നന്ദന 3[Rivana] 166

 

അവസാനം പേപ്പറും കെട്ടി ലാസ്റ്റ്‌ ബെല്ലടിച്ചപ്പോ മിസ്സിന് പേപ്പർ കൊടുത്ത് ഇറങ്ങി. ഞാൻ അപ്പോഴാണ് വേറെ ഒന്ന് ശ്രദ്ധിക്കുന്നത്. ഇന്നലത്തെ എക്‌സാമിൽ നേരത്തെ ഇറങ്ങിയവർ ഇന്ന് എല്ലാം കഴിഞ്ഞാണ് ഇറങ്ങിയത് അതിൽ എന്തോ പന്തികേട് എനിക്ക് തോന്നി.

 

ഞാൻ എന്റെ ബാഗിലേക്ക് കയ്യിലുള്ളത് എല്ലാം വെക്കാൻ തുടങ്ങി.

 

“ നന്ദന “

 

“ മ്മ്മ് “

 

ഞാൻ തിരിഞ്ഞു അവനെ നോക്കി എന്താ എന്ന മൂളി.

 

“ താൻ എന്ത് പണിയാ ഈ കാണിച്ചേ, നമ്മളോട് ഒന്നും ഒരു മനസാക്ഷി ഇല്ലാത്ത പോലെ “

 

“ ഞാൻ എന്ത് ചെയ്‌തെന്ന പറേണെ “

 

 

“ നീ ഒന്നും ചെയ്തില്ലല്ലേ, ആൻസർ ഷീറ്റ് ചോദിച്ചപ്പോ പിന്നെ നീ എന്താ തരാതിരുന്നത്. മിസ്  എന്റെ അൻസർ ഷീറ്റ് നിൻ്റേൽ കണ്ടിരുന്നു. ഇനി അടുത്തതും തന്നിട്ട് മിസ്സ്‌ കണ്ടിട്ട് വേണം എനിക്ക് എക്സാം എഴുതാൻ പറ്റതാവാൻ “

 

“ എന്താ നന്ദന ഇങ്ങനെ, അങ്ങനെ ഒന്നും ഉണ്ടാവില്ല ധൈര്യയിട്ട്‌ ഇരുന്നാൽ ഇതൊന്നും സംഭവിക്കില്ല, ഇതൊക്കെ വളരെ കൂളായി സിമ്പിൾ ആയി ചെയ്യേണ്ട കാര്യല്ലേ, എന്തായാലും ഇന്നത്തേത് പോട്ടെ ഇനി നാളെ തന്നാ മതി “

 

“ എനിക്കെങ്ങും വയ്യ എന്റെ ആൻസർ പേപ്പർ തരാൻ, പരീക്ഷ എഴുതണം എന്നുണ്ടേൽ പഠിച്ചു വന്നെഴുതികൂടെ ഇങ്ങനെ കോപ്പി അടിച്ചെഴുതുന്നെന്തിനാ, മിസ്സും പറഞ്ഞല്ലോ പഠിക്കാൻ നല്ല കഴിവൊക്കെ ഉണ്ടന്ന് “

 

“ പഠിച്ച് എഴുതാൻ ഒക്കെ പറ്റും, പക്ഷെ മെനക്കെടാ കോപ്പി അടിച്ചെഴുതുന്നേൽ ആണ് സുഖം. പിന്നെ ഇത് ക്രിസ്മസ് പരീക്ഷ അല്ലേ. പബ്ലിക് ഒന്നുമല്ലല്ലോ. പബ്ലിക് എക്‌സാമിന് പഠിച്ചെഴുതി ഫുൾ  A+ വാങ്ങാം ഇപ്പൊ ഇങ്ങനെ കോപ്പിയടിച്ചു എക്സാം എഴുതാം “

 

“ അപ്പൊ നന്നാവാനുള്ള തീരുമാനം ഇല്ലല്ലേ “

 

“ ഹേയ് ഇല്ല, അപ്പൊ ശരി ഞാൻ പോട്ടെ. പിന്നെ മറക്കണ്ട നാളെ പഠിച്ചു വരണം. എന്നിട്ട് ആൻസർ ഷീറ്റ് തരണം ഒക്കെ “

 

അവൻ പറഞ്ഞു കൊണ്ട് നടന്നു.

 

“ തരില്ലട്ടൊ വേണേൽ പഠിച്ചു വന്നോ “

 

ഞാൻ വിളിച്ചു പറഞ്ഞു.

 

“ അതൊക്കെ നാളെ നോക്കാം “

 

അവൻ പോകുന്നെൻ ഇടയിൽ പറഞ്ഞു.