ഡെറിക് എബ്രഹാം 14 [അഹമ്മദ് ശഫീഖ് ചെറുകുന്ന്] 259

“ഇരിക്കാനല്ല ഞാൻ വന്നത്…. ഇതെന്താണ് സംഭവമെന്ന് എനിക്ക് അറിയണം…. അറിഞ്ഞേ പറ്റൂ…. എന്റെ ചേച്ചിയുടെ ജീവന് ഒരു പട്ടിയുടെ വില പോലും കൊടുത്തില്ല എന്നറിയുമ്പോൾ സഹിക്കാനാവുന്നില്ല സാർ ”

“താൻ ഇരിക്കെടോ… ഞാൻ പറയാം….”

മനസ്സ് വന്നില്ലെങ്കിലും കമ്മീഷണറുടെ നിർബന്ധപ്രകാരം അവൻ ഇരുന്നു…

“അനുപമ മരിച്ചതിന് ശേഷം രണ്ടാഴ്ച കഴിഞ്ഞപ്പോൾ തന്നെ ആ നാല് കുറ്റവാളികളും ജയിൽ മോചിതരായിരുന്നു…കോടതിക്ക് വാദിയും തെളിവുകളും ഇല്ലാതെ എന്ത് പ്രതികൾ….”

“തെളിവുകൾ ഇല്ലെന്നോ…?

നാണമില്ലേ സാർ നിങ്ങൾക്കിത് പറയാൻ…. എന്റെ പെങ്ങളെന്നോ താങ്കളുടെ ആത്മ സുഹൃത്തിന്റെ കുടുംബമെന്നോ നോക്കേണ്ട…..

നാടിന് വേണ്ടി ജീവിച്ച ഒരു കളക്ടറായിരുന്നില്ലേ എന്റെ ചേച്ചി…..

ആ ജീവന് ഒരു വിലയും കൊടുക്കാൻ തോന്നിയില്ലേ നിങ്ങൾക്കൊക്കെ….? ”

“ഡെറിക്…താൻ ഒന്നും അറിയാതെ സംസാരിക്കരുത്….

ഇത് കേരളമല്ല….. തമിഴ്നാടാണ്….. കേരളത്തിലെ പോലെ നട്ടെല്ലുള്ള പോലീസുകാരോ , നാട്ടുകാരെ സേവിക്കാൻ മാത്രം ജീവിക്കുന്ന മന്ത്രിമാരോ ഇവിടെയില്ല….