ആ രാത്രിയിൽ 3 [പ്രൊഫസർ ബ്രോ] 221

“അപ്പൊ ഇനി ഒന്നും ചോദിക്കാനില്ലല്ലോ… നിങ്ങൾ പോയിരുന്നെങ്കിൽ ഞങ്ങൾക്ക് ഞങ്ങളുടെ ജോലി ചെയ്യാമായിരുന്നു ”

ദേവൻ പറഞ്ഞ് നിർത്തിയതും എല്ലാവരും പിരിഞ്ഞു തുടങ്ങി

തിരിഞ്ഞു നടന്ന ഗംഗ കുറച്ചു ദൂരം ചെന്നതിന് ശേഷം ഒരിക്കൽക്കൂടി ദേവനെ തിരിഞ്ഞു നോക്കി , അവളെ തന്നെ ശ്രദ്ധിച്ചുകൊണ്ടിരുന്ന ദേവനും അത് കണ്ടു

ദേവൻ തന്നെ ശ്രദ്ധിക്കുന്നുണ്ട് എന്ന് കണ്ടതും അവന്റെ നേരെ നോക്കി ചിറി കോട്ടിക്കൊണ്ട് അവൾ നടന്നു നീങ്ങി

കുറച്ചു മാറി ജീപ്പിന്റെ അരികിൽ നിന്ന രാജനെ ദേവൻ തന്റെ അരികിലേക്ക് വിളിച്ചു.

“രാജേട്ടാ… ആ ഗേറ്റ് അടച്ചെക്ക്… ഒരാളെയും അകത്തേക്ക് വിടേണ്ട, ഇപ്പൊ ഫോറൻസിക് ടീം വരും അവരെ മാത്രം ഉള്ളിലേക്ക് വിട്ടാൽ മതി…”

“ശരി സർ.”

രാജൻ ഗേറ്റിന്റെ അരികിലേക്ക് നടന്നതും ദേവൻ വീണ്ടും വീടിന്റെ വാതിൽ അടച്ചുകൊണ്ട് അകത്തേക്ക് പോയി

“എന്തായെടോ… എല്ലാരും പോയോ.”

“പോയി സർ…”

“Tv ക്കാരുടെ അടുത്ത് വല്ല മണ്ടത്തരവും എഴുന്നള്ളിച്ചോ… നമ്മുടെ വായിൽ നിന്നും എന്തെങ്കിലും വീണാൽ അതിൽ നിന്നും കുറ്റവാളിയെ അവർ തന്നെ കണ്ടുപിടിച്ചു കളയും അതാ ഇനം.”

മരക്കാരുടെ അവനെ കളിയാക്കിയുള്ള സംസാരത്തിൽ അവൻ ഒന്ന് ചിരിച്ചു

“ഏയ്യ്… ഞാൻ ഒന്നും പറഞ്ഞില്ല സർ… പിന്നെ ഫോറൻസിക് ടീം ഒരു അരമണിക്കൂറിൽ ഇവിടെ എത്തിയേക്കും.”

“ആ ശരി… അതിനുള്ളിൽ നമുക്ക് വേറെ എന്തെങ്കിലും കിട്ടുമോ എന്ന് നോക്കാം… ആ, ഇവിടെ ജോലി ചെയ്യുന്ന രണ്ട് പേര് ഇല്ലേ… അവരെ ഇങ്ങോട്ട് വിളി.”