മഹാനദി 11 (ജ്വാല ), ക്ലൈമാക്സ്‌ 1627

അമ്മയാണ് പറഞ്ഞത് അപ്പോൾ, അമ്മയുടെ കണ്ണുകൾ അപ്പോൾ നിറഞ്ഞു തുളുമ്പുന്നുണ്ടായിരുന്നു. 

” അച്‌ഛാ, ഞാൻ കല്യാണത്തിന് എതിരൊന്നും അല്ല, എന്റെ എല്ലാ വിവരങ്ങളും അറിഞ്ഞു ഒരാൾ വന്നാൽ ഞാൻ തയ്യാർ ആണ്, അത് എന്നോടുള്ള അനുകമ്പ കൊണ്ടാകരുത്. 

അതും പറഞ്ഞു അവൾ എഴുന്നേറ്റു.,.,. മനസ്സാകെ കലുഷിതമാണ്, ഒരു തീരുമാനം എടുക്കണം, 

അച്ഛനും, അമ്മയെയും ഇനി ദുഖിപ്പിക്കാൻ കഴിയില്ല, മുഖം കഴുകി വസ്ത്രം മാറി ജനനി വടക്കുംനാഥക്ഷേത്രം ലക്ഷ്യമാക്കി ഇറങ്ങി, തന്റെ ദുഃഖങ്ങൾ ഇറക്കി വയ്ക്കാൻ ഇതിലും വലിയൊരു അത്താണിയില്ല. 

വീടിനു മുന്നിലൂടെ വന്ന ബസിനു കയറി, ശക്തൻ തമ്പുരാൻ ബസ്സ്റ്റാൻഡിൽ ഇറങ്ങി, ഓട്ടോ വിളിക്കണ്ട നടക്കാം എന്ന് ഉറപ്പിച്ചു, ആൾക്കൂട്ടത്തിനിടയിലൂടെ അവൾ നടന്നു, മുനാസിപ്പൽ സ്റ്റാൻഡിലേക്ക് നടക്കുന്ന വഴിക്കിരുവശവും വഴിയോരക്കച്ചവടക്കാരുടെ നീണ്ട നിരയും കടന്നവൾ മുന്നോട്ട് നീങ്ങി. 

ഭിക്ഷയ്ക്കായി കൈകൾ നീട്ടി നിൽക്കുന്നവരെ അവഗണിച്ച് മുന്നോട്ട് തിരക്കിട്ട് നടന്നു. പെട്ടന്നാണ് ജനനിയുടെ മുന്നിൽ ഒരു സ്ത്രീയും, പുരുഷനും കൂടി നടന്ന് പോകുന്നത് കണ്ടത്,  ഭാര്യയും, ഭർത്താവും ആണോ? അയാൾക്ക് ഒരു കാൽ ഇല്ല, ഊന്നുവടിയിൽ കുത്തി പോകുമ്പോഴും ആ സ്ത്രീ മറ്റൊരു ഊന്നുവടി പോലെ അയാളെ താങ്ങി നിർത്തുന്നുണ്ടായിരുന്നു. ആ കാഴ്ച്ച അവൾക്ക് മറ്റൊരു ഓർമയാണ് സമ്മാനിച്ചത്.,., 

അവളുടെ മനസിൽ സന്ദീപേട്ടനെ ഓർമവന്നു, ആ ഊന്നുവടി താനായിരുന്നെങ്കിൽ… 

ഇനി ജീവിതത്തിൽ ഒരു പുരുഷൻ വേണ്ട എന്ന തന്റെ മനസ്സിലാണ് സന്ദീപ് എന്നൊരു മോഹം ഉദിച്ചത് പക്ഷെ ഏട്ടന് തന്നെ ഇഷ്ടമാകുമോ? 

ഏട്ടൻ ഇത്രയും വലിയ ദുരന്തം ഏറ്റുവാങ്ങിയ മനുഷ്യൻ ആണ്, തന്റെ കഥകൾ  കേട്ടിട്ട് ഒരു ഭയം ഉണ്ടാകില്ലേ? മനസ്സിൽ ഒരായിരം ചിന്തകൾ ആണ്.,., അതുകൊണ്ട് തന്നെ അവൾ അമ്പലത്തിൽ എത്തിയത് അറിഞ്ഞില്ല.