പ്രായശ്ചിത്തം [മനൂസ്] 3006

എന്റെ ഈ അവസ്ഥയ്ക്കും കാരണഭൂതനും ഞാൻ തന്നെ ആണ്..എല്ലാം താൻ ചെയ്ത തെറ്റുകളുടെ ഫലമാണ്.. ഉറ്റവരെ ഉപേക്ഷിച്ചു തന്നോടൊപ്പം ഇറങ്ങി വന്ന അവളുടെ വാക്കുകൾ യുവത്വത്തിന്റെ ചോരത്തിളപ്പിൽ അവളെയും മോളേയും ജീവനായിരുന്നെങ്കിൽ കൂടി ഞാൻ കേട്ടിരുന്നില്ല..കാശിന് വേണ്ടി ആളുകളെ തല്ലാനും കൊല്ലാനും നടക്കുന്നത് ഒരു ഹരമായി തോന്നി..

മറ്റുള്ളവരുടെ കണ്ണീര് കാണുക എന്നത് മറ്റെന്തിനേക്കാളും എനിക്ക് ലഹരിയായിരുന്നു..ഒരുപാട് പാവങ്ങളെ ക്രൂശിച്ചു…

പക്ഷെ ഒരുനാൾ ഏതൊരു കുറ്റവാളിക്കും സംഭവിക്കുന്ന അതേ ദുർഗതി എന്നെയും തേടിയെത്തി… ഒരു കേസിൽ അകപ്പെട്ട് ജയിലിലേക്ക് പോകേണ്ടി വന്നു..ആറ് വർഷത്തേക്ക് ആയിരുന്നു ശിക്ഷ…

പക്ഷെ അപ്പോഴും എന്നെ വളർത്തിയ മുതലാളിമാർ എന്നെ രക്ഷിക്കാൻ വരുമെന്ന ദാർഷ്ട്യം ആയിരുന്നു മനസ്സിൽ..കാരണം അവരെന്നെ ഒരു കൂടപ്പിറപ്പിനെ പോലെയാണ് കരുതിയിരുന്നത് അതുകൊണ്ട് തന്നെ തല ഉയർത്തിയാണ് ജയിലിലേക്ക് ചെന്നത്..ഉടൻ പുറത്തിറക്കുമെന്ന അവരുടെ ഉറപ്പാണ് എനിക്ക് ധൈര്യമേകിയത്..

നാളുകൾ നീണ്ടു പോയതല്ലാതെ അവരാരും എന്നെ തേടി വന്നില്ല…അവൾ പോലും എന്നെ മറന്നുവോ എന്ന് ചിന്തിച്ചു… ഞാൻ എന്നെ തന്നെ തിരിച്ചറിഞ്ഞ നിമിഷങ്ങൾ…

ഒക്കെയും അവരവരുടെ കാര്യസാധ്യത്തിനു വേണ്ടി മാത്രമുള്ള കാപട്യം നിറഞ്ഞ സ്നേഹപ്രകടനങ്ങൾ മാത്രമായിരുന്നെന്ന തിരിച്ചറിവ് ലഭിച്ചത് അപ്പോഴാണ്..ഉപയോഗ ശേഷം നിഷ്കരുണം വലിച്ചെറിയാവുന്ന വെറുമൊരു ഉപകരണം മാത്രമായിരുന്നു ഞാൻ..

മിനിയുടെ ഓരോ വാക്കുകളും എത്രമാത്രം വിലപ്പെട്ടതായിരുന്നു എന്ന് ബോധ്യമായ നാളുകൾ.. അതൊക്കെയും കേട്ടിരുന്നെങ്കിൽ ഞാനിപ്പോൾ അവളുടെയും മോളുടെയും കൂടെ ഉണ്ടാകുമായിരുന്നു.. എന്നെ മാത്രം വിശ്വസിച്ചു വീട്ടുകാരെ ഉപേക്ഷിച്ചു ഇറങ്ങി വന്ന അവളോട് ചെയ്ത ദ്രോഹത്തിന്റെ വ്യാപ്തി എത്രത്തോളം ആണെന്ന് അറിഞ്ഞപ്പോൾ അതെന്നെ വല്ലാതെ ചുട്ടുപ്പൊളിച്ചു..

അവളുടെ കാലിൽ വീണൊന്ന് മാപ്പ് ചോദിക്കാൻ ഞാൻ വല്ലാതെ കൊതിച്ചു.. പക്ഷെ സാധ്യമല്ലല്ലോ..

ഓരോ ദിനവും ഓരോ യുഗം പോലെ കടന്നു പോയി.. അവളെയും മോളെയും കാണാൻ ദിവസങ്ങൾ എണ്ണി ഞാൻ കാത്തിരുന്നു.. ഒടുവിൽ നീണ്ട ആറ്‌വർഷങ്ങൾക്ക് ശേഷം പുതിയൊരു മനുഷ്യനായി ഞാൻ സ്വതന്ത്രനായി…

നിറഞ്ഞ സന്തോഷത്തോടെയും വർധിച്ച ആവേശത്തോടെയും ഞാൻ വീട്ടിലേക്ക് പാഞ്ഞു..

ചെയ്ത തെറ്റുകൾക്ക് മാപ്പ് പറഞ്ഞു ഇനിയുള്ള കാലം അവരോടൊപ്പം സ്വസ്ഥമായി ജീവിക്കാൻ തീരുമാനിച്ചു ചെന്ന എന്നോട് ഇനി ഒരിക്കലും ഇങ്ങോട്ടേക്ക് വരരുതെന്ന താക്കീതാണ് കേൾക്കുവാൻ സാധിച്ചത്..തെമ്മാടിയായി കഴിയുന്നൊരു അച്ഛനെ എന്റെ മകൾക്ക് വേണ്ടെന്ന് മിനി പറഞ്ഞപ്പോൾ ഹൃദയം പൊടിഞ്ഞു നിണമൊഴുകി.. അവളുടെ ഓരോ ചോദ്യങ്ങൾക്കും ഉത്തരമില്ലാത്തവനെ പോലെ ഞാൻ തല താഴ്ത്തി നിന്നു..