മാന്ത്രികലോകം 15 [Cyril] 2140

‘ആരാണ് നമ്മുടെ മനസില്‍ സംസാരിച്ചത്…?’ എന്റെ സുഹൃത്തുക്കളുടെ മനസില്‍ ഞാൻ ചോദിച്ചു.

‘അറിയില്ല സുല്‍ത്താന്‍…!’ അവരുടെ മറുപടി ഉടനെ വന്നു.

“അപ്പോ എന്റെ ഈ ശക്തമായ നിയന്ത്രണ വിദ്യയെയും നിങ്ങള്‍ക്ക് തകര്‍ക്കാന്‍ കഴിഞ്ഞുവല്ലെ…?!” മലാഹി ഉറക്കെ ചിരിച്ചുകൊണ്ട് പിന്നെയും ആ വാള്‍ വീശി.

മാന്ത്രിക ലോകം പിന്നെയും മങ്ങി. എണ്ണമറ്റ, കാറ്റ് കൊണ്ട്‌ സൃഷ്ടിക്കപ്പെട്ട കൂറ്റന്‍ വാളുകൾ അന്തരീക്ഷത്തെ പോലും കീറി മുറിച്ചു കൊണ്ട്‌ ഞങ്ങളുടെ നേര്‍ക്ക് പാഞ്ഞു വന്നു.

അതിന്റെ ശക്തി കാരണം ലോകം തന്നെ കുലുങ്ങിയത് പോലെയാണ് തോന്നിയത്.

‘ഇനിയും നമ്മൾ വെറുതെ നിന്നാല്‍ ഒരുപക്ഷേ മലാഹി പുതിയ പല വിദ്യകളേയും നമുക്ക് നേരെ പ്രയോഗിച്ച് നമ്മെ അവന്റെ നിയന്ത്രണത്തിൽ ആക്കിയെന്ന് വരും…. അതുകൊണ്ട്‌ എത്രയും വേഗം ഇതിവിടെ അവസാനിപ്പിക്കണം…’ ഞാൻ എല്ലാവരുടെയും മനസില്‍ പറഞ്ഞു.

ഉടനെ ഞങ്ങളുടെ ആത്മാവില്‍ നിന്നും ദിവ്യശക്തിയുടെ കിരണങ്ങൾ പുറത്തേക്ക്‌ വ്യാപിച്ച് അത് അന്തരീക്ഷത്തില്‍ അലിഞ്ഞ് ചേരുകയും ചെയ്തു.

ശേഷം ശക്തമായ പ്രകമ്പനം സൃഷ്ടിച്ചു കൊണ്ട്‌ ആ അദൃശ്യമായ കിരണങ്ങള്‍ മാന്ത്രിക ലോകമാകെ വ്യാപിച്ച് മലാഹിയുടെ എല്ലാ വാളുകളേയും തകർത്തു….

മലാഹി അന്തിച്ചു നിന്നു.

പക്ഷേ ഞങ്ങൾ പ്രയോഗിച്ച ആ മാന്ത്രിക വിദ്യയുടെ കര്‍ത്തവ്യം പൂര്‍ത്തിയായില്ല…. മാന്ത്രിക ലോകമാകെ വ്യാപിച്ച് കിടന്ന ആ അദൃശ്യ കിരണങ്ങള്‍ പുളഞ്ഞ് തിരിഞ്ഞ് ചുരുങ്ങി മലാഹിക്ക് ചുറ്റുമായി ഒരു കൊച്ചു തടവറയായി രൂപാന്തരപ്പെട്ടു.

അപ്പോഴാണ് തനിക്ക് ചുറ്റും എന്താണ്‌ സംഭവിച്ചതെന്ന് മലാഹി ബോധവാനായത്.

അവന്റെ കണ്ണില്‍ എപ്പോഴും നിറഞ്ഞ് നിന്നിരുന്ന അഹങ്കാരം ഇപ്പോൾ ഞങ്ങൾക്ക് കാണാന്‍ കഴിഞ്ഞില്ല.

“വിഡ്ഢി യോദ്ധാക്കളെ!!, അവരെ ആക്രമിച്ച് നശിപ്പിക്കു…..!! എന്നെയും രക്ഷിക്കൂ.” മലാഹി ഭയന്ന ശബ്ദത്തില്‍ അലറി വിളിച്ചു.

എന്നിട്ട് മലാഹി പേടിയോടെ ഞങ്ങളെ നോക്കി… അവന്‍ എന്തോ പറയാൻ തുടങ്ങിയതും നൂറ് ശക്തമായ ദേഹിബന്ദികൾ അവന്റെ ഉള്ളില്‍ പ്രകാശ വേഗത്തിൽ പ്രവേശിച്ച് അവന്റെ ആത്മാവിനെ ബന്ധിച്ചു…. സംസാരിക്കാനും ചലിക്കാനും കഴിയാതെ മലാഹി പ്രതിമ പോലെ നിന്നു.

പക്ഷേ ഇപ്പോഴും പ്രശ്നങ്ങൾ അവസാനിച്ചില്ല…. കാരണം മലാഹിയിൽ നിന്നും കല്പന ലഭിച്ച ഒഷേദ്രസിന്റെ യോദ്ധാക്കള്‍ അവരവരുടെ കഴുത്തിന് രണ്ട് വശത്ത് നിന്നും അവരുടെ വാളുകളെ വലിച്ചൂരി എടുത്തുകൊണ്ട് ഞങ്ങളെ നോക്കി.