ആ രാത്രിയിൽ 3 [പ്രൊഫസർ ബ്രോ] 222

ദേവൻ വീണ്ടും പുറത്തേക്ക് നടന്നു

“രാജേട്ടാ… ഇവിടുത്തെ ജോലിക്കാർ എവിടെ.”

പുറത്ത് കാർ പോർച്ചിൽ തന്നെ നിന്ന രാജൻ ദേവൻ വിളിച്ചതും അവന്റെ അരികിലേക്ക് എത്തി

“എല്ലാവരെയും പുറത്താക്കാൻ പറഞ്ഞത് കൊണ്ട് ഞാൻ അവരെയും പുറത്താക്കി സർ”

“രാജേട്ടാ….”

അവന്റെ നീട്ടിയുള്ള ആ വിളിയുടെ അർഥം രാജന് പെട്ടന്ന് തന്നെ മനസ്സിലായി

“സോറി സർ… ഞാൻ ഇപ്പൊ വിളിക്കാം.”

“ആ ചെന്ന് നോക്ക്… അവർ അവിടെ തന്നെ ഉണ്ടെങ്കിൽ ഭാഗ്യം”

ദേവന്റെ ശകാരം കേട്ട രാജൻ ഗേറ്റിന്റെ അരികിലേക്ക് ഓടി, അധികം വൈകാതെ തന്നെ അയാൾ തിരിച്ചു വന്നു അപ്പോൾ അയാളുടെ ഒപ്പം ഒരു അന്പതിനു മുകളിൽ പ്രായമുള്ള ഒരു പുരുഷനും മുപ്പതിന് മുകളിൽ പ്രായം തോന്നിക്കുന്ന ഒരു സ്ത്രീയും ഉണ്ടായിരുന്നു

“ഇവരാണ് സർ ഇവിടുത്തെ ജോലിക്കാർ”

“ആ, ശരി നിങ്ങൾ ഉള്ളിലേക്ക് വാ…”

അവർ രണ്ട് പേരും ഉള്ളിലേക്ക് ഉമ്മറത്തേക്ക് കയറിയതും ദേവൻ രാജന്റെ അരികിൽ ചെന്നു

“സോറി രാജേട്ടാ… അപ്പോഴത്തെ ദേഷ്യത്തിൽ പറഞ്ഞതാ…”

രാജൻ മാത്രം കേൾക്കുന്ന രീതിയിൽ അയാളുടെ ചെവിയിൽ ആണ് അവൻ അത് പറഞ്ഞത്

“തെറ്റെന്റെയല്ലേ സർ… അതിനെനിതനാ സർ സോറി പറയുന്നത്…”

“എന്നാലും ഞാൻ രാജേട്ടനെ വഴക്ക് പറയാൻ പാടില്ലായിരുന്നു”

“സാരമില്ലന്നെ…”