പാളം തെറ്റിയ ജീവിതം

Author : FÜHRER

ചങ്ങാതിമാരേ.. കുറച്ചു കാലം മുന്നേ എഴുതിയ ഒരു കുഞ്ഞ് കഥയാണ്. മൂന്ന് പാർട്ടുകൾ ഉണ്ടാകും. ഇവിടെ കഥ വായിക്കാൻ എത്താറുണ്ടെങ്കിലും ആദ്യമായാണ് ഒരു കഥ പോസ്റ്റ് ചെയ്യുന്നത്. നിങ്ങൾ ഏവരും കഥ സ്വീകരിക്കുമെന്ന പ്രതീക്ഷയോടെ തുടങ്ങുകയാണ്.

ഒരിടത്തൊരിടത്തൊരു ദൈവം ഉണ്ടായിരുന്നു.. രൂപമില്ലാത്ത ദൈവം  ഇരുട്ടു നിറഞ്ഞലോകത്തു തനിച്ചായിരുന്നു. ശതകോടി വര്‍ഷങ്ങള്‍ ദൈവം ഏകനായി ആ ഇരുള്‍ നിറഞ്ഞ ലോകത്തു കഴിച്ചു കൂട്ടി. തന്റെ ഏകാന്തത ആ ദൈവത്തിനെ ഏറെ ദുഃഖിതനാക്കിയിരുന്നു. ഒടുവില്‍ സര്‍വശക്തനായ ദൈവം തൻ്റെ ഒറ്റപ്പെടൽ അവസാനിപ്പിക്കാൻ തീരുമാനിച്ചു. അങ്ങനെ ദൈവം പ്രകാശം സൃഷ്ടിച്ചു… പ്രപഞ്ചം സൃഷിടിച്ചു… സ്വര്‍ഗവും ഭൂമിയും കാലവും സമയവും സൃഷ്ടിച്ചു. മാലഖമാരെയും ജീവജാലങ്ങളെയും സൃഷ്ടിച്ചു. ഒടുവില്‍ ദൈവം തനിക്ക് ഏറ്റവും പ്രീയപ്പെട്ട മനുഷ്യനെയും സൃഷ്ടിച്ചു.

ദൈവത്തിൻ്റെ അമിത സ്നേഹത്തിൽ മനുഷ്യൻ അഹങ്കരിച്ചു. അവർ ദൈവമാർഗത്തിൽ നിന്നു വ്യതിചലിച്ചു. ഒടുവിൽ അത്യാഗ്രഹിയായ മനുഷ്യനെ ദൈവം തന്റെ പറുദീസയില്‍ നിന്നു പുറത്താക്കി ഭൂമിയിലേക്കയച്ചു.

അപ്പോഴും തന്റെ പ്രീയ സൃഷ്ടിക്കായി ഭൂമിയെ ദൈവം ഫലഭൂവിഷ്ടമാക്കി.. മനുഷ്യനു കൂട്ടായി ദൈവം പല ജീവികളെയും സൃഷ്ടിച്ചു. പക്ഷേ മനുഷ്യന്‍ തെറ്റുകളില്‍ നിന്നു തെറ്റുകളിലേക്കു പൊയ്‌ക്കൊണ്ടിരുന്നു.. അതു കണ്ട ദൈവം മനുഷ്യനെ നേര്‍വഴിക്കു നടത്താനായി   തന്റെ മാലാഖമാരെ അയച്ചു..