ആ രാത്രിയിൽ 3 [പ്രൊഫസർ ബ്രോ] 221

“സർ… രാമൻ ചേട്ടൻ ആദ്യം ഭയന്നെങ്കിലും പിന്നെ എന്നെ സമാധാനിപ്പിച്ചു, രാമൻ ചേട്ടനാണ് പറഞ്ഞത് പോലീസിൽ അറിയിക്കുന്നതിന് മുൻപ് അവിടെ ഉള്ള പണം എടുക്കാം എന്ന്, ഞാൻ സമ്മതിക്കില്ല എന്ന് പറഞ്ഞപ്പോൾ ഞാനും ജീവൻ സാറും തമ്മിൽ ഉള്ള ബന്ധം എന്റെ ഭർത്താവിനോട് പറയും എന്ന് ഭീഷണിപ്പെടുത്തി എന്നെ സമ്മതിപ്പിച്ചു. എന്ത് ചെയ്യണം എന്നറിയാതെ മുറിയുടെ പുറത്തേക്ക് പോയ ഞാൻ മുൻ വാതിൽ അടച്ചു, പിന്നെ അടുക്കളയിൽ ചെന്ന് ഒരു ഗ്ലാസ് വെള്ളം കുടിച്ചു തിരിച്ചു റൂമിൽ എത്തിയപ്പോൾ രാമൻചേട്ടൻ എന്നെ കാത്ത് നിൽക്കുകയായിരുന്നു. പിന്നെ എന്നോട് പറഞ്ഞു ചട്ടം കെട്ടിയതാണ് പോലീസ് ചോദിച്ചാൽ ഇങ്ങനെയേ പറയാവൂ എന്ന്, ഇതാണ് സർ നടന്നത് അല്ലാതെ ഞാൻ ഒന്നും ചെയ്തിട്ടില്ല…”

രേവതി അത് പറയുന്നതിനിടയിലും കരയുകയായിരുന്നു

“വെള്ളം എവിടെ നിന്നാണ് കുടിച്ചത്”

“അടുക്കളയിലെ പൈപ്പിൽ നിന്നും”

“ആ സിങ്കിൽ വേറെ എന്തെങ്കിലും കണ്ടോ…”

“ശ്രദ്ധിച്ചില്ല സർ…”

“ഹ്മ്മ്… ഞാൻ രാമന്കുട്ടിയോടും ചോദിക്കും നീ ഇപ്പൊ പറഞ്ഞ കഥ അല്ലാതെ അവൻ വേറെ വല്ല കഥയും പറഞ്ഞാൽ…”

മരക്കാർ പറഞ്ഞവസാനിപ്പിച്ചപ്പോൾ ദേവന്റെ ഫോൺ റിങ് ചെയ്തു

അവൻ മരക്കാരെ ഒന്ന് നോക്കിക്കൊണ്ട് കാൾ അറ്റൻഡ് ചെയ്തു

“..,.,.,.,..,.,..,”

“ഹ്മ്മ്… ശരി”

ദേവൻ കാൾ കട്ട്‌ ചെയ്ത് ഫോൺ പോക്കറ്റിൽ തന്നെയിട്ടുകൊണ്ട് മരക്കാരെ നോക്കി അതെ എന്ന ഭാവത്തിൽ തല കുലുക്കി

ദേവന്റെയും മരക്കാരുടെയും മുഖത്തു ഒരു നിരാശ പടർന്നു

ദേവാ ഇവരെ പുറത്തേക്ക് കൊണ്ട് പൊയ്ക്കോ എന്നിട്ട് അയാളെ വിളിക്ക്

ദേവൻ രേവതിയെയും കൂട്ടിക്കൊണ്ട് മരക്കാരുടെ ഓഫീസിന്റെ പുറത്തേക്ക് ഇറങ്ങി