ചിങ്കാരി 4 [Shana] 414

” ആകെ സന്തോഷം കിട്ടിയത് ആ തള്ളക്ക് ഒന്നു കിട്ടിയപ്പോളാ എനിക്കവിടെ തുള്ളിച്ചാടി ഡാൻസ് കളിക്കണമെന്നുണ്ടാർന്നു പിന്നെ അടുത്തത് എന്തിനാ ഞാൻ ഇരന്നു വാങ്ങുന്നതെന്നോർത്ത ”

” ഇനി അവരുടെ നാവു പൊങ്ങില്ല , പിന്നെ അമ്മാവനും ഒരു സല്യൂട്ട് കൊടുക്കണം , എന്തായിരുന്നു ”

” അതേടാ അച്ഛൻ ആദ്യം പറഞ്ഞപ്പോ എനിക്ക് മരിച്ചാൽ മതീന്ന് തോന്നിപ്പോയി അമ്മ ആണെങ്കിൽ വല്ലാത്ത നോട്ടം എല്ലാം തീർന്നെന്നു കരുതി , അവർക്ക് എന്നെ വിശ്വാസം ഇല്ലന്ന് തോന്നിയപ്പോൾ തകർന്നു പോയടാ , ഞാൻ കരുതി ഉടനെ പിടിച്ചു എന്നെ കെട്ടിക്കുമെന്ന്, അച്ഛന്റെ വാക്കുകളുണ്ടല്ലോ ഓഹ് മരിച്ചുവീണ എന്നെ ഉയർത്തെഴുന്നേല്പിച്ചു സത്യം അച്ഛൻ ഇങ്ങനെ സപ്പോർട്ട് ചെയ്യുമെന്ന് കരുതിയില്ല ”

” എന്തായാലും രണ്ടാഴ്ച കഴിഞ്ഞുള്ള നിന്റെ തിരിച്ചുവരവ് ഗംഭീരം ആയിരുന്നു , ” സംസാരിച്ചു സംസാരിച്ചു അവർ വീടെത്തി പിരിഞ്ഞു.

കാലം തൻ്റെ രണ്ടു മാസം കൂടെ പൊഴിച്ചു.
സംഭവബഹുലമായ രണ്ടു മാസങ്ങൾക്ക് ശേഷം അച്ചുവിൻ്റെയും അജിയുടെയും പ്ലസ് ടു പരീക്ഷയും കഴിഞ്ഞു
അവധി ആഘോഷമാക്കാൻ അച്ചുവും അജിയും പല പുതിയ പദ്ധതികളും ആവിഷ്കരിച്ചു വീട്ടിലേക്കു നടന്നു

വീടെത്താറായപ്പോളാണ് ടോമിയുടെ കുര കേൾക്കുന്നത് എന്താണെന്നറിയാൻ അവർ അങ്ങോട്ടേക്ക് ഓടിയെത്തി , ടോമി വീടിനുള്ളിലേക്ക് നോക്കി നല്ല കുരയായിരുന്നു കെട്ടിയിട്ടിരിക്കുന്ന കാരണം അവൻ അവിടാകെ മാന്തി പറിചിട്ടുണ്ട്

പെട്ടന്നവർ അകത്തേക്ക് കയറി , വാതിൽ തുറന്നു അവിടുത്തെ അവസ്ഥ കണ്ട് ഞെട്ടിയതും അലറിയതുമെല്ലാം ഒന്നിച്ചായിരുന്നു.

” അയ്യോ ചേച്ചി, ” അച്ചുവല്ല്യ വായിൽ നിലവിളിച്ചു.

അകത്തേക്ക് ഓടിക്കയറിയ അജിയും അച്ചുവും കാണുന്നത് വായിൽ തുണിതിരുകി കൈകാലുകൾ കെട്ടിയിട്ട നിലയിൽ അനു ചേച്ചിയെ ആണ്. വീടിനുള്ളിൽ സാധനങ്ങൾ എല്ലാം വലിച്ചുവരിയിട്ടിരിക്കുന്നു. അകം മുഴുവൻ ആകെ അലങ്കോലമായി കിടപ്പുണ്ട്. പിടിവലി നടന്നതിന്റെ ലക്ഷണം അറിയാനുണ്ട് . ഒരു നിമിഷം അച്ചു പകച്ചു പോയി.

അച്ചുവിനെയും അജു വിനെയും കണ്ട സന്തോഷത്തിൽ അനു എന്തൊക്കെയോ പറയാൻ ശ്രമിച്ചു. വായിൽ തുണി തിരുകി വെച്ചിരുന്നതിനാൽ അവർക്ക് ഒന്നുംവ്യക്തമായില്ല.