ആ രാത്രിയിൽ 3 [പ്രൊഫസർ ബ്രോ] 222

“ശേ… ഈ കേസ് അവസാനിച്ചു എന്ന് വിചാരിച്ചതാ… ഇവരല്ലെങ്കിൽ പിന്നെ ആരാ… ഒരെത്തും പിടിയും കിട്ടുന്നില്ലല്ലോടോ…”

രാമന്കുട്ടിയെയും ചോദ്യം ചെയ്തശേഷം മാരക്കാരുടെ ഓഫീസിൽ ചർച്ചയിൽ ആയിരുന്നു ദേവനും മരക്കാരും

“തുടങ്ങിയതല്ലേ ഉള്ളു സർ… എന്തെങ്കിലും തുമ്പ് കിട്ടാതിരിക്കില്ല”

“ഒരു ക്രൈം നടന്നാൽ ആദ്യത്തെ 24 മണിക്കൂർ ആടോ നമുക്കുള്ള തെളിവുകൾ തരിക, ഇവിടെ നമുക്കൊരു തെളിവും കിട്ടിയിട്ടില്ല, ആകെ കിട്ടിയത് മൂന്ന് ഫിംഗർ പ്രിന്റ്സ് അതിൽ ഒന്ന് മരിച്ച അയാളുടേത് തന്നെ പിന്നെ ഉള്ള രണ്ടെണ്ണം രാമന്കുട്ടിയുടെയും രേവതിയുടെയും…ആ കത്തിയിൽ ഉണ്ടായിരുന്ന ബ്ലഡ്‌ സ്റ്റൈൻ ജീവന്റേത് തന്നെ , പിന്നെ പറയാനുള്ളത് അയാളുടെ ചുണ്ടിൽ നിന്നും കിട്ടിയ മേക്കപ്പിന്റെ അംശമാണ് അത് രേവതിയുടേത് അല്ല എന്ന് തെളിഞ്ഞു കഴിഞ്ഞു…”

മരക്കാർ പറഞ്ഞു നിർത്തിയപ്പോൾ ദേവൻ എന്തോ ആലോചനയിൽ ആയിരുന്നു

“സർ വേറൊരു കാര്യം ശ്രദ്ധിച്ചോ… നമ്മൾ ആ വീട് മുഴുവൻ തിരഞ്ഞിട്ടും അയാളുടെ ഫോൺ കിട്ടിയില്ലല്ലോ…”

അത്രയും സമയം നിരാശയോടെയിരുന്ന മരക്കാരുടെ മുഖത്ത് ദേവന്റെ ആ ചോദ്യം ഒരുണർവ് നൽകി

“ശേ… ഇത്രയും സില്ലിയായ ഒരു കാര്യം ഞാൻ എങ്ങനെ വിട്ടു… രാമൻ കുട്ടി പറഞ്ഞത് അയാൾ അവിടെ നിന്നും ക്യാഷ് മാത്രമേ എടുത്തിട്ടുള്ളു എന്നല്ലേ…അയാൾ പറഞ്ഞത് നുണയല്ല എന്ന് തോന്നുന്നു.., എന്തായാലും താൻ സൈബർ സെല്ലിൽ വിളിക്ക്”

മരക്കാരുടെ ആവേശം കണ്ട ദേവന്റെ മുഖത്തും ഒരു പുഞ്ചിരി കളിയാടി

“സർ ആ സിസിടിവി യുടെ കാര്യം എന്തായി…”

“ഓഹ്‌ അത് തന്നോട് പറയാൻ മറന്നു… നമുക്ക് നേരിട്ട് കിട്ടില്ല എ സി യുടെ ഓഫീസിൽ പോയിട്ട് അവിടെ നിന്നും നമുക്ക് ആവശ്യമുള്ള ഭാഗം മാത്രം കിട്ടും എന്ന്… അന്വേഷണം തുടങ്ങിയില്ല അതിന് മുൻപ് തുടങ്ങി അവന്മാരുടെ കൈകടത്തൽ… നാറിയ രാഷ്ട്രീയക്കാർ…”

മരക്കാരുടെ രോക്ഷം മുഴുവൻ അയാളുടെ വാക്കുകളിൽ ഉണ്ടായിരുന്നു