ദേവലോകം 11 [പ്രിൻസ് വ്ളാഡ്] 593

അച്ഛാ വൈഗയുടെ കാറിൽ അവളുടെ പിസ്റ്റൽ ഉണ്ട്…. അവളുടെ ഒരു സ്വഭാവത്തിന് ഒന്നു പറഞ്ഞു രണ്ടിന് അവൾ അതെടുത്ത് വച്ച് പൊട്ടിക്കും… അച്ഛൻ പറഞ്ഞത് വെച്ച് കർണ്ണനും ഒട്ടും മോശമാകാൻ വഴിയില്ല… എന്തും സംഭവിക്കാം ….

ഭദ്രനും ആധിയായി ഉടൻതന്നെ അവരിരുവരും അമറിന്റെ ജീപ്പ് കോമ്പസും എടുത്ത് വൈഗക്ക് പിന്നാലെ പോയി…

രാമപുരത്തേക്ക് പ്രവേശിക്കുന്ന ഭാഗത്ത് റോഡിന് അത്യാവശ്യം നല്ല വീതിയുണ്ട്… അവിടെ റോഡിന് ഒരു സൈഡിലായി അഞ്ച് ലോറികൾ അടുത്തടുത്തായി നിർത്തിയിട്ടിരിക്കുന്നു… അതിനു മുന്നിൽ മറ്റൊരു ലോറി കുറുക്ക് നിർത്തിയിട്ടുണ്ട്.. ഫ്രണ്ടിൽ ഒരു ജീപ്പും അതിനു മുന്നിലായി അവശരായി കുറച്ച് ആളുകളും കിടപ്പുണ്ട്.

തടിലോറിക്ക് എസ്കോർട്ട് വന്ന ഗുണ്ടകളാണ് …കർണ്ണൻ അവരെയെല്ലാം അടിച്ചു ചുരുട്ടി ഇട്ടിരിക്കുകയാണ്…..

സ്വല്പം മാറി തൻറെ ബുള്ളറ്റ് ഡെസേർട്ട് സ്റ്റോമ് , സെൻട്രൽ സ്റ്റാൻഡ് ഇട്ട് അതിനു മുകളിലായി കയറിയിരുന്ന് തൻറെ സിഗ്നേച്ചർ ചുരുട്ട് വലിക്കുകയാണ് കർണ്ണൻ…. ചുറ്റും കുറച്ചുപേർ കൂടിയിട്ടുണ്ട് ദേവലോകത്തെ അനന്തനായുള്ള വെയ്റ്റിംഗ് ആണ്….. ചുറ്റും കൂടിയവരാകട്ടെ ഇന്ന് അനന്തന് എത്ര അടി കിട്ടും എന്ന കണക്കെടുപ്പിലും…

അപ്പോഴാണ് ഒരു കാർ വന്ന് യൂടേൺ അടിച്ച് ഗുണ്ടകൾ കടക്കുന്ന ജീപ്പിന് അരികിൽ ആയി നിർത്തിയത്… അതിൽ നിന്നും വൈഗ പുറത്തേക്ക് ഇറങ്ങി…. ആദ്യം അവരുടെ കണ്ണ് പോയത് ജീപ്പിലും , അതിന് ചുറ്റും അവശരായിരിക്കുന്ന ആളുകളിലും ആണ്…. അവരെ അവൾ പുച്ഛത്തോടെ നോക്കി ..ശേഷം തന്റെ കാറിനു മുന്നിലായി വന്നു ബോണറ്റിൽ കൈകെട്ടി ചാരിനിന്നു..

കർണ്ണൻ അവളുടെ ഓരോ ചലനങ്ങളും മനസ്സുകൊണ്ട് ഒപ്പിയെടുക്കുകയായിരുന്നു. താൻ കാണാൻ കൊതിച്ച തന്റെ പെണ്ണ് തന്റെ മുന്നിൽ വന്നു നിൽക്കുന്നു… അവൻ ആ നിമിഷങ്ങൾ ആസ്വദിക്കുകയായിരുന്നു…. അവളുടെ കൈ കെട്ടിയുള്ള ആ നിൽപ്പിന് തന്നെ ഒരു പ്രത്യേക ചന്തമാണ് …അവൻ ബുള്ളറ്റിൽ നിന്ന് ഇറങ്ങി അവൾ നിൽക്കുന്ന പോലെ തന്നെ തൻറെ ബുള്ളറ്റിൽ ചാരി കൈകൾ പിണച്ചു കെട്ടി  മുഖത്തോട് മുഖം നോക്കി നിന്നു….

തടി വാങ്ങാൻ കാശില്ലെങ്കിൽ മറ്റുള്ളവർ വാങ്ങിക്കൊണ്ടുവരുന്ന മുതൽ തട്ടിയെടുക്കാനല്ല നോക്കേണ്ടത് …മില്ലഅടച്ച് വീട്ടിൽ പോയിരിക്കണം …അതാണ് അന്തസ്സ്..

വൈഗ അവന്റെ മുഖത്ത് നോക്കി തന്നെ പറഞ്ഞു ..

അതെങ്ങനെ ശരിയാവും മിസ്സ് …?????അവൻ പേരറിയാതെ വൈഗയെത്തന്നെ നോക്കി….

വൈഗ…. വൈഗ ഭദ്രൻ…… അവൾ പറഞ്ഞു.

വൈഗ കർണ്ണൻ…. അതാടീ പെണ്ണേ നിനക്ക് ചേരുന്നത് …നിൻറെ പേര് ഞാൻ അങ്ങനെ മാറ്റിയിരിക്കും …അവൻ ചിരിയോടെ മനസ്സിൽ പറഞ്ഞു.

അപ്പോൾ മിസ്സ് വൈഗാഭദ്രൻ ….ഞാൻ പറയുന്നത് എന്താണെന്ന് വെച്ചാൽ , ഞാൻ എൻറെ മില്ലിലേക്ക് കരാർ ഉറപ്പിച്ച തടി കള്ളും കാശും കൊടുത്തു ഉടായിപ്പിൽ തട്ടിയെടുത്ത ദേവലോകത്തെ അനന്തൻ തമ്പുരാൻറെ അത്ര അന്തസ്സ് എനിക്കില്ല….