ചിങ്കാരി 9 [Shana] 424

“പോട്ടെ ടാ… നീ എന്തിനാ ഇങ്ങനെ സങ്കടപ്പെടുന്നെ.. ഞാനില്ലേ നിന്റെ കൂടെ… എത്രകാലം നീയിങ്ങനെ ഉള്ളില്‍ കൊണ്ട് നടക്കും… ഇനി നിനക്കും ഒരു ആശ്വാസം ആകും… പോട്ടെ .. ഇനി വെറുതെ ഓരോന്ന് ചിന്തിച്ചു ടെന്‍ഷന്‍ ആവണ്ട.. റിലാക്‌സ് ആക്… ”

“അവന്‍ … എന്നാലും… “അച്ചു വിതുമ്പല്‍ അടക്കാന്‍ പ്രയാസപ്പെട്ടു

“ഒന്നുമില്ല… നീ ഒന്ന് റീലാക്‌സ് ആക് പെണ്ണേ… കുറച്ചു നേരം കണ്ണടച്ചിരിക്ക്… ഈ കോലത്തില്‍ വീട്ടില്‍ ചെന്നാല്‍ എല്ലാര്‍ക്കും മറുപടി കൊടുക്കേണ്ടിവരും… കരച്ചിലൊക്കെ നിര്‍ത്തിക്കേ…. ”

അച്ചു കണ്ണുകളടച്ചു സീറ്റിലേക്ക് ചാരിക്കിടന്നു…. ഓര്‍മകളുടെ വേലിയേറ്റത്തില്‍ പലതും തെളിഞ്ഞുവന്നു.. മറക്കാനാഗ്രഹിക്കുന്ന നൊമ്പരപ്പെടുത്തിയ ഓര്‍മ്മകള്‍ ഒരു ചലച്ചിത്രം പോലെ മുന്നില്‍ വന്നു പരിഹസിക്കും പോലെ അവള്‍ക്കു തോന്നി… അവള്‍ മിഴികള്‍ കുറച്ചുകൂടി മുറുക്കി അടച്ചു…..

************************************

“ടി നിന്നെ ഗേറ്റിന്റെ അടുത്ത് ആക്കിത്തരാം, തിരിച്ചു അജിയുടെ കൂടെ പോരില്ലേ “അതുല്‍ അവളോട് ചോദിച്ചു

“ആ ഏട്ടന്‍ പൊയ്‌ക്കോ ഞാന്‍ അവന്റെ കൂടെ വീട്ടില്‍ പൊയ്‌ക്കോളാം ”

അതുല്‍ അവളെ ഗെയിറ്റിനു മുന്നിലാക്കി തിരിച്ചു പോയി…അച്ചു ചെല്ലുമ്പോള്‍ പുറത്തു അജിയും കൂട്ടുകാരും സംസാരിക്കുന്നുണ്ടായിരുന്നു അവള്‍ വരുന്നത് അവര്‍ കണ്ടില്ല , അവരെ ഒന്ന് പേടിപ്പിക്കാന്‍ അവള്‍ പതുങ്ങി നടന്നു, അപ്പോഴാണ് അവള്‍ അവരുടെ സംസാരം കേട്ടത്,

“ടാ നീ ഇന്ന് എങ്ങനെ രക്ഷപെട്ടു… അല്ലെങ്കില്‍ അവളുടെ വാലില്‍ തൂങ്ങി അല്ലായിരുന്നോ നടപ്പ് … “അജിയുടെ കൂട്ടുകാരന്‍ ശരത് പുച്ഛത്തോടെ ചോദിച്ചു

“അതൊക്കെ വലിയ കഥയാണ് അളിയാ…” അജി ഗമയില്‍ പറഞ്ഞു.

“എടാ നീ പറയ്… എങ്ങനെ രക്ഷപെട്ടു ആ വട്ട് കേസിന്റെ അടുത്തു നിന്ന്.. സാധാരണ അങ്ങനെ പറ്റാറില്ലല്ലോ….” അവര്‍ക്കൊപ്പമുണ്ടായിരുന്ന ജോസ് കൂടി ശരത്തിനെ പിന്താങ്ങിക്കൊണ്ട് ചോദിച്ചു