സ്വപ്ന സാഫല്യം [AJ] 80

അച്ഛൻ : അല്ലെങ്കിൽ അച്ഛന്റെ കൂടെ വരുമ്പോൾ അച്ഛന്റെ പൊന്നു മോൾ ഇങ്ങനെ അല്ലല്ലോ.. അച്ഛനെ ഒന്നും പറയാൻ സമ്മതിക്കില്ല. മോള് തന്നെ ഓരോന്നും പറഞ്ഞു കൊണ്ടേയിരിക്കും.. ഇന്ന് എന്താ അമ്മ വഴക്ക് പറഞ്ഞത് കൊണ്ടാണോ ഈ മൗനം? 

ലക്ഷ്മി  : ഏയ്.. ഇല്ല അച്ഛാ.. ഞാൻ ഇങ്ങനെ ഓരോന്ന് ഓർത്തു ഇരുന്നു പോയതാ. ( അത് പറഞ്ഞു പിന്നെയും ഒരു ആലോചനയിൽ മുഴുകുന്നു. യാത്രയിൽ അവൾ കാഴ്ചകൾ കാണുന്നുണ്ട് എങ്കിലും മനസ്സിൽ അവൾ കണ്ട സ്വപ്നം ആയിരുന്നു. അത് എന്ത് എന്ന് അറിയാനുള്ള ആകാംക്ഷ. സമയം കടന്നു പോകുമ്പോൾ അവളിൽ അത് ഏറി വന്നു കൊണ്ടിരുന്നു.. )

 

അങ്ങനെ 35 മിനിട്ട് കൊണ്ട് സ്കൂൾ എത്തി. അച്ഛൻ അവളെയും ഇറക്കി ഓഫീസിലേക്ക് തിരിച്ചു.

 

10 മണി. ക്ലാസ്സ് തുടങ്ങി കഴിഞ്ഞു. ക്ലാസ്സിലെ പഠിക്കുന്ന ഒരു  മിടുക്കി കുട്ടിയാണ് ലക്ഷ്മി. പക്ഷേ അന്ന് അവൾക്ക് ഒന്നും ശ്രദ്ധിക്കാൻ ആകുന്നില്ല. മനസ്സിൽ ആ രൂപം മാത്രം ആയിരുന്നു. അതിനോടുള്ള അടക്കാൻ ആകാത്തൊരു ആകർഷണം. ഉച്ചയകുന്നതിന് മുന്നേ തന്നെ അവളുടെ മനസ്സ് ആകെ തളർന്നു. ഇത് വരേയും ഇങ്ങനൊരു അവസ്ഥ അവൾക്ക് ഉണ്ടായിട്ടില്ല.. എങ്ങനെ ഒക്കെയോ വൈകിട്ട് വരെയും ക്ലാസ്സിൽ നിയന്ത്രിച്ചു ഇരുന്നു. അപ്പോളും അവൾക്ക് വീട്ടിൽ എത്തിയാൽ മതി എന്നുള്ള ചിന്ത മാത്രം ആയിരുന്നു. അങ്ങനെ 4 മണി ആയിരിക്കുന്നു. ക്ലാസ് കഴിഞ്ഞ് വേഗം സ്കൂൾ ബസ്സിനു അടുത്തേക്ക് നടന്നു. ഒരു വിൻഡോ സൈഡിൽ സീറ്റ്‌ കിട്ടി. അവിടെ ഇരുന്നു.

 

ഏകദേശം 5 മണിയോട് കൂടി വീട്ടിൽ എത്തി. അച്ഛൻ എത്തിയിട്ടില്ല. കുളിച്ചു ഡ്രസ്സ് ഒക്കെ മാറി അമ്മയുടെ അടുത്തേക്ക് പോയി. അമ്മ അടുക്കളയിൽ ചായ ഉണ്ടാക്കുകയാണ്. അവിടെ ഒരു ചെയറിൽ ഇരുന്നു. അപ്പോളും അവളുടെ ശ്രദ്ധ അവിടെങ്ങും ആയിരുന്നില്ല. വന്നുവോ അമ്മയുടെ പൊന്നു മോള്.. അമ്മ ചോദിച്ചു. എന്നിട്ട് അടുത്ത് പോയി അവളുടെ നെറ്റിയിൽ ഒരു ഉമ്മ കൊടുത്തു, രാവിലെ അമ്മ ദേഷ്യപ്പെട്ടത്തിൽ വിഷമം ഉണ്ടോ മോൾക്ക്? അതുകൊണ്ടാണോ ഇങ്ങനെ സങ്കടപ്പെട്ടു ഇരിക്കുന്നെ എന്ന് ചോദിച്ചു.

 

ഏയ്..ഇല്ല അമ്മേ.. അവൾ മറുപടി പറഞ്ഞു. ( പിന്നെയും ആലോചനയിൽ )

 

പിന്നെ എന്താ.. രാവിലെ കണ്ട ആൾ അല്ലല്ലോ ഇപ്പൊ. എന്തോ വല്യ ആലോചനയിൽ ആണല്ലോ. ഇതുവരേയും ഇങ്ങനെ കണ്ടിട്ടില്ല.. വളരെ ചുരുങ്ങിയ സമയം കൊണ്ട് അവളിൽ എല്ലാറ്റിനോടും അശ്രദ്ധമായ ഒരു പെരുമാറ്റം മഞ്ജുവിന് തോന്നിയിരുന്നു..

 

മഞ്ജു ടേബിളിൽ ചായയും കൂടെ കഴിക്കാൻ നല്ല ചൂട് ഉണ്ണിയപ്പവും കൊണ്ട് വച്ചു. ലക്ഷ്മി അത് അറിഞ്ഞത് പോലും ഇല്ല. ഉണ്ണിയപ്പം അവൾക്ക് ഒരുപാട് ഇഷ്ടമുള്ളത് ആണ്.. വീട്ടിൽ അത് ഉണ്ടാക്കുമ്പോൾ അതിന്റെ മണം അറിഞ്ഞു തേടി വരുന്ന കുട്ടി മുന്നിൽ ഉണ്ണിയപ്പം കൊണ്ട് വെച്ചിട്ട് പോലും അറിഞ്ഞിട്ടില്ല. ഈ കുട്ടിക്ക് ഇത് എന്താ പറ്റിയെ.. മഞ്ജു മനസ്സിൽ ചിന്തിച്ചു.