ഡെറിക് എബ്രഹാം 17 [അഹമ്മദ് ശഫീഖ് ചെറുകുന്ന്] 231

ഡെറിക് എബ്രഹാം 17
( In the Name of COLLECTOR )

~~~~~~~~~~~~~~~~~~~~~~~~~~

✒️ അഹമ്മദ് ശഫീഖ് ചെറുകുന്ന്

PART 17

Previous Parts

അധികം താമസിയാതെ ഗീതയും സേവിയറും അജിത്തും മുകളിലേക്ക് കയറിപ്പോയി…അപ്പോൾ , ഡെറിക് കുട്ടികളെയൊക്കെ അവന്റെ ചുറ്റുമിരുത്തി എന്തൊക്കെയോ സംസാരിച്ചു കൊണ്ടിരിക്കുകയായിരുന്നു… മൂന്ന് പേരും അവിടേക്ക് നടന്നു….

അവർ പ്രതീക്ഷിച്ചത് പോലെ തന്നെ , ഡെറിക് കുട്ടികൾക്കുണ്ടായ മോശം അനുഭവങ്ങളിൽ നിന്നും അവർ മുക്തി നേടാനുള്ള വഴി നോക്കുകയായിരുന്നു…അവരുടെ കറ പറ്റിയ മനസ്സിനെ സന്തോഷത്തിലേക്ക് തിരിച്ചു കൊണ്ട് വരാൻ വേണ്ടി ഓരോ തമാശകളും പറഞ്ഞു കൊണ്ട് അവരെ ചിരിപ്പിക്കുന്നുമുണ്ട്….തകർന്ന് പോയ ആ കുട്ടികളുടെ മനസ്സിനെ ജീവിതത്തിലേക്ക് തിരിച്ചു കൊണ്ട് വരാൻ അങ്ങനെയൊരു പ്രചോദനം അനിവാര്യമായിരുന്നു..
വളരെ ബുദ്ധിമുട്ടിയിട്ടാണെങ്കിലും അവനതിന് ശ്രമിച്ചു കൊണ്ടേയിരുന്നു… ഒരു വിധത്തിൽ കുട്ടികളിൽ കുറച്ചെങ്കിലും ഒരു ആത്മവിശ്വാസം ഉണ്ടാക്കാൻ അവന് സാധിച്ചു എന്ന് തന്നെ പറയാം..
അവൻ ചോദിക്കുന്ന ചോദ്യങ്ങൾക്ക് സ്കൂളിലെ പോലെ , ഉഷാറോട് കൂടിയുള്ള കുട്ടികളുടെ മറുപടി കാണുമ്പോൾ അത് വ്യക്തമാകുന്നുണ്ട്…എങ്കിലും , അക്രമികളാൽ ശാരീരികപീഡനം അനുഭവിച്ചവരെ അതിൽ നിന്ന് വേറിട്ടു മനസ്സിലാക്കാൻ പറ്റുന്നുണ്ടായിരുന്നു…. അവരുടെ മുഖം , ആകാശത്ത് കാർമേഘങ്ങൾ നിറഞ്ഞത് പോലെ ഇരുൾ മൂടിയിരിക്കുകയായിരുന്നു…

അവർ മൂന്ന് പേരെയും കണ്ടപ്പോൾ ഡെറിക് കുട്ടികളോടുള്ള സംസാരം മതിയാക്കിക്കൊണ്ട് അവരുടെ അടുത്തേക്ക് നടന്നു…

“സോറി ഡെറിക്…
അറിയാതെ ഞാനെന്തൊക്കെയോ പറഞ്ഞു പോയി….”

“ആഹാ… അതെപ്പോൾ പറഞ്ഞു… ഞാൻ കേട്ടില്ലല്ലോ….? ”

“കേട്ടില്ലെങ്കിലും സോറി..
താൻ ചെയ്ത കാര്യങ്ങളൊന്നും ഞാൻ അറിഞ്ഞിരുന്നില്ല…. എപ്പോഴും എല്ലാ കാര്യത്തിനും പ്രതികരിക്കുന്ന താൻ , ഒന്നും മിണ്ടാതെ പോയപ്പോഴുള്ള സങ്കടത്തിൽ എന്തൊക്കെയോ പറഞ്ഞു പോയതാണ്…”

“താനൊന്നു പോടോ.. ഇതൊന്നും അങ്ങനെ ഗൗരവമായി എടുക്കേണ്ട ആവശ്യമില്ല…”

“എടുക്കണം ഡെറിക്…തന്നെ ഇവൾ അത്രയും ചീത്ത പറഞ്ഞിരുന്നു.. കേട്ടിട്ട് ഞങ്ങൾക്ക് തന്നെ എന്തോ..
വല്ലാത്ത ലജ്ജ തോന്നി…
അല്ലെടോ അജിത്…? ”

“അതേ.. അതേ….ഇവൾ ഡെറിക്കിനെ കുറിച്ച് ഇങ്ങനെയൊക്കെ പറയുന്നുമെന്ന് സ്വപ്നത്തിൽ പോലും കരുതിയില്ല…”

സേവിയറും അജിത്തും എരിതീയിൽ എണ്ണ വാരിക്കോരി ഒഴിച്ചു…ഇതൊക്കെ കേട്ടപ്പോൾ ഗീതയ്ക്ക് ദേഷ്യം പിടിച്ചു…അവളുടെ ഭാവങ്ങൾ മാറി മറയുന്നത് കണ്ട ഡെറിക്കിന് ചിരി പിടിച്ചു നിർത്താനായില്ല…