ആ രാത്രിയിൽ 3 [പ്രൊഫസർ ബ്രോ] 222

“ആരാടോ ശേഖരാ അത്… നമ്മുടെ ജീവനെ തീർക്കാൻ പാകത്തിന് ചങ്കുറപ്പുള്ള ആരാ ഈ നാട്ടിൽ ഉള്ളത്..”

സ്പടികപാത്രത്തിൽ നുരഞ്ഞു പൊങ്ങുന്ന മദ്യം തന്റെ ചുണ്ടോട് അടുപ്പിച്ചുകൊണ്ട് സത്യൻ സംസാരിച്ചു തുടങ്ങി

“ചങ്കുറപ്പ്… അത് ജന്മനാ ഉണ്ടാകുന്നതല്ല, നമ്മളായിട്ട് ഉണ്ടാക്കി എടുക്കുന്നതാണ്, പ്രതികാരം എന്നൊരു വികാരം മനസ്സിൽ തോന്നിക്കഴിഞ്ഞാൽ ഏതൊരുത്തനും ഈ പറഞ്ഞ ചങ്കുറപ്പ് താനേ ഉണ്ടാകും”

“പക്ഷെ നമ്മളോട് പ്രതികാരം ചെയ്യാനായി ആരാ ഉള്ളത്… ആരെയും ബാക്കി വയ്ക്കാതെ അല്ലെ നമ്മൾ ഇതുവരെ എല്ലാം ചെയ്തിട്ടുള്ളു…”

“സർ… ഈ പോലീസ്‌കാർ പറയുന്നത് കേട്ടിട്ടുണ്ടോ, എല്ലാ കേസിലും ഒരു ലൂപ്പ് ഹോൾ ഉണ്ടാകും എന്ന്… അത് പോലെ തന്നെയാണ് സർ നമ്മുൾ ചെയ്യുന്ന ഓരോ കാര്യങ്ങളിളിലും. നമ്മൾ എത്രയൊക്കെ നോക്കി ചെയ്‌താലും എവിടെയെങ്കിലും ഒരു പാളിച്ച സംഭവിക്കാം… അല്ലെ കമ്മീഷ്ണറെ…”

സത്യനും ശേഖരനും തമ്മിൽ ഉള്ള സംസാരം ശ്രദ്ധിച്ചുകൊണ്ടിരുന്ന കമ്മീഷ്ണർ തനിക്ക് നേരെയുള്ള ചോദ്യം വന്നതും തല ഉയർത്തി

“അതേ,… ഞാൻ ആ കേസ് അന്വേഷിക്കുന്ന സി ഐ യെ വിളിച്ചിരുന്നു. പ്രിത്യേകിച്ചു തെളിവുകൾ ഒന്നും കിട്ടിയിട്ടില്ല എന്നാണ് അവർ പറഞ്ഞത്…”

“പിന്നെ എന്തിനാടോ യൂണിഫോമും കൊടുത്ത് എല്ലാത്തിനേം നിർത്തിയേക്കുന്നത്…”

“എല്ലാത്തിനും സമയം വേണ്ടേ സർ… അവർ അന്വേഷിക്കട്ടെ… എന്തെങ്കിലും കിട്ടാതെ ഇരിക്കില്ല…”

“ഹ്മ്മ് … എന്ത് വിവരം കിട്ടിയാലും ആദ്യം തന്നെ അറിയിക്കാൻ പറയണം…അവർക്ക് നിസാരമായി തോന്നുന്ന ചില കാര്യങ്ങളായിരിക്കും നമുക്ക് ഇത് ചെയ്തവനിലേക്കുള്ള വഴി തുറക്കുന്നത്…”

“ആ, പറഞ്ഞിട്ടുണ്ട് സർ… പിന്നെ ആ സി സി tv ദൃശ്യങ്ങൾ… അത് അവർക്ക് വേണം എന്ന് പറയുന്നുണ്ട്”

“അത് കൊടുത്തേക്ക്… അതിൽ നമുക്ക് പ്രശ്നം വരുന്ന ഒന്നും തന്നെ ഞാൻ കണ്ടില്ല”

“ശരി സർ… പക്ഷെ നമുക്ക് മുൻപ് അവർ പ്രതിയെ കണ്ടുപിടിച്ചാൽ…???”

“അതിനല്ലേടോ തന്നെ എല്ലാം അറിയിക്കണം എന്ന് പറഞ്ഞത്… അതാരാണ് എന്നുള്ളത് പോലീസ് കണ്ടുപിടിക്കട്ടെ, പക്ഷെ അവർക്കുള്ള ശിക്ഷ, അത് നമുക്ക് വിധിക്കാം ..”

ആർത്തു ചിരിച്ചുകൊണ്ട് അവർ ആ കുപ്പിയിലെ അവസാന തുള്ളിയും അകത്താക്കി