറഞ്ഞു. 

 

“”ഒന്നടങ്ങിയിരിക്കു ചെറുക്കാ.. ചുമ്മാ വഴക്ക് പിടിക്കാതെ.. “”

ഗംഗ നിധിനെ ശാസിച്ചതും അവൻ അടങ്ങി.. അതു കണ്ട്  താൻ വിജയിച്ചു എന്ന അർത്ഥത്തിൽ കല്യാണി തലയാട്ടുകയും നിതിനോടു ചുണ്ടു കൊണ്ട് ഗോഷ്ടി  കാണിക്കുകയും ചെയ്തു.. 

 

“”മോനെപ്പോള വരുന്നത് ഗംഗേട്ടത്തി.. ” അമൃത ആര്യനെ കുറിച്ച് അന്വേഷിച്ചു. 

 

“”അവൻറെ ക്ലാസ്സ്‌ ഒക്കെ കഴിഞ്ഞു ഈ ആഴ്ച വരുമായിരിക്കും എവിടെയോ കൂട്ടുകാരുടെ വീട്ടിൽ പോണം എന്നൊക്കെ പറഞ്ഞിരുന്നു ഇന്നലെ വിളിക്കുമ്പോ.”” 

 

“”ഹ്മ്മ് കണ്ണൻ  കൂടെ വന്നിട്ട് ഇവർ രണ്ടു പേരും കൂടെ നോക്കട്ടെ ഇനി കമ്പനി കാര്യങ്ങൾ ഒക്കെ.. കിച്ചുവും കണ്ണനും ..അല്ലേ ഏടത്തി.. ”

അമൃത ഗംഗയോടായി പറഞ്ഞു 

 

“”അതേ അതു ശെരിയാ… ഗംഗ കിഷോറിനെ നോക്കി.. പിന്നെ വേറെ ഒരാഗ്രഹം കൂടെ ഉണ്ട്‌ എനിക്ക്.. സമയം ആവുമ്പോൾ പറയാം.. “”

 

“” അതെന്താ ആന്റിയമ്മേ ” കല്യാണി ഗംഗയുടെ മുഖത്തേക്ക്  നോക്കി. 

 

“” അതൊക്കെ ഉണ്ട്‌.. “” കല്യാണിയെ ചേർത്തു പിടിച്ചു അവളുടെ കവിളിൽ തഴുകി കൊണ്ടു ഗംഗ അമൃതയുടെ മുഖത്തേക്ക്  നോക്കി കണ്ണുകൾ ഇറുക്കി കാണിച്ചു.. അമൃത മനസ്സിലായി എന്ന അർത്ഥത്തിൽ പുഞ്ചിരിച്ചു.. 

കല്യാണി രണ്ടു പേരെയും പരസ്പരം നോക്കിയെങ്കിലും അവൾക്കൊന്നും മനസിലായില്ല.. 

 

“”വാടാ പിള്ളേരെ… ഇനി അച്ഛനെയും  കൂട്ടി അരവിന്ദൻ അങ്കിൾ നേരത്തെ വന്നാലോ.. റെഡി ആയിരിക്കാം””

 ഗംഗ  നിധിനെയും നീരജിനെയും വിളിച്ചു കൊണ്ടു വീട്ടിലേക്ക്  നടന്നു.. രണ്ടു വീടുകൾക്കും ഇടയ്ക്കു മതിൽ ഉണ്ടെങ്കിലും ശങ്കർ ആ വില്ല വാങ്ങിയതിന് ശേഷം വില്ലകളെ തമ്മിൽ വേർതിരിച്ചിരുന്ന മതിലിന്റെ ചെറിയൊരു ഭാഗം പൊളിച്ചു അവിടെ ചെറിയൊരു ഗേറ്റ് സ്ഥാപിച്ചിരുന്നത്  കൊണ്ട്  പരസ്പരം രണ്ടു വില്ലകളിലേക്കും പോകാൻ പുറത്തു റോഡിലേക്കിറങ്ങേണ്ട ആവശ്യം ഉണ്ടായിരുന്നില്ല..

 

“” അച്ഛ ഇനി പറ്റിക്കുമോ അമ്മേ.. “” കല്യാണി ആശങ്കയോടെ ചോദിച്ചു. 

 

അരവിന്ദിന്റേയും ശങ്കറിന്റെയും തിരക്കുകൾ അറിയാമായിരുന്നത് കൊണ്ട് അമൃതയ്ക്കും അതായിരുന്നു സംശയം. 

 

“” ആർക്കറിയാം.. എന്തായാലും ഒരു അഞ്ചുമണിയാകുമ്പോ വിളിച്ചു നോക്കാം എന്നിട്ട് റെഡിയാവാം ” അമൃത തീരുമാനിച്ചു കഴിഞ്ഞിരുന്നു. 

 

കല്യാണി അഞ്ചു മണി ആകാറായപ്പോൾ തന്നെ അരവിന്ദന്റെ ഫോണിലേക്കു ഡയൽ ചെയ്തു… റിങ് പോകുന്നുണ്ടായിരുന്നെങ്കിലും ആരും എടുക്കുന്നുണ്ടായിരുന്നില്ല… കല്യാണി വീണ്ടും ഡയൽ ചെയ്തു മറു ഭാഗത്തു ബെൽ അടിച്ചു തുടങ്ങിയതും അവൾ ഫോൺ കാതോട് ചേർത്തു..

 

♦️♦️♦️♦️♦️♦️♦️♦️♦️♦️♦️♦️♦️

 

“” അച്ഛ ഇന്നും പറ്റിച്ചു അമ്മേ”” മുകളിൽ നിന്നും ഇറങ്ങി വന്നു ഫോൺ സെറ്റിയിലേക് ഇട്ടു കൊണ്ടു കല്യാണി സങ്കടത്തോടെ പറഞ്ഞു