മാന്ത്രികലോകം 15 [Cyril] 2139

അങ്ങനെ അന്‍പതോളം യോദ്ധാക്കളെ ഞങ്ങൾക്ക് നശിപ്പിക്കാന്‍ കഴിഞ്ഞു.

പക്ഷെ അതുകഴിഞ്ഞ് വിചാരിച്ചത്ര ഫലം ലഭിച്ചില്ല. കാരണം, ഞങ്ങൾ അദൃശ്യമായി അവര്‍ക്കടുത്ത് എത്തേണ്ട താമസം ഞങ്ങളുടെ സാന്നിധ്യം അറിഞ്ഞത് പോലെ യോദ്ധാക്കള്‍ ഒഴിഞ്ഞുമാറി കൊണ്ടിരുന്നു. എങ്ങനെയാണ് അവര്‍ക്ക് ഞങ്ങളെ അറിയാൻ കഴിയുന്നതെന്ന് ഞങ്ങൾക്ക് മനസിലായില്ല… പോരാത്തതിന് പലപ്പോഴും അവർ തിരിച്ച് ആക്രമിക്കുകയും ചെയ്തു.

അമ്മുവിനും സിദ്ധാര്‍ത്ഥിനും പോലും ആരെയും പിന്നീട് കൊല്ലാന്‍ കഴിഞ്ഞില്ല… കാരണം, അവർ അദൃശ്യമായ സഞ്ചരിച്ചാലും അവർ എവിടെയാണെന്ന് അറിയാവുന്നത് പോലെ യോദ്ധാക്കള്‍ അവർ രണ്ട് പേരില്‍ നിന്നും വഴുതി മാറി കൊണ്ടിരുന്നു.

ഒരുതവണ ഒരു യോദ്ധാവിന്‍റെ വാള്‍ കൊണ്ടുള്ള പ്രഹരം ഹെമീറയ്ക്ക് എൽക്കേണ്ടി വന്നു. സംരക്ഷണ കവചം അവളെ പൊതിഞ്ഞിരുന്നുവെങ്കിലും വാളിന്റെ പ്രഹരമേറ്റതും അവളുടെ കവചം അപ്രത്യക്ഷമായി… ഉടനെ വേറൊരു യോദ്ധാവ് ആ സാഹചര്യം മുതലെടുത്ത് അവളുടെ ഹൃദയത്തിലേക്ക് വാള്‍ ഇറക്കാൻ ശ്രമിച്ചെങ്കിലും, ഇത് ശ്രദ്ധിച്ച സിദ്ധാര്‍ത്ഥ് സമയത്തിന് അവളെയും കൊണ്ട് അപ്രത്യക്ഷനായി.

അതുകൊണ്ട് അദൃശ്യമായി അവരുടെ അടുത്ത് എത്താന്‍ ശ്രമിച്ചാലും അവർക്ക് ഞങ്ങളെ അറിയാൻ കഴിയുന്ന സാഹചര്യത്തിൽ, ഈ ഒളിച്ചുകളി ഞങ്ങൾ ഉപേക്ഷിച്ചു.

അതോടെ ഇടതടവില്ലാതെ ആ യോദ്ധാക്കള്‍ ഞങ്ങളെ ആക്രമിച്ച് കൊണ്ടിരുന്നു… നേരിട്ടും അദൃശ്യമായും അവർ ഞങ്ങളെ ആക്രമിച്ചു. അവരുടെ വാളും, അവർ പ്രയോഗിക്കുന്ന മാന്ത്രിക വിദ്യയും എല്ലാം ഞങ്ങളുടെ മേല്‍ ചെറുതായി സ്പര്‍ശിച്ചാൽ പോലും ഞങ്ങളുടെ സംരക്ഷണ കവചം അതിന്റെ ശക്തി നഷ്ട്ടപ്പെട്ട് അപ്രത്യക്ഷമായി പോകുന്നത് പതിവായി മാറി.

ആ സാഹചര്യത്തില്‍, അവരുടെ വാളുകൾ ഞങ്ങളുടെ ഹൃദയത്തില്‍ തുളച്ച് കയറും മുൻപായി ഞങ്ങൾ വേഗം അവിടെ നിന്നും അപ്രത്യക്ഷമായി ദൂരെ പ്രത്യക്ഷപ്പെടും. ചെറിയൊരു അശ്രദ്ധ മതി ഞങ്ങളുടെ ഹൃദയത്തിൽ അവരുടെ വാള്‍ തുളച്ചു കയറാൻ.

അതുകൊണ്ട്‌ ഈ പൂച്ചയും എലിയും കളി അവസാനിപ്പിച്ച് കൊണ്ട് അവസാനം ഞങ്ങളും രക്ഷാവലയത്തിനുള്ളില്‍ അഭയം തേടി. ഉടനെ റാലേനും, കൂട്ടരും, വിദ്യാര്‍ത്ഥികളും എല്ലാം ഞങ്ങളെ വളഞ്ഞു.

“ഇപ്പോൾ നിങ്ങൾ പിന്മാറിയത് നന്നായി…. ആ യോദ്ധാക്കള്‍ അത്ര നിസാരരല്ല. അവരെ നശിപ്പിക്കാന്‍ മറ്റേതെങ്കിലും മാര്‍ഗം കണ്ടുപിടിക്കണം…” റാലേൻ നെറ്റി ഉഴിഞ്ഞു കൊണ്ട് പറഞ്ഞു.

എന്നിട്ട് അയാൾ മുഖം ചുളിച്ചു കൊണ്ട് ഞങ്ങൾ പത്തുപേരുടെ മുഖത്തും മാറിമാറി നോക്കി ചോദിച്ചു, “പക്ഷേ എനിക്ക് ഒരുകാര്യം മനസ്സിലാവുന്നില്ല, നിങ്ങൾ പത്ത് പേര്‍ക്ക് മാത്രമേ ഒഷേദ്രസിന്റെ യോദ്ധാക്കളെ നശിപ്പിക്കാന്‍ കഴിയൂ എന്നാണ് അൽദീയ അന്ന് പറഞ്ഞത്… പക്ഷേ അമ്മു സിദ്ധാര്‍ത്ഥ് ഒഴികെ നിങ്ങൾ എട്ടുപേർക്ക് അവരെ നശിപ്പിക്കാന്‍ എന്തുകൊണ്ട്‌ കഴിയുന്നില്ല…?”

ഞങ്ങൾ എല്ലാവരുടെയും മനസ്സിലുള്ള സംശയവും അതുതന്നെയായിരുന്നു. പക്ഷേ ആര്‍ക്കും അതിന്റെ ഉത്തരം ഇല്ലായിരുന്നു.

രക്ഷാവലയത്തിനുള്ളിൽ ഞങ്ങൾ അഭയം പ്രാപിച്ചതും എല്ലാ യോദ്ധാക്കളും ഒരുമിച്ച് അതിനെ തകര്‍ക്കാനുള്ള ശ്രമം തുടങ്ങി.